ທະຫານສະຫະລັດໄດ້ຍ້າຍໜີອອກຈາກຖານທັບອາກາດແຫ່ງນຶ່ງ ໃນເຂດຕາເວັນຕົກ
ສຽງໃຕ້ ຂອງປາກີສຖານເມື່ອວັນອາທິດວານນີ້ ທັນກໍາໜົດວັນຂີດເສັ້ນຕາຍ ຊຶ່ງແມ່ນ
ວັນທີ່ 11 ເດືອນທັນວາ ທີ່ຕັ້ງໄວ້ ໂດຍລັດຖະບານກຸງອິສລາມາບັດ ເພື່ອເປັນການ
ຕອບໂຕ້ຕໍ່ການໂຈມຕີທາງອາກາດຂອງກຸ່ມເນໂຕ້ເມື່ອວັນທີ່ 26 ເດືອນພະຈິກຜ່ານມາ
ທີ່ໄດ້ສັງຫານທະຫານປາກີສຖານ 24 ຄົນນັ້ນ.
ກອງທັບປາກີສຖານກ່າວວ່າ ຕົນໄດ້ເຂົ້າຄອບຄອງຖານທັບ Shamsi ໃນແຂວງ
Baluchistan ບໍ່ດົນຫລັງຈາກທະຫານຄົນສຸດທ້າຍຂອງສະຫະລັດໄດ້ຖອນອອກໄປ.
ລັດຖະບານປາກີສຖານ ໄດ້ສັ່ງໃຫ້ມີການເຄື່ອນໄຫວດັ່ງກ່າວນີ້ ອັນເປັນພາກສ່ວນນຶ່ງ
ຂອງມາດຕະການລົງໂທດຕ່າງໆ ທີ່ສະທ້ອນໃຫ້ເຫັນເຖິງຄວາມໂກດແຄ້ນຂອງລັດຖະ
ບານປາກີສຖານ ຕໍ່ເຫດການທີ່ເກີດຂຶ້ນນັ້ນ. ນອກນີ້ແລ້ວ ກຸງອິສລາມາບັດ ຍັງໄດ້ປິດ
ເຂດດ່ານຊາຍແດນທີ່ລົດບັນທຸກຂອງກໍາລັງເນໂຕ້ ໃຊ້ເປັນເສັ້ນທາງລໍາລຽງສະບຽງ
ໄປຍັງອັຟການີສຖານປະເທດທີ່ບໍ່ມີທາງອອກສູ່ທະເລນັ້ນ ແລະພ້ອມກັນຂວໍ້າບາດ
ບໍ່ເຂົ້າຮ່ວມກອງປະຊຸມຂອງນານາຊາດ ທີ່ເມືອງບອນ ກ່ຽວກັບອະນາຄົດຂອງອັຟກາ
ນີສຖານ.
ເວລານີ້ຍັງບໍ່ມີການຢືນຢັນໃນທັນທີທັນໃດ ກ່ຽວກັບການຖອນທະຫານອອກຈາກຖານ
ທັບດັ່ງກ່າວຈາກພວກເຈົ້າໜ້າທີ່ສະຫະລັດ.
ປາກີສຖານໄດ້ກ່າວຫາເນໂຕ້ວ່າ ເຈດຕະນາແນເປົ້າໃສ່ທະຫານຂອງປາກີສຖານ ໃນ
ລະຫວ່າງການປະຕິບັດການຕໍ່ຕ້ານພວກກຸ່ມຫົວຮຸນແຮງໃນເຂດ ຊາຍແດນຕິດກັບອັຟ
ການີສະຖານນັ້ນ. ກອງທັບສະຫະລັດ ແລະເນໂຕ້ ປະຕິເສດຂໍ້ກ່າວຫາດັ່ງກ່າວ ແລະໄດ້
ທໍາການສືບສວນ ສອບສວນເຫດການ ນັ້ນແລ້ວ.
ຜູ້ຊ່ຽວຊານດ້ານການສືບລັບສະຫະລັດກ່າວວ່າ ການຖອນທະຫານອອກ ຈາກຖານທັບ
ອາກາດ Shamsi ນັ້ນ ເບິ່ງຄືວ່າຈະບໍ່ສົ່ງຜົນກະທົບທີ່ສໍາຄັນ ປານໃດກ່ຽວກັບສົງຄາມ
ໂດຍໃຊ້ຍົນທີ່ບໍ່ມີຄົນຂັບ ໃນຂົງເຂດຊາຍແດນ ເພາະວ່າທະຫານສະຫະລັດ ສາມາດບັງ
ຄັບການບິນຂອງຍົນທີ່ບໍ່ມີຄົນຂັບໄດ້ ໃນການແລ່ນອອກຈາກສະນາມບິນແຫ່ງຕ່າງໆໃນ
ອັຟການີສຖານ.