ພວກເຈົ້າໜ້າທີ່ປາກິສຖານ ໂດຍບໍ່ສົນໃຈຕໍ່ການປະທ້ວງທີ່ເພີ້ມ
ທະວີຂຶ້ນ ຈາກບັນດານັກເຄື່ອນໄຫວເພື່ອສິດທິມະນຸດ ໃນວັນ
ພຸດມື້ນີ້ ໄດ້ປະຫານຊີວິດພວກຜູ້ຊາຍ 9 ຄົນຢູ່ໃນບັນຊີພວກທີ່
ຈະຖືກປະຫານຊີວິດ ເຮັດໃຫ້ຈຳນວນພວກນັກໂທດທີ່ຖືກແຂວນ
ຄໍທັງໝົດໃນທົ່ວປະເທດເພີ້ມ ຂຶ້ນເປັນ 48 ຄົນ ນັບແຕ່ລັດຖະ
ບານໄດ້ເລີ້ມໃຊ້ໂທດປະຫານຊີວິດຄືນໃນເດືອນທັນວາປີແລ້ວ
ນີ້.
ບັນດາເຈົ້າໜ້າທີ່ກ່າວວ່າ ການແຂວນຄໍຄັ້ງຫຼ້າສຸດ ມີຂຶ້ນໃນຄຸກ
ແຫ່ງຕ່າງໆໃນແຂວງ Punjab ຊຶ່ງເປັນແຂວງທີ່ມີປະຊາຊົນອາ
ໄສຢູ່ຫຼາຍທີ່ສຸດຂອງປາກິສຖານ ແລະພວກນັກໂທດເຫຼົ່ານີ້ຖືກ
ຕັດສິນມີຄວາມຜິດຖານກໍ່ອາຊະຍາກຳ ຮວມທັງ “ການກໍ່ການຮ້າຍ” ແລະເປັນຄາດ
ຕະກອນນຳ.
ໃນວັນອັງຄານວານນີ້ ພວກຜູ້ຊາຍ 12 ຄົນທີ່ຖືກຕັດສິນມີຄວາມຜິດໄດ້ຖືກປະຫານຊີ
ວິດ ສ່ວນຫຼາຍແມ່ນຢູ່ໃນແຂວງປັນຈາບ ຊຶ່ງເປັນຈຳນວນຫຼາຍທີ່ສຸດໃນມື້ດຽວ ນັບແຕ່
ລັດຖະບານໄດ້ຍົກເລີກການຫ້າມນຳໃຊ້ໂທດປະຫານຊີວິດມາ.
ນາຍົກລັດຖະມົນຕີ Nawaz Sharif ໄດ້ກັບຄືນມາໃຊ້ໂທດປະຫານຊີວິດຫຼັງຈາກການ
ໂຈມຕີທີ່ໂຮງຮຽນໃນເມືອງ Peshawar ທີ່ໄດ້ສັງຫານພວກເດັກນັກຮຽນຈຳນວນ134
ຄົນພ້ອມທັງພວກເຈົ້າໜ້າທີ່ປະຈຳໂຮງຮຽນ 16 ຄົນ. ກຸ່ມຕາລີບັນປາກິສຖານ ໄດ້ອ້າງ
ເອົາຄວາມຮັບຜິດຊອບໃນການບຸກໂຈມຕີດັ່ງກ່າວ ແລະໄດ້ໃຫ້ຄຳປະຕິຍານວ່າຈະດຳ
ເນີນການໂຈມຕີເຊັ່ນນີ້ຕື່ມອີກ.
ນັບແຕ່ນັ້ນມາ ລັດຖະບານໄດ້ເພີ້ມທະວີຄວາມພະຍາມຕໍ່ຕ້ານພວກກໍ່ການຮ້າຍຂຶ້ນ
ອີກ ແລະການນຳເອົາໂທດປະຫານຊີວິດມາໃຊ້ຄືນໃໝ່ ຖືກອ້າງວ່າເປັນພາກສ່ວນນຶ່ງ
ໃນການປຸກລະດົມດັ່ງກ່າວ.
ບັນດາກຸ່ມປົກປ້ອງສິດທິມະນຸດຢູ່ທັງໃນແລະນອກປະເທດປາກິສຖານໄດ້ຕຳໜິຕິຕຽນ
ການປະຫານຊີວິດຄົນໂທດນີ້ ແລະຮຽກຮ້ອງໃຫ້ລັດຖະບານຢຸດການປະຫານຊີວິດນີ້
ໂດຍທັນທີ ແລະຢືນຢັດວ່າ ພວກຄົນໂທດນີ້ຫຼາຍຄົນແມ່ນສືບເນື່ອງມາຜົນຂອງການ
ດຳເນີນຄະດີທີ່ຜິດພາດ ແລະບໍ່ຍຸຕິທຳ.
ປັດຈຸບັນນີ້ ກະປະມານວ່າ ມີພວກນັກໂທດຈຳນວນຫຼາຍກວ່າ 8 ພັນ ຄົນຢູ່ໃນບັນຊີລໍ
ຖ້າປະຫານຊີວິດໃນປາກິສຖານ.
