ສານສູງສຸດຂອງປາກິສຖານໄດ້ປະກາດວ່າ ນາຍົກລັດຖະມົນຕີ Yousaf Raza Gilani ຂາດຄຸນສົມບັດຫຼືບໍ່ມີສິດດໍາລົງຕໍາແໜ່ງໄດ້ ຊຶ່ງເຮັດໃຫ້ປະເທດຕົກຢູ່ໃນຄວາມປັ່ນປ່ວນທາງດ້ານການເມືອງຮອບໃໝ່.
ໃນວັນທີ 26 ເມສາຜ່ານມາ ສານສູງສຸດໄດ້ຕັດສິນວ່າ ທ່ານ Gilani ມີຄວາມຜິດໃນຂໍ້ຫາຖານປະໝາດ ບໍ່ຍອມຮ້ອງຂໍໃຫ້ທາງການຂອງ Switzerland ໄຂການສືບສວນສອບສວນຂອງພວກເຂົາເຈົ້າຄືນກ່ຽວກັບການສໍ້ລາດບັງຫຼວງຂອງປະທານາທິບໍດີ Asif Ali Zardari ນັ້ນ.
ທ່ານ Iftikar Chaudhry ຫົວໜ້າຜູ້ພິພາກສາສານສູງສຸດ ຕັດສິນວ່າ ຍ້ອນທ່ານ Gilani ບໍ່ໄດ້ຂໍອຸທອນຕໍ່ຄໍາຕັດສິນມີຄວາມຜິດນັ້ນ ທ່ານຈຶ່ງບໍ່ມີສິດຈະເປັນສະມາຊິກຂອງສະພາແຫ່ງຊາດ ແລະບໍ່ມີສິດເປັນນາຍົກລັດຖະມົນຕີຂອງປະເທດໄດ້.
ທ່ານ Fawad Chaudhry ຜູ້ຊ່ອຍວຽກຂັ້ນອາວຸໂສຂອງທ່ານ Gilani ໄດ້ໃຫ້ຄໍາຕອບຕໍ່ຄໍາຕັດສິນດັ່ງກ່າວ ໂດຍເວົ້າວ່າ ມີແຕ່ສະຫາແຫ່ງຊາດເທົ່ານັ້ນ ທີ່ສາມາດປົດນາຍົກລັດຖະມົນຕີໄດ້ ບໍ່ແມ່ນສານ. ແຕ່ອິງຕາມກົດໝາຍຂອງປາກິສຖານແລ້ວ ກໍແມ່ນວ່າບຸກຄົນໃດກໍຕາມທີ່ເຄີຍຖືກຕັດສິນມີຄວາມຜິດມາກ່ອນ ຈະຮັບໃຊ້ຢູ່ໃນສະພາແຫ່ງຊາດບໍ່ໄດ້.
ສານໄດ້ສັ່ງໃຫ້ປະທານາທິບໍດີ Zardari ເອົາບາດກ້າວຕ່າງໆສໍາລັບການເລືອກຕັ້ງເອົານາຍົກລັດຖະມົນຕີຄົນໃໝ່. ພາຍໃຕ້ກົດໝາຍລັດຖະທໍາມະນູນ ປະທານາທິບໍດີຈະຕ້ອງຮຽກກອງປະຊຸມຮ່ວມຂອງສະພາແຫ່ງຊາດ ເພື່ອເລືອກເອົານາຍົກລັດຖະມົນຕີຄົນໃໝ່.