ກຸ່ມຕາລີບັນປາກິສຖານໄດ້ອ້າງເອົາຄວາມຮັບຜິດຊອບໃນການໂຈມຕີສະລະຊີບ 2 ບັ້ນທີ່ແນເປົ້າໝາຍໃສ່ເຈົ້າໜ້າທີ່ຮັກສາຄວາມປອດໄພອະວຸໂສຂອງປາກີສຖານ ໃນວັນພຸດມື້ນີ້ ທີ່ໄດ້ເອົາຊີວິດຜູ້ຄົນໄປຢ່າງໜ້ອຍ 22 ຄົນ ຮວມທັງພັນລະຍາຂອງຫົວໜ້າຮັກສາຄວາມປອດໄພນໍາ.
ຕໍາຫລວດກ່າວວ່າ ຜູ້ໂຈມຕີຄົນທໍາອິດໄດ້ບີບກະນວນລະເບີດໃນລົດຂອງຜູ້ກ່ຽວໃຫ້ແຕກ
ຂຶ້ນຢູ່ນອກບ້ານພັກຂອງຮອງຫົວໜ້າໜ່ວຍຮັກສາຊາຍແດນປາກິສຖານໃນເມືອງ Quetta
ໃນພາກຕາເວັນຕົກສຽງໃຕ້ຂອງປະເທດ. ຫລັງຈາກລະເບີດໄດ້ແຕກຂຶ້ນຢູ່ທີ່ນັ້ນແລ້ວ ຜູ້
ວາງລະເບີດສະລະຊີບຄົນທີສອງທີ່ຍ່າງມາໄດ້ບຸກເຂົ້າໄປໃນບ້ານພັກຂອງເຈົ້າໜ້າທີ່ຄົນນີ້
ແລະກໍບີບກະນວນລະເບີດຂອງລາວໃຫ້ແຕກຂຶ້ນ.
ເຮືອນຂອງເຈົ້າໜ້າທີ່ຄົນນີ້ໄດ້ຮັບຄວາມເສຍຫາຍຢ່າງໜັກໃນການໂຈມຕີຄັ້ງນີ້ ແລະເຫດລະ
ເບີດທັງສອງໄດ້ເຮັດໃຫ້ຜູ້ຄົນໄດ້ຮັບບາດເຈັບຫລາຍກວ່າ 60 ຄົນ.
ກໍາລັງຮັກສາຄວາມປອດໄພດັ່ງກ່າວຂອງປາກິສຖານໄດ້ທໍາການເຄື່ອນໄຫວຢ່າງແຂງຂັນໃນ
ການສູ້ລົບກັບກຸ່ມຕາລີບັນໃນທົ່ວພາກຕາເວັນຕົກສຽງເໜືອຂອງປະເທດ ຮວມທັງພວກ
ເຂດຊົນເຜົ່າຕ່າງໆທີ່ມີຊາຍແດນຕິດກັບອັຟການີສຖານນັ້ນນໍາ.
ໃນຕົ້ນສັບປະດານີ້ ກໍາລັງຮັກສາຄວາມປອດໄພໄດ້ເຂົ້າປະກອບສ່ວນໃນການປະຕິບັດງານ
ຮ່ວມກັບອົງການສອດແນມຂອງສະຫະລັດແລະປາກິສຖານໃນເມືອງ Quetta ເພື່ອຈັບກຸມ
ພວກທີ່ສົງໄສວ່າເປັນສາຍລັບຂັ້ນອາວຸໂສຂອງກຸມ al-Qaida ນັ້ນ.
