ເຫດວາງລະເບີດແບບສະຫລະຊີບໃນວັນຈັນວານນີ້ ໄດ້ແຫກຜ່າຝູງຄົນກຸ່ມນຶ່ງ ຢູ່ໃນເຂດຕາເວັນຕົກສຽງໃຕ້ຂອງປາກິສຖານ ຊຶ່ງເຮັດໃຫ້ 8 ຄົນ ເສຍຊີວິດ ແລະ ຢ່າງໜ້ອຍອີກ 20 ຄົນໄດ້ຮັບບາດເຈັບ.
ຍັງບໍ່ມີການອ້າງເອົາຄວາມຮັບຜິດຊອບໃນທັນທີທັນໃດຕໍ່ການໂຈມຕີທີ່ຮ້າຍແຮງຢູ່ໃນນະຄອນແຄວຕຕາ (Quetta), ເມືອງເອກຂອງແຂວງບາລູຈິສຕັນ (Baluchistan) ນີ້ເທື່ອ.
ທ່ານ ອັບດູລ ຣາຊັກ ຊີມາ (Abdul Razaq Cheema), ຜູ້ບັນຊາການຕຳຫລວດກ່າວຕໍ່ພວກນັກຂ່າວວ່າ ຄົນວາງລະເບີດໄດ້ຈຸດຄະນວນລະເບີດທີ່ມັດໃສ່ຕົນໂຕຂອງລາວຂຶ້ນ ເມື່ອຄົນຍາມຮັກສາຄວາມສະຫງົບໄດ້ເຂົ້າໄປສະກັດລາວໄວ້ ແລະພະຍາຍາມທີ່ຈະຫ້າມລາວບໍ່ໃຫ້ເຂົ້າໄປໃນການໂຮມຊຸມນຸມຂອງນັກເຄື່ອນໄຫວຊາວອິສລາມນັ້ນ.
ທ່ານຊີມາ ກ່າວເພີ້ມອີກວ່າ ມີພະນັກງານຮັກສາຄວາມສະຫງົບຢ່າງໜ້ອຍ 3 ຄົນ ນອນຢູ່ໃນຈຳນວນຄົນທີ່ເສຍຊີວິດນັ້ນ.
ແຂວງອັນກ້ວາງໃຫຍ່ທີ່ເຕັມໄປດ້ວຍຄວາມທຸກຍາກແຕ່ກໍອຸດົມສົມບູນໄປດ້ວຍ ຊັບພະຍາກອນທຳມະຊາດຂອງປາກິສຖານແຫ່ງນັ້ນ ໄດ້ປະສົບກັບການກໍ່ກະບົດຂອງພວກແບ່ງແຍກດິນແດນໃນລະດັບຕ່ຳຂອງກຸ່ມບາລັອກຄ໌ (Baloch) ໃນຂະນະທີ່ ພວກນັກລົບທີ່ມີການເຊື່ອມໂຍງກັບພວກກຸ່ມກໍ່ການຮ້າຍທີ່ບໍ່ມີປະເທດ ຊຶ່ງລວມທັງ ກຸ່ມລັດອິສາມ ກໍມີການເຄື່ອນໄຫວຢ່າງຫ້າວຫັນຢູ່ໃນທີ່ນັ້ນ.
ເຫດລະເບີດໃນວັນຈັນວານນີ້ ມີຂຶ້ນໃນນຶ່ງມື້ພາຍຫລັງທີ່ລັດຖະມົນຕີກະຊວງພາຍໃນຂອງປາກິສຖານ, ທ່ານ ອີຊາສ ຊາ (Ijaz Shah) ໄດ້ຢືນຢັນລາຍງານຂ່າວສານ ທີ່ມີການເຜີຍແຜ່ຢ່າງກວ້າງຂວາງວ່າ ຜູ້ນຳທີ່ມີຊື່ສຽງຄົນນຶ່ງ ຂອງພວກນັກລົບດັ່ງກ່າວໄດ້ໂຕໜີອອກຈາກການກັກຂັງຂອງອົງການຮັກສາຄວາມປອດໄພຂອງລັດເມື່ອມໍ່ໆມານີ້.
ການຢັ້ງຢືນນັ້ນ ມີຂຶ້ນບໍ່ເທົ່າໃດມື້ ພາຍຫລັງທີ່ທ້າວ ເອຊານູລລາ ເອຊານ (Ehsanullah Ehsan), ອະດີດໂຄສົກປະຈຳກຸ່ມກະບົດຕາລີບານຂອງປາກິສຖານ, ທີ່ເມື່ອກ່ອນເອີ້ນວ່າເທຣີກ-ເອ-ຕາລີບານປາກິສຖານ (Tehreek-e-Taliban Pakistan ຫລື TTP ນັ້ນ ໄດ້ນຳເອົາຂໍ້ຄວາມຢູ່ວີດິໂອທີ່ກ່າວອ້າງວ່າ ຕົນໄດ້ໂຕນໜີອອກຈາກການກັກຂັງຂອງອົງການຮັກສາຄວາມປອດໄພຂອງລັດນັ້ນ ອອກມາເຜີຍແຜ່ຜ່ານທາງສື່ສັງຄົມອອນລາຍ.
ທ່ານຊາ ກ່າວຕໍ່ພວກນັກຂ່າວຢູ່ໃນນະຄອນອິສລາມາບັດກ່ຽວກັບການໂຕໜີ ຂອງທ້າວເອຊານວ່າ “ຂ່າວນັ້ນເປັນຄວາມຈິງ. ມັນເປັນຄວາມຈິງ.”
ບັນດາເຈົ້າໜ້າທີ່ຂອງລັດຖະບານ ແລະກອງທັບຈົນຮອດເວລານີ້ ກໍບໍ່ໄດ້ປະຕິເສດ ແລະກໍບໍ່ໄດ້ໃຫ້ການຢືນຢັນເຊັ່ນກັນ ກ່ຽວກັບການຫາຍສາບສູນແບບປິດສະໜາຂອງທ້າວເອຊານ. ຢູ່ໃນຂໍ້ຄວາມຂອງລາວນັ້ນ ທ້າວເອຊານ ອ້າງວ່າ ລາວໄດ້ສະໝັກໃຈຍອມຈຳນົນຕໍ່ພວກເຈົ້າໜ້າທີ່ປາກິສຖານ ໃນ 3 ປີກ່ອນໜ້ານີ້ ຢູ່ພາຍໃຕ້ຂໍ້ຕົກລົງອັນນຶ່ງ.
