ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ໄພນໍ້າຖ້ວມປະທະປາກິສຖານ ອີກເທື່ອໃໝ່


ຊາວປາກິສຖານປະມານ 150,000 ຄົນຕ້ອງ​ໄດ້ຍົກຍ້າຍໄປຢູ່​ໃນເຂດດິນສູງ ຍ້ອນນໍ້າ ຈາກແມ່ນໍ້າອິນດຸສ ຫລື​ສິນທຸ ​ໄດ້ລົ້ນ​ຝັ່ງຖ້ວມຫລາຍໆເມືອງ ແລະໝູ່ບ້ານຕື່ມອີກ ໃນເຂດ ພາກໃຕ້ຂອງປະເທດ. ພວກເຈົ້າໜ້າທີ່ປາກິສຖານໄດ້ດິ້ນຮົນ ​ເພື່ອເພີ່ມຄວາມແຂງ​ແຮງ​ ຕື່ມ​ອີກແກ່ຄູກັ້ນນໍ້າ ແລະຫລາຍໆຈຸດ ທີ່ອາດສາມາດ​ພັງ​ລົງໄດ້ ໃນການຕໍ່ສູ້ຕ້ານລະດັບນໍ້າ ທີ່ຖີບຕົວສູງຂຶ້ນໃນເຂດພາກໃຕ້ຂອງແຂວງ Sindh ນັ້ນ.

ນອກ​ນັ້ນ ລັດຖະບານປາກິສຖານກໍກໍາລັງປະເຊີນກັບຄວາມໂກດແຄ້ນ ຢ່າງແຮງຈາກປະຊາ ຊົນຂອງຕົນ ຍ້ອນ​ອັນພວກເຂົາເຈົ້າຖືວ່າເປັນຄວາມພະຍາຍາມຊ່ວຍບັນເທົາທຸກ ທີ່ອືດອາດ ຊັກຊ້າທີ່ສຸດຂອງລັດຖະບານ.

ປາກົດວ່າ​ ເວລາ​ນີ້ປາກິສຖານພ້ອມ​ແລ້ວທີ່ຈະຂໍຮ້ອງຕໍ່ກອງທຶນສາກົນ ໃນລະຫວ່າງການ ພົບປະກັນທີ່ກຸງວໍຊິງຕັນດີຊີ ໃນອາທິດນີ້ ເພື່ອຂໍ​ໃຫ້ຜ່ອນຜັນເງຶ່ອນໄຂ​ໃນ​ກາ​ນຊໍາລະເງິນ ກູ້ຢືມ ຈຳນວນສິບພັນລ້ານໂດລາ ເນຶ່ອງຈາກພາລະດ້ານເສດຖະກິດທີ່ມີເພີ່ມຂື້ນຂອງຕົນ ຈາກໄພນໍ້າຖ້ວມນັ້ນ. ເງິນຈຳນວນດັ່ງ ກ່າວນີ້ແມ່ນ​ໄດ້ກູ້ຢືມມາເມື່ອປີ 2008.

ອົງການອະນາໄມໂລກຂອງສະຫະປະຊາຊາດກ່າວວ່າ ປັດຈຸບັນນີ້ ປາກິສຖານກໍາລັງປະ ເຊີນກັບພວກພະຍາດຕ່າງໆທີ່ມານໍານໍ້າ ແລະພະຍາດຕິດຕໍ່ອື່ນໆ ໃນຂົງເຂດທີ່ຖືກນໍ້າ ຖ້ວມນັ້ນ. ອົງການອະນາໄມໂລກ ໄດ້ຮຽກຮ້ອງໃຫ້ບັນດາສະມາຊິກອົງການສະຫະປະ ຊາຊາດ ຈົ່ງປະຕິບັດ​ພັນທະເງິນຊ່ວຍເຫລືອ ຈໍານວນ 200 ລ້ານໂດລາ ທີ່ພວກ​ເຂົາ​ເຈົ້າໄດ້ສັນຍາໄວ້ນັ້ນໃຫ້ໄດ້ ​ໂດຍກ່າວວ່າ ພຽງ​ແຕ່ຄໍາໝັ້ນສັນຍານັ້ນ ​ແມ່ນ​ຈະ​ບໍ່​ສາມາດ ຊື້ຢຸກຢາ ເພື່ອຕໍ່ຕ້ານພວກພະຍາດທີ່ອັນຕະລາຍເຖິງຊີວິດເຫລົ່ານີ້ໄດ້.

XS
SM
MD
LG