ລິ້ງ ສຳຫລັບເຂົ້າຫາ

ສານປາກິສຖານ ຕັດສິນໂທດ ຊາວອະເມຣິກັນ

  • ໄພສານ ວໍຣະຈັກ

ສານແຫ່ງນຶ່ງ ຂອງປາກິສຖານ ໄດ້ຕັດສິນໂທດຊາວອະເມຣິກັນ 5 ຄົນ ໃຫ້ຈຳຄຸກ ຜູ້ລະ 10 ປີ ຫຼັງຈາກໄດ້ພົບເຫັນວ່າພວກກ່ຽວ ມີຄວາມຜິດໃນການກໍ່ການຮ້າຍ

ເຈົ້າໜ້າທີ່ປາກິສຖານໄດ້ປະກາດ ກ່ຽວກັບ ຄຳຕັດສິນດັ່ງກ່າວ ໃນ ວັນພະຫັດມື້ນີ້ ທີ່ເມືອງ SARGODHA ໃນພາກຕາເວັນອອກຂອງປາກິສຖານ ແລະວ່າ ສານໄດ້ຕັດສິນໂທດ ຊາວອະເມຣິກັນ ຊຶ່ງທັງໝົດ​ ເປັນ​ຄົນ​ເຊື້ອ​ສາຍມຸສລິ​ມ ແລະ ມີອາຍຸ​ໃນລະຫວ່າງ 20 ປີຕົ້ນໆນັ້ນ ໃນຂໍ້ຫາ ກໍ່ການຮ້າຍ ສອງຂໍ້ ແລະປັບໃໝ ຜູ້ລະ 821 ໂດລາ.

ຄະນະໄອຍະການ ໄດ້ຮ້ອງຂໍ ໃຫ້ສານຈຳຄຸກ ບຸກຄົນທັງ 5 ຕະຫຼອດຊີວິດ ແລະຮອງຫົວ ໜ້າໄອຍະການ ທ່ານ RANA BAKHTIAR ກ່າວວ່າ ພວກເຈົ້າໜ້າທີ່ ຈະຂໍອຸທອນ ຕໍ່ ສານສູງສຸດ ເພື່ອໃຫ້ລົງໂທດ ພວກກ່ຽວດົນກວ່ານີ້.

ປາກິສຖານ ໄດ້ກ່າວຫາ ຊາວອະເມຣິກັນທັງ 5 ຊຶ່ງຕ່າງ ກໍມາຈາກເຂດ ນະຄອນຫຼວງ ວໍຊິງຕັນນັ້ນວ່າ ວາງແຜນໂຈມຕີ ປາກິສຖານ ແລະພວມ ຊອກຫາທາງ ເພື່ອຈະໄປສົມທົບ ກັບພວກຫົວຮຸນແຮງ ທີ່ກຳລັງ ທຳການຕໍ່ສູ້ ໃນອັຟການິສຖານ.

ຕຳຫຼວດ ປາກິສຖານ ກ່າວວ່າ ຕົນໄດ້ພົບເຫັນອີ-ແມລ ແລະຫຼັກຖານອື່ນໆ ທີ່ສະແດງ ໃຫ້ເຫັນວ່າ ຊາວອະເມຣິກັນ ທັງ 5 ໄດ້ຕິດຕໍ່ ກັບພວກຫົວຮຸນແຮງ ແລະມີຄວາມຕັ້ງໃຈ ທີ່ຈະກໍ່ ອາຊະຍາກຳ.

ພວກຊາວອະເມຣິກັນຈຸນີ້ ກ່າວອ້າງວ່າ ຕົນບໍ່ມີຄວາມຜິດ ແລະວ່າ ພວກຕົນ ໄດ້ຖືກ ທໍລະມານ ໂດຍພວກເຈົ້າໜ້າທີ່ ສະຫະລັດ ແລະປາກິສຖານ ຂະນະທີ່ຢູ່ໃນຄຸກ. ທັງ ສະຫະລັດ ແລະປາກິສຖານ ໄດ້ປະຕິເສດ ກ່ຽວກັບເລື່ອງນີ້.

XS
SM
MD
LG