ບັນດາເຈົ້າໜ້າທີ່ປາກິສຖານກ່າວວ່າ ການໂຈມຕີຂອງເຮືອບິນທີ່ບໍ່ມີຄົນຂັບລໍານຶ່ງທີ່ສົງໄສ
ວ່າແມ່ນຂອງສະຫະລັດ ໄດ້ສັງຫານປະຊາຊົນ10 ຄົນໃນເຂດຊົນເຜົ່າໃນພາກຕາເວັນຕົກ
ສຽງເໜືອຂອງປາກິສຖານ ໃກ້ໆກັບຊາຍແດນຕິດກັບອັຟການິສຖານ.
ບັນດາເຈົ້າໜ້າທີ່ເຫລົ່ານີ້ກ່າວວ່າ ລູກສອນໄຟ 2 ລູກໄດ້ຕົກຖືກບໍລິເວນແຫ່ງນຶ່ງ ທີ່ສົງ
ໄສວ່າເປັນຂອງພວກຫົວຮຸນແຮງໃນເຂດຊົນເຜົ່າ Waziristan ເໜືອ. ບັນດາເຈົ້າໜ້າທີ່
ຮັກສາຄວາມປອດໄພປາກິສຖານກ່າວວ່າ ພວກທີ່ເສຍຊີວິດໄປນັ້ນ ແມ່ນຮວມທັງພວກ
ນັກຕໍ່ສູ້ຫົວຮຸນແຮງຕ່າງປະເທດ ແລະທ້ອງຖິ່ນຈໍານວນນຶ່ງ.
ອົງການຂ່າວ AP ແຈ້ງໃຫ້ຊາບວ່າ ຂົງເຂດດັ່ງກ່າວເປັນບ້ານເກີດເມືອງນອນຂອງນາຍ
Hafiz Gul Bahadur ຜູ້ບັນຊາການຫົວຮຸນແຮງທີ່ມີຊື່ສຽງ ທີ່ໄດ້ແນຈຸດໝາຍໃສ່ການ
ຕໍ່ສູ້ກັບພວກທະຫານຕ່າງປະເທດໃນອັຟການິສຖານນັ້ນ.
ປາກິສຖານໄດ້ປະນາມການໂຈມຕີຂອງພວກເຮືອບິນທີ່ບໍ່ມີຄົນຂັບນີ້ຢ່າງເປີດເຜີຍ ແຕ່
ເຖິງຢ່າງໃດກໍດີ ເຊື່ອກັນວ່າການໂຈມຕີເຫລົ່ານີ້ໄດ້ດໍາເນີນໄປພາຍໃຕ້ການຊ່ອຍເຫລືອ
ຂອງພະແນກສືບລັບຂອງປາກິສຖານນັ້ນ.
ໃນເດືອນແລ້ວນີ້ ປະທານາທິບໍດີ ບາຣັກ ໂອບາມມາ ແຫ່ງສະຫະລັດໄດ້ກ່າວປ້ອງກັນ
ການໂຈມຕີຂອງພວກເຮືອບິນເຫລົ່ານີ້ວ່າ ມັນເສີມຂະຫຍາຍສະມັດຖະພາບຂອງສະ
ຫະລັດ ໃນການເຄົາລົບນັບຖືອະທິປະໄຕຂອງພວກປະເທດຕ່າງໆແລະຈໍາກັດການ
ໂຈມຕີເຂົ້າໄປໃນດິນແດນຂອງພວກເຂົາເຈົ້າ.