ບັນດາເຈົ້າໜ້າທີ່ປາກິສຖານກ່າວວ່າ ການໂຈມຕີຂອງຍົນບໍ່ມີຄົນຂັບທີ່ສົງໄສວ່າເປັນຂອງສະຫະລັດໄດ້ສັງຫານປະຊາຊົນຢ່າງໜ້ອຍ 4 ຄົນໃນຂົງເຂດຊົນເຜົ່າທາງພາກຕາເວັນຕົກສຽງເໜືອຂອງປາກິສຖານ ໃກ້ກັບຊາຍແດຍອັຟການິສຖານ.
ທາງການປາກິສຖານກ່າວວ່າ ຍົນບໍ່ມີຄົນຂັບລໍານີ້ ໄດ້ຍິງລູກສອນໄຟຢ່າງໜ້ອຍ 4 ລູກໃສ່ລົດຄັນນຶ່ງໃນວັນອາທິດມື້ນີ້ ໃກ້ກັບເມືອງ Datta Khel ໃນຂົງເຂດ Waziristan ເໜືອ.
ບັນດາເຈົ້າໜ້າທີ່ສະຫະລັດບໍ່ເຄີຍໄດ້ຮັບຮູ້ຢ່າງເປີດເຜີຍເລື້ອງການໃຊ້ເຮືອບິນບໍ່ມີຄົນຂັບໂຈມຕີໃນປາກິສຖານນັ້ນ ແຕ່ໄດ້ຢືນຢັນທາງສ່ວນຕົວຕໍ່ບັນດາອົງການຂ່າວຕ່າງໆວ່າມີການການໃຊ້ຍົນ drone ດັ່ງກ່າວ. ປາກິສຖານໄດ້ປະນາມການໂຈມຕີເຫລົ່ານີ້ວ່າ ເປັນການລະເມີດອະທິປະໄຕຂອງຕົນ ແຕ່ເຊື່ອກັນວ່າ ການໂຈມຕີເຫລົ່ານີ້ແມ່ນດໍາເນີນໄປດ້ວຍການຊ່ອຍເຫລືອຂອງອົງການສືບຂ່າວລັບຂອງປາກິສຖານ.
