ໃນວັນພະຫັດວານນີ້ ປາກິສຖານໄດ້ປະຕິເສດ ຕໍ່ການຕຳໜິຕິຕຽນຂອງສະຫະລັດ ທີ່ຈຳ
ຄຸກທ່ານໝໍປາກິສຖານຄົນນຶ່ງທີ່ໄດ້ຊ່ອຍສະຫະລັດຕາມຫານາຍ Osama bin Laden
ຂະນະທີ່ກຳມາທິການຂອງລັດຖະສະພາສະຫະລັດ ໄດ້ຕົກລົງທີ່ຈະຕັດການຊ່ອຍເຫຼືອແກ່
ປາກິສຖານ ເພື່ອເປັນການປະທ້ວງກ່ຽວກັບການຈຳຄຸກທ່ານໝໍຄົນນີ້.
ສານແຫ່ງນຶ່ງໃນເຂດຊົນເຜົ່າ Khyber ທາງພາກຕາເວັນຕົກສຽງເໜືອຂອງປາກິສຖານໄດ້
ຕັດສິນໂທດຈຳຄຸກທ່ານໝໍ Shakil Afridi ເປັນເວລາ 33 ປີ ຍ້ອນທໍລະຍົດຕໍ່ປະເທດຊາດ
ໃນມື້ວັນພຸດແລ້ວນີ້. ທ່ານໝໍ Afridi ຖືກກ່າວຫາວ່າໄດ້ຈັດໃຫ້ມີການສັກຢາວັກຊີນປອມຂຶ້ນ
ເພື່ອຊ່ອຍອົງການສືບລັບຊີໄອເອ ເກັບກຳ DNA ຈາກຄອບຄົວຂອງນາຍ bin Laden ຢູ່
ເຮືອນຫຼັງນຶ່ງທີ່ເມືອງ Abbottabad ບ່ອນທີ່ຫົວໜ້າກຸ່ມກໍ່ການຮ້າຍທີ່ໂລກຕ້ອງການໂຕທີ່
ສຸດ ຫຼົບລີ້ຢູ່ນັ້ນ. ນາຍ bin Laden ໄດ້ຖືກຂ້າຕາຍ ໂດຍກຳລັງພິເສດຂອງສະຫະລັດ ລະ
ຫວ່າງ ການບຸກເຂົ້າໄປໂຈມຕີເຮືອນຫຼັງດັ່ງກ່າວເມື່ອວັນທີ 11 ພຶດສະພາປີກາຍນີ້.
ໂຄສົກກະຊວງການຕ່າງປະເທດປາກິສຖານ ກ່າວຕໍ່ພວກນັກຂ່າວໃນວັນພະຫັດວານນີ້ວ່າ
ຄະດີຂອງທ່ານໝໍ Afridi ຈະຖືກຕັດສິນໃຫ້ສອດຄ່ອງຕາມກົດໝາຍປາກິສຖານ ແລະໂດຍ
ສານຂອງປາກິສຖານ. ທ່ານເວົ້າວ່າ ສະຫະລັດແລະປາກິສຖານຕ້ອງໃຫ້ການເຄົາລົບຕໍ່ກະ
ບວນການຍຸຕິທຳແລະການຕັດສິນຂອງກັນແລະກັນ.
ພາຍໃຕ້ລະບົບຕຸລາການຂອງປາກິສຖານແລ້ວ ທ່ານໝໍ Afridi ບໍ່ໄດ້ຮັບການປຶກສາຫາລື
ໃດໆຈາກທະນາຍຄວາມ.
ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ໄດ້ປະນາມການປະ
ຕິບັດຕໍ່ທ່ານໝໍ Afridi ໂດຍເວົ້າວ່າ ບໍ່ມີຄວາມຍຸຕິທຳ ແລະບໍ່ຖືກຕ້ອງ. ທ່ານນາງກ່າວຕໍ່
ກອງປະຊຸມຖະແຫຼງຂ່າວໃນມື້ວານນີ້ວ່າ ສະຫະລັດຮູ້ສຶກເສຍໃຈທັງຄວາມຈິງທີ່ວ່າທ່ານໄດ້
ຖືກພົບເຫັນມີຄວາມຜິດແລະການຕັດສິນລົງໂທດຢ່າງໜັກ. ທ່ານນາງປະກາດວ່າ ຈະສືບ
ຕໍ່ກົດດັນກ່ຽວກັບຄະດີນີ້ກັບປາກິສຖານ.
ທ່ານ Jay Carney ໂຄສົກຂອງທຳນຽບຂາວກ່າວວ່າ ສະຫະລັດຍັງສືບຕໍ່ມອງບໍ່ເຫັນວ່າ
ມີພື້ນຖານອັນໃດທີ່ທ່ານໝໍ Afridi ຕ້ອງໄດ້ຖືກຈັບ ແລະກ່າວຕື່ມວ່າ ມັນເປັນຈຸດສຳຄັນທີ່
ວ່າ ການຊ່ອຍເຫຼືອທີ່ໄດ້ຮັບຈາກບຸກຄົນໃດກໍຕາມໃນການດຳເນີນຄວາມພະຍາຍາມເພື່ອ
ນຳເອົາຕົວນາຍ bin Laden ມາລົງໂທດເປັນການຊ່ອຍເຫຼືອທີ່ບໍ່ແມ່ນຕໍ່ຕ້ານປາກິສຖານ
ແຕ່ຕໍ່ຕ້ານກຸ່ມກໍ່ການຮ້າຍອາລກາຍດາແລະຕໍ່ຕ້ານນາຍ Osama bin Laden.
ນອກນັ້ນແລ້ວໃນວັນພະຫັດວານນີ້ ອະນຸກຳມະການຂອງສະພາສູງສະຫະລັດ ໄດ້ລົງຄະ
ແນນສຽງຕັດການຊ່ອຍເຫຼືອປາກິສຖານ 33 ລ້ານໂດລາ ຄື 1 ລ້ານໂດລາສຳຫຼັບໂທດໃນ
ແຕ່ລະປີ ທີ່ທ່ານໝໍ Afridi ຖືກຕັດສິນຈຳຄຸກ 33 ປີນັ້ນ.