ບັນດາເຈົ້າໜ້າທີ່ປາກີສຖານກ່າວວ່າ ປະທານາທິບໍດີ Asif Ali Zardari ຈະເຂົ້າຮ່ວມກອງປະຊຸມສຸດຍອດຂອງອົງການເນໂຕ້ທີ່ນະຄອນ Chicago ຫຼັງຈາກຄະນະລັດຖະບານຂອງປາກີສຖານຮັບເອົາການເຊື້ອເຊີນໃນນາທີສຸດທ້າຍ ເພື່ອປຶກສາຫາລືສະຖານະການໃນອັຟການີສຖານ.
ເນໂຕ້ໄດ້ເຊື້ອເຊີນປະທານາທິບໍດີ Zardari ໃນຕົ້ນອາທິດນີ້ ຫຼັງຈາກປາກີສຖານສະເໜີແນະວ່າ ຕົນຈະເປີດເສັ້ນທາງລໍາລຽງສະບຽງທາງບົກຄືນໃໝ່ໃຫ້ແກ່ກໍາລັງທະຫານນາໆຊາດໃນອັຟການີສຖານ.
ລັດຖະບານ Islamabad ໄດ້ປິດເສັ້ນທາງລໍາລຽງ ຂອງອົງການເນໂຕ້ ເປັນເວລາເກືອບຫົກເດືອນຜ່ານມາແລ້ວເພື່ອປະທ້ວງການໂຈມຕີທາງອາກາດຂອງສະຫະລັດ ທີ່ໄດ້ສັງຫານທະຫານປາກີສຖານ 24 ຄົນ ຍ້ອນຄວາມເຂົ້າໃຈຜິດ ຢູ່ໃກ້ເຂດຊາຍແດນ ຕິດກັບອັຟການີສຖານນັ້ນ.
ເວລານີ້ ທັງສອງຝ່າຍກໍາລັງດຳເນີນການຂັ້ນສຸດທ້າຍກ່ຽວກັບຂໍ້ຕົກລົງກັນ ເພື່ອຍຸຕິການປິດເສັ້ນທາງລໍາລຽງດັ່ງກ່າວກ່ອນການເລີ່ມຕົ້ນກອງປະຊຸມສຸດຍອດເນໂຕ້ໃນວັນອິດຕໍ່ໜ້ານີ້. ທ່ານນາງ Victoria Nuland ໂຄສົກກະຊວງຕ່າງປະເທດສະຫະລັດກ່າວເມື່ອວັນພຸດວານນີ້ວ່າ ມີຄວາມຄືບໜ້າແດ່ແລ້ວໃນການເຈລະຈາຕໍ່ຮອງກັນນັ້ນ.
ເບິ່ງວີດີໂອລາຍງານກ່ຽວກັບບັນຫາສໍາຄັນໆທີ່ຈະຖືກນໍາມາປຶກສາຫາລືກັນ
ໃນກອງປະຊຸມຂອງກຸ່ມເນໂຕ້.