ຂະບວນລົດບັນທຸກສໍາພາລະຂອງອົງການເນໂຕ້ ມີກຳນົດຈະເລີ້ມການຂົນສົ່ງໄປຍັງອັຟການີສຖານຄືນໃໝ່ ລຸນຫຼັງທີ່ໄດ້ມີການບັນລຸຂໍ້ຕົກລົງສະບັບ ນຶ່ງລະຫວ່າງສະຫະລັດແລະປາກີສຖານ ທີ່ສິ້ນສຸດການປິດດ່ານຊາຍແດນດັ່ງກ່າວມາເປັນເວລາດົນນານຂອງປາກີສຖານນັ້ນ.
ທີ່ເມືອງທ່າ Karachi ຂອງປາກີສຖານ ພະນັກງານຂັບລົດບັນທຸກ ແລະ ຄົນງານອື່ນໆ ໄດ້ເລີ່ມຕຽມລົດ ເພື່ອອອກໄປປະຕິບັດໜ້າທີ່ຂົນສົ່ງສໍາພາລະ ຫຼັງຈາກໄດ້ຈອດໄວ້ດົນນານ.
ປາກີສຖານຕົກລົງທີ່ຈະເປີດເສັ້ນທາງລໍາລຽງດັ່ງກ່າວຄືນໃໝ່ເມື່ອວັນອັງຄານວານນີ້ ຫຼັງຈາກສະຫະລັດໄດ້ກ່າວຂໍຂະມາໂທດສໍາລັບການໂຈມຕີທາງອາກາດຂອງສະຫະລັດ ທີ່ໄດ້ສັງຫານທະຫານປາກີສຖານ 24 ຄົນ ຢູ່ເຂດຊາຍແດນຕິດກັບອັຟການີສຖານນັ້ນ.
ເຫດຮ້າຍດັ່ງກ່າວຍັງຜົນໃຫ້ປາກິສຖານອັດເສັ້ນທາງລຳລຽງສາຍຕ່າງໆແລະເຮັດໃຫ້ຄວາມສຳພັນລະຫວ່າງປະເທດທັງສອງ ທີ່ເຄັ່ງຕຶງຢູ່ແລ້ວ ນັ້ນ ຊຸດໂຊມລົງໄປຕື່ມອີກ.
ປາກີສຖານ ໄດ້ທວງໃຫ້ສະຫະລັດຂໍຂະມາໂທດໂດຍເຕັມ ລຸນຫຼັງຈາກເຫດຮ້າຍທີ່ເກີດຂຶ້ນ ແຕ່ບັນດາເຈົ້າໜ້າທີ່ສະຫະລັດພຽງແຕ່ສະແດງຄວາມເສຍໃຈຢ່າງເປັນທີ່ສຸດ ແລະຄວາມເສົ້າສະຫຼົດຢ່າງຈິງໃຈ ຈົນເຖິງວັນອັງ ຄານວານນີ້.
ເມື່ອວັນອັງຄານວານນີ້ ລັດຖະມົນຕີການຕ່າງປະເທດສະຫະລັດ ທ່ານນາງຄລິນຕັນ ກ່າວວ່າ ທ່ານນາງໄດ້ໂອ້ລົມກັບລັດຖະມົນຕີຕ່າງປະເທດປາກີສຖານ ທ່ານນາງ Hina Rabbani Khar ທາງໂທລະສັບ ແລະ ທ່ານນາງກ່າວວ່າ ພວກທ່ານທັງສອງໄດ້ຮັບຮູ້ເຖິງຄວາມຜິດພາດກ່ຽວກັບເຫດການທີ່ໄດ້ເກີດຂຶ້ນຊຶ່ງເປັນເຫດໃຫ້ທະຫານປາກີສຖານ 24 ຄົນເສຍ ຊີວິດໄປນັ້ນ.