ພວກເຈົ້າໜ້າທີ່ໃນເຂດພາກຕາເວັນອອກຂອງປາກີສຖານ
ກ່າວວ່າ ການວາງລະເບີດໃສ່ລົດບັສຄັນນຶ່ງ ໄດ້ສົ່ງຜົນໃຫ້
ມີຜູ້ເສຍຊີວິດຢ່າງໜ້ອຍຫົກຄົນ.
ພວກເຈົ້າໜ້າທີ່ກ່າວວ່າ ມີຜູ້ໄດ້ຮັບບາດເຈັບອີກ 20 ຄົນ
ຈາກເຫດລະເບີດ ເມື່ອວັນເສົາວານນີ້ ຢູ່ໃກ້ເມືອງ Kharian
ທີ່ຕັ້ງຂອງຄ້າຍທະຫານໃນແຂວງປັນຈາບ
ມີຜູ້ໂດຍສານຢູ່ເທິງລົດບັສຄັນດັ່ງກ່າວປະມານ 50 ຄົນ
ເວລາເກີດລະເບີດ ບໍ່ມີຜູ້ໃດອ້າງເອົາຄວາມຮັບຜິດຊອບ
ໃນການວາງລະເບີດຄັ້ງນີ້.
ເຫດລະເບີດມີຂື້ນພາຍໃນເວລາມື້ນຶ່ງ ຫລັງຈາກການໂຈມຕີບັ້ນນຶ່ງໃນພາກຕາເວັນຕົກສຽງ ເໜືອຂອງປາກີສຖານ ທີ່ຍັງຜົນໃຫ້ມີຜູ້ເສຍຊີວິດຢ່າງໜ້ອຍ 80 ຄົນ ແລະບາດເຈັບອີກ ຫລາຍກວ່າ 120 ຄົນ.
ກຸ່ມຕາລິບານຂອງປາກີສຖານໄດ້ອ້າງເອົາຄວາມຮັບຜິດຊອບ ສໍາລັບການໂຈມຕີດັ່ງກ່າວນັ້ນ ແລະໄດ້ປະຕິຍານວ່າຈະທໍາການໂຈມຕີຕື່ມອີກ ເພື່ອ ແກ້ແຄ້ນການຕາຍຂອງຜູ້ນໍາ ອາລ ຄາອີດາ ນາຍໂອຊາມາ ບິນ ລາເດັນ ທີ່ຖືກສັງຫານໂດຍກອງກໍາລັງພິເສດຂອງສະຫະລັດ ໃນການບຸກເຂົ້າຄົ້ນ ເຮືອນຫລັງນຶ່ງໃນເມືອງ Abbottabad ຂອງປາກີສຖານ ເມື່ອວັນທີ່ 2 ເດືອນພືດສະພານັ້ນ.
