ທີ່ປາກິສຖານ ເຈົ້າໜ້າທີ່ກ່າວວ່າ ການໂຈມຕີສະຫລະຊີບ
ດ້ວຍລະເບີດ ຢູ່ນອກໂບດຄຣິສຕຽນສອງແຫ່ງໃນເມືອງ
Lahore ໄດ້ສັງຫານ ຢ່າງໜ້ອຍ 14 ຄົນ ແລະມີຜູ້ໄດ້ຮັບ
ບາດເຈັບຕື່ມອີກເກືອບ 70 ຄົນ.
ບັນດາເຈົ້າໜ້າທີ່ໂຮງໝໍ ກ່າວວ່າ ຢ່າງໜ້ອຍ 30 ຄົນ ທີ່ໄດ້
ຮັບບາດເຈັບ ມີອາການສາຫັດ.
ພວກເຫັນເຫດການ ກ່າວວ່າ ມືປືນ 2 ຄົນໄດ້ພະຍາຍາມຍິງປືນ
ບຸກເຂົ້າໄປໃນໂບດໃນວັນອາທິດມື້ນີ້ ໃນເຂດຊານເມືອງແຫ່ງນຶ່ງ
ຊຶ່ງ ປະຊາຊົນສ່ວນຫຼາຍເປັນຊາວຄຣິສຕຽນ. ເວລາພວກເຈົ້າ
ໜ້າທີ່ຮັກສາຄວາມປອດໄພຢຸດພວກເຂົາຢູ່ປະຕູທາງເຂົ້າໄປຫາ
ໂບດ ພວກໂຈມຕີກໍໄດ້ຈຸດຂະນວນວັດຖຸລະເບີດ ທີ່ມັດຕິດໂຕ
ຂອງພວກເຂົາ.
ບັນດາເຈົ້າໜ້າທີ່ກ່າວວ່າ ກຸ່ມຫົວຮຸນແຮງກຸ່ມນຶ່ງທີ່ພົວພັນ ກັບກຸ່ມຕາລີບານປາກິສຖານ ອ້າງເອົາຄວາມຮັບຜິດຊອບໃນການໂຈມຕີຄັ້ງນີ້.
ຄວາມຮຸນແຮງດັ່ງກ່າວໄດ້ເຮັດໃຫ້ຊາວຄຣິສຕຽນໂກດແຄ້ນ ຊຶ່ງໃນເວລາຕໍ່ມາ ໄດ້ພາກັນເດີນຂະບວນປະທ້ວງຕາມຖະໜົນສາຍຕ່າງໆ ຕໍ່ຕ້ານອັນທີ່ພວກເຂົາເຈົ້າກ່າວວ່າ ຄວາມລົ້ມແຫຼວຂອງເຈົ້າໜ້າທີ່ໃນການປ້ອງກັນພວກເຂົາເຈົ້ານັ້ນ.
ມີລາຍງານຂ່າວວ່າ ພວກປະທ້ວງໄດ້ບຸກເຂົ້າທຳລາຍຊັບສິນຂອງລັດຖະບານຢູ່ໃນເມືອງ ແລະເອົາໄຟຈູດລົດລາຕ່າງໆ.
ຄຸ້ມ Youhanabad ໃນເມືອງ Lahore ບ່ອນທີ່ການໂຈມຕີດັ່ງກ່າວ ເກີດຂຶ້ນ ແມ່ນເປັນບ່ອນຢູ່ອາໄສຂອງ ປະຊາຊົນເກືອບນຶ່ງລ້ານຄົນ ແລະເປັນເຂດນຶ່ງທີ່ພວກຊາວຄຣິສຕຽນຊົນກຸ່ມນ້ອຍອາໄສຢູ່ຫຼາຍທີ່ສຸດໃນປາກິສຖານ.
