ເຈົ້າໜ້າທີ່ປາກິສຖານ ຮຽກຮ້ອງໃຫ້ປະຊາຊົນ 400,000 ຄົນ ພາກັນຍົກຍ້າຍ ອອກໄປຈາກ 3 ຫົວເມືອງທີ່ພວມ ຖືກຄຸກຄາມໂດຍໄພນໍ້າຖ້ວມຄັ້ງໃໝ່.
ເຈົ້າໜ້າທີ່ໄດ້ອອກຄຳເຕືອນ ໃນວັນພະຫັດມື້ນີ້ ຫຼັງຈາກ ແມ່ນໍ້າ Indus ຫຼືແມ່ນໍ້າສິນທຸ ໄດ້ລົ້ນຝັ່ງຂຶ້ນຖ້ວມ ທີ່ ແຂວງ Sind ໃນພາກໃຕ້ປາກິສຖານ.
ເຈົ້າໜ້າທີ່ເວົ້າວ່າ ປະຊາຊົນທີ່ເມືອງ Sujawal ເມືອງ Mir Pur Batoro ແລະເມືອງ Daro ກໍາລັງຕົກຢູ່ໃນຄວາມ ສ່ຽງ.
ໄພນໍ້າຖ້ວມ ທີ່ໄດ້ເລີ້ມມາ ເກືອບນຶ່ງເດືອນແລ້ວນັ້ນ ເຮັດໃຫ້ມີ ຜູ້ເສຍຊີວິດໄປແລ້ວ ປະມານ 1,600 ຄົນ ແລະອີກຫຼາຍລ້ານຄົນ ຖືກຍົກຍ້າຍ.
ອົງການສະຫະປະຊາຊາດ ກ່າວວ່າ ມີ 800,000 ຄົນ ຍັງຖືກຕັດຂາດ ຈາກເຂດອື່ນໆ ຍ້ອນນໍ້າຖ້ວມ ແລະສາມາດ ໄດ້ຮັບການຊ່ອຍເຫຼືອ ຈາກທາງອາກາດທໍ່ນັ້ນ.
ເຈົ້າໜ້າທີ່ປາກິສຖານ ໄດ້ດຳເນີນງານ ເພື່ອເສີມຄູກັ້ນນໍ້າ ແລະຍົກຍ້າຍປະຊາຊົນ ຫຼາຍ ສິບພັນຄົນ ອອກຈາກເຂດ ພາກໃຕ້ຂອງປະເທດ ທີ່ຕົກຢູ່ໃນຄວາມສ່ຽງ ຈະຖືກນໍ້າຖ້ວມ ຕື່ມ ໃນສັບປະດານີ້.
ຂະນະດຽວກັນ ນາຍພົນຄົນນຶ່ງ ຂອງສະຫະລັດ ກ່າວວ່າ ທ່ານມີຄວາມເຊື່ອໝັ້ນວ່າ ກອງທັບປາກິສຖານ ຍັງຈະສືບຕໍ່ທຳການສູ້ລົບກັບພວກກະບົດ ເຖິງແມ່ນ ໄດ້ມີການ ທຸ້ມເທຊັບພະຍາກອນທີ່ສຳຄັນ ເພື່ອຮັບມືກັບໄພທຳມະຊາດ ໃນຄັ້ງນີ້ກໍຕາມ.
