ບັນດາເຈົ້າໜ້າທີ່ປາກີສຖານກ່າວວ່າ ລະເບີດລູກນຶ່ງທີ່ແຕກຂຶ້ນໃກ້ໆກັບຊາຍແດນອັຟການີສຖານ ໄດ້ສັງຫານປະຊາຊົນໄປຢ່າງໜ້ອຍ 25 ຄົນແລະບາດເຈັບຕື່ມອີກ 26 ຄົນ ຊຶ່ງເປັນການໂຈມຕີຄັ້ງຮ້າຍແຮງທີ່ສຸດທີ່ເກີດຂຶ້ນໃນຮອບຫລາຍເດືອນຜ່ານມານີ້.
ທາງການປາກີສຖານກ່າວວ່າ ເຂົາເຈົ້າເຊື່ອວ່າ ມັນເປັນການວາງລະເບີດໃນໄລຍະໄກທີ່ໃຊ້ເຄື່ອງ remote ຄວບຄຸມ ທີ່ແຕກຂຶ້ນໃນຕະຫຼາດແຫ່ງນຶ່ງໃນຂົງເຂດຊົນເຜົ່າ Khyber ໃນວັນອັງຄານມື້ນີ້. ພວກທີ່ເຫັນເຫດການກ່າວຕໍ່ພວກນັກຂ່າວວ່າ ການໂຈມຕີດັ່ງກ່າວໄດ້ປະໃຫ້ພວກຊາກສົບຫລາຍສົບຢາຍຊະຊາຍຢູ່ໃນບ່ອຍເກີດເຫດນັ້ນ.
ຢູ່ໃກ້ໆກັບບ່ອນລະເບີດແຕກຂຶ້ນ ມີລົດຫລາຍຄັນທີ່ໃຊ້ໂດຍພວກທະຫານບ້ານທີ່ນິຍົມຝ່າຍລັດຖະບານ. ກອງທັບປາກີສຖານສະໜັບສະໜຸນການຈັດຕັ້ງກຸ່ມທະຫານບ້ານຕໍ່ຕ້ານກຸ່ມຕາລີບັນໃນທ້ອງຖິ່ນຂຶ້ນ ອັນທີ່ເອີ້ນກັນວ່າ ກຸ່ມ lashkars ແລະພວກຫົວຮຸນແຮງໄດ້ທໍາການໂຈມຕີພວກທະຫານບ້ານພ້ອມດ້ວຍພວກຄອບຄົວຂອງເຂົາ ເຈົ້າຢ່າງຕໍ່ເນື່ອງມາໃນຫວ່າງບໍ່ເທົ່າໃດປີຜ່ານມານີ້.
ໃນຂະນະທີ່ຍັງບໍ່ມີຜູ້ໃດອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ເທື່ອ ແຕ່ການໂຈມຕີແບບນີ້ ສ່ວນຫລາຍເປັນຍຸດທະວິທີຂອງພວກກຸ່ມຫົວຮຸນແຮງປາກີສຖານ ໃນພາກຕາເວັນຕົກສຽງເໜືອທີ່ສະຖານະ ການມີຄວາມຫຼໍ່ແຫຼມນັ້ນ.
ເບິ່ງຮູບສໄລ໌ໂຊຂອງເຫດການບະເບີດແຕກ
