ສະພາປາກິສຖານ ໄດ້ເປີດກອງປະຊຸມສຸກເສີນ ເພື່ອທີ່ຈະ
ເຕົ້າໂຮມ ການສະໜັບສະໜຸນທາງການເມືອງ ຕໍ່ນາຍົກ
ລັດຖະມົນຕີ ທ່ານ Nawaz Sharif ຜູ້ທີ່ປະຕິເສດທີ່ຈະລາ
ອອກຈາກຕຳແໜ່ງ ເຖິງແມ່ນວ່າໄດ້ມີການປະທ້ວງຈາກກຸ່ມ
ຝ່າຍຄ້ານເປັນເວລາ 2 ອາທິດແລ້ວກໍຕາມ.
ໃນຄຳຖະແຫລງເປີດກອງປະຊຸມນັ້ນ ລັດຖະມົນຕີກະຊວງ
ພາຍໃນ ທ່ານ Chaudhry Nisar Ali Khan ໄດ້ເອີ້ນພວກ
ປະທ້ວງວ່າເປັນ “ການກະບົດ ຕໍ່ຕ້ານປາກິສຖານ” ທີ່
ນຳພາໂດຍ “ພວກນັກປະຕິວັດທີ່ຈອມປອມ” ແລະ
“ພວກກໍ່ການຮ້າຍ.”
ເປັນເວລາຫຼາຍກວ່າ 2 ອາທິດແລ້ວ ພວກປະທ້ວງຫຼາຍພັນຄົນ ນຳໂດຍ ນັກກິລາ cricket
ທີ່ໄດ້ກາຍມາເປັນນັກການເມືອງ ທ່ານ Imran Khan ແລະ ນັກສອນສາສະໜາທີ່ໄດ້ຮັບ
ຄວາມສະໜັບສະໜຸນຈາກ ມະຫາຊົນ ທ່ານ Tahir-ul-Qadri ໄດ້ຕັ້ງຄ້າຍຢູ່ໃນເຂດນຶ່ງ
ຂອງ ນະຄອນຫລວງ Islamabad.
ພວກເຂົາ ຮຽກຮ້ອງຕ້ອງການນາຍົກລັດຖະມົນຕີ ຜູ້ທີ່ໄດ້ເຂົ້າກຳອຳນາດ ໃນປີແລ້ວນີ້
ໃຫ້ລາອອກ ຍ້ອນມີການກ່າວຫາວ່າ ສໍ້ໂກງຄະແນນ ໃນການເລືອກຕັ້ງ ແລະ ການສໍ້
ລາດບັງຫລວງຢ່າງກວ້າງຂວາງ.
ພວກປະທ້ວງໂດຍທົ່ວໄປແລ້ວ ແມ່ນດຳເນີນໄປດ້ວຍຄວາມສະຫງົບ ຈົນເຖິງທ້າຍອາທິດ
ແລ້ວນີ້ ເວລາການປະທະກັນລະເບີດຂຶ້ນລະຫວ່າງ ພວກປະທ້ວງ ກັບກຳລັງຮັກສາຄວາມ ປອດໄພ ທີ່ເຮັດໃຫ້ ມີ 3 ຄົນເສຍຊີວິດ ແລະ ຫຼາຍຮ້ອຍຄົນໄດ້ຮັບບາດເຈັບ.
ໃນວັນຈັນວານນີ້ ໄດ້ເກີດການສູ້ລົບກັນຕື່ມອີກ ລະຫວ່າງພວກປະທ້ວງ ແລະຕຳຫລວດ.
ພວກປະທ້ວງໄດ້ເຂົ້າຢຶດເອົາສະຖານີໂທລະພາບ ຂອງລັດຖະບານຍເປັນເວລາສັ້ນໆ
ທີ່ໄດ້ບັງຄັບໃຫ້ຊ່ອງດັ່ງກ່າວຢຸດການອອກອາກາດໄປຊົ່ວຂະນະນຶ່ງນັ້ນ.
