ເຈົ້າໜ້າທີ່ສະຫະລັດກ່າວວ່າ ການໂຈມຕີດ້ວຍ drone ຫຼືເຮືອບິນທີ່ບໍ່ມີຄົນຂັບ ໃນເຂດຊົນເຜົ່າຂອງປາກີສຖານນັ້ນ ແມ່ນແນໃສ່ ຜູ້ນໍາອັນດັບ 2 ຂອງກຸ່ມກໍ່ການຮ້າຍ al-Qaida ແຕ່ພວກເຂົາເຈົ້າຍັງບໍ່ຊາບວ່າ ຜູ້ກ່ຽວລອດພົ້ນຈາກການໂຈມຕີ ຫຼືບໍ່?
ພວກເຈົ້າໜ້າທີ່ທີ່ບໍ່ປະສົງອອກນາມ ກ່າວຕໍ່ສື່ຂອງສະຫະລັດ ວ່າ ການໂຈມຕີທາງ ອາກາດໃນວັນຈັນວານນີ້ ໃນເຂດ Hesokhel ນັ້ນ ໄດ້ແນໃສ່ ນາຍ Abu Yahia a—Libi. ພວກທ່ານວ່າ ຖ້າມີການຢືນຢັນຄັກແນ່ວ່າ ຜູ້ກ່ຽວໄດ້ເສຍຊີວິດແລ້ວນັ້ນ ມັນກໍຈະເປັນການເສຍຫາຍຢ່າງໃຫຍ່ຫຼວງ ຕໍ່ກຸ່ມກໍ່ການຮ້າຍດັ່ງກ່າວ.
ທາງການປາກີສຖານ ກ່າວວ່າ ການໂຈມຕີຄັ້ງນີ້ ໄດ້ສັງຫານ ຢ່າງນ້ອຍ 15 ຄົນ ຊຶ່ງເປັນບັ້ນນຶ່ງໃນການໂຈມຕີຫລາຍໆບັ້ນ ໃນລະຫວ່າງບໍ່ເທົ່າໃດມື້ຜ່ານມານີ້ ທີ່ໄດ້ສັງຫານຢ່າງນ້ອຍ 27 ຄົນ ທັງໝົດ.
ລັດຖະມົນຕີການຕ່າງປະເທດຂອງປາກິສຖານ ໄດ້ກ່າວປະນາມການໂຈມຕີດ້ວຍຍົນ drone ຂອງສະຫະລັດຢ່າງແຮງ ໃນວັນຈັນວານນີ້ ແລະເອີ້ນການໂຈມຕີດັ່ງກ່າວວ່າ ເປັນການໂຈມຕີທີ່ຜິດກົດໝາຍ ທີ່ລະເມີດອະທິປະໄຕຂອງປາກີສ ຖານ ແລະຂັດກັນກັບກົດໝາຍນາໆຊາດນໍາ.
ທ່ານ Christopher Snedden ນັກວິເຄາະຂ່າວກ່ຽວກັບເອເຊຍໃຕ້ ປະຈໍາສໍານັກງານທີ່ປຶກສາດ້ານຄວາມປອດໄພ Asia Calling ທີ່ Melbourne ປະເທດອອສເຕຣເລຍ ກ່າວຕໍ່ VOA ວ່າ ສະຫະລັດຍັງຈະສືບຕໍ່ໃຊ້ການໂຈມຕີດ້ວຍຍົນ drone ຕໍ່ໄປ ເພາະວ່າມັນເປັນວິທີທີ່ມີປະສິດທິພາບສູງໃນການທໍາລາຍພວກຫົວຮຸນແຮງ
ໂດຍທີ່ບໍ່ຕ້ອງໃຊ້ກອງກໍາລັງຂອງສະຫະລັດເລີຍ.
ນາຍ al-Libi ຜູ້ທີ່ເກີດໃນລິເບຍນັ້ນ ໄດ້ເປັນຜູ້ກໍາກັບນໍາວຽກງານປະຈໍາວັນຂອງກຸ່ມກໍ່ການຮ້າຍ
al-Qaida ຢູ່ໃນເຂດຊົນເຜົ່າຕ່າງໆຂອງປາກີສຖານ ຮ່ວມຕະຫລອດທັງເປັນຕົວເຊື່ອມໂຍງ
ຂອງກຸ່ມ ກັບສາຂາໃນຕ່າງປະເທດນໍາ.
ນາຍ al-Libi ໄດ້ຫລົບໜີຈາກຄຸກ ທີ່ຖານທັບອາກາດ Bagram ໃນອັຟການີສຖານ ໃນປີ
2005 ແລະໄດ້ປາກົດໂຕໃນວີດີໂອໂຄສະນາຊວນເຊື່ອ ຫຼາຍໆຊຸດ ກ່ອນທີ່ຈະກາຍມາເປັນ
ຮອງຜູ້ນໍາຂອງກຸ່ມ al-Qaida ໃນປິກາຍນີ້.
