ປະທານາທິບໍດີປາກິສຖານທ່ານ Asif Ali Zardari
ຈະພົບປະກັບປະທານາທິບໍດີສະຫະລັດ ທ່ານບາຣັກ
ໂອບາມາ ທີ່ທຳນຽບຂາວໃນວັນສຸກມື້ນີ້.
ໂຄສົກຂອງທຳນຽບຂາວທ່ານ Robert Gibbs ກ່າວ
ໃນວັນພະຫັດວານນີ້ວ່າ ເປັນທີ່ຄາດກັນວ່າການເຈລະ
ຈາຫາລື ຈະເພັ່ງເລັງໃສ່ການດຳເນີນຄວາມພະຍາຍາມ
ໃນປາບປາມພວກກໍ່ການຮ້າຍ ຂອງປາກິສຖານ ການ
ມີຜົນປະໂຫຍດຮ່ວມໃນການປະຕິຮູບເສດຖະກິດ ແລະ
ການໃຫ້ຄວາມສະໜັບສະໜຸນ ຕໍ່ປະຊາທິປະໄຕ.
ທ່ານ Zardari ເດີນທາງມາກຸງວໍຊິງຕັນເພື່ອເຂົ້າຮ່ວມພິທີໄວ້ອາໄລໃຫ້ແກ່ທູດພິເສດຂອງ
ສະຫະລັດ ຮັບຜິດຊອບກ່ຽວກັບປາກິສຖານ ແລະອັຟການິສຖານ ທ່ານ Richard Hol-
brook ທີ່ໄດ້ເສຍຊີວິດຢ່າງກະທັນຫັນ ໃນເດືອນທັນວາແລ້ວນີ້.
ເຫດການທັງສອງນີ້ ຈະບໍ່ອະນຸຍາດໃຫ້ມີການເກັບກຳຂ່າວ ແຕ່ເປັນທີ່ຄາດກັນວ່າ ທຳ
ນຽບຂາວຈະຖະແຫຼງຂ່າວໃນຮູບໃດຮູບນຶ່ງກ່ຽວກັບການເຈລະຈາຫາລືຢູ່ທີ່ທຳນຽບຂາວ.
ນອກນັ້ນແລ້ວທ່ານ Zardari ຍັງມີກຳນົດທີ່ຈະພົບປະກັບລັດຖະມົນຕີການຕ່າງປະເທດ
ສະຫະລັດ ທ່ານນາງ Hillary Clinton.
ການເດີນທາງມາຢ້ຽມຢາມສະຫະລັດ ຂອງປະທານາທິບໍດີ Zardari ມີຂຶ້ນປະມານນຶ່ງ
ເດືອນຫຼັງຈາກລັດຖະບານທ່ານໂອບາມາ ໄດ້ຊັ່ງຊາຕີລາຄາກ່ຽວກັບຍຸດທະສາດຂອງຕົນ
ໃນອັຟການິສຖານ ແລະປາກິສຖານ ແລະຫຼັງຈາກເກີດວິກິດການທາງດ້ານການເມືອງ
ຄັ້ງໃຫຍ່ໃນປາກິສຖານ ທີ່ພາໃຫ້ລັດຖະບານປະສົມຂອງປາກິສຖານ ເກືອບພັງທະລາຍ
ລົງນັ້ນ.
