ຕໍາຫລວດກ່າວວ່າ ຜູ້ວາງລະເບີດສະລະຊີບຄົນນຶ່ງໄດ້ຈູດກະນວນວັດຖຸລະເບີດທີ່ເຕັມລົດຄັນນຶ່ງ ຢູ່ນອກບ້ານພັກຂອງເຈົ້າໜ້າທີ່ຕໍາຫລວດຂັ້ນອາວຸ ໂສທ່ານນຶ່ງໃນນະຄອນກາຣາຈີ ເຮັດໃຫ້ຢ່າງໜ້ອຍ 8 ຄົນເສຍຊີວິດ.
ພວກເຈົ້າໜ້າທີ່ກ່າວວ່າ 6 ໃນຈໍານວນ 8 ຄົນທີ່ເສຍຊີວິດໄປໃນວັນຈັນມື້ນີ້ ແມ່ນຕໍາຫລວດທີ່ເຝົ້າຍາມບ້ານພັກຂອງເຈົ້າໜ້າທີ່ຕໍາຫລວດທ່ານນີ້ ແລະວ່າ ນອກນັ້ນແລ້ວກໍມີແມ່ຍິງຄົນນຶ່ງແລະເດັກນ້ອຍຄົນນຶ່ງເສຍຊີວິດໄປໃນການລະເບີດຄັ້ງນີ້.
ທ່ານ Chaudry Aslam ນາຍຕໍາຫລວດທີ່ເປັນເປົ້າໝາຍຂອງການວາງລະເບີດ ໄດ້ລອດຊີວິດຈາກການໂຈມຕີໃນວັນຈັນມື້ນີ້.
ທ່ານ Aslam ທີ່ເປັນຜູ້ຮັບຜິດຊອບໃນການສືບສວນກ່ຽວກັບພວກກຸ່ມຫົວຮຸນແຮງຕ່າງໆໃນ
ນະຄອນກາຣາຈີ ກ່າວວ່າ ທ່ານໄດ້ຮັບການຂົ່ມຂູ່ຫລາຍຄັ້ງຈາກພວກກະບົດຕາລີບັນປາກິສ
ຖານນັ້ນ.
ທ່ານ Aslam ກ່າວຕື່ມວ່າ ທ່ານບໍ່ຢ້ານກົວພວກຕາລີບັນ ແລະກ່າວເຖິງການໂຈມຕີໃນວັນ
ຈັນມື້ນີ້ວ່າ ເປັນການກະທໍາແບບຂີ້ຂາດຕາຂາວ.
ກຸ່ມຕາລີບັນໃນປາກິສຖານໄດ້ອ້າງເອົາຄວາມຮັບຜິດຊອບໃນການວາງລະເບີດຄັ້ງນີ້ ໂດຍ
ກ່າວວ່າ ທ່ານ Aslam ໄດ້ທໍາການຈັບກຸມແລະສັງຫານພວກນັກຕໍ່ສູ້ຂອງຕົນໄປຫລາຍຄົນ.
ໂຄສົກກຸ່ມຕາລີບັນກ່າວວ່າ ກຸ່ມຂອງຕົນຈະສືບຕໍ່ແນການໂຈມຕີໃສ່ພວກເຈົ້າໜ້າທີ່ທີ່ພົວພັນ
ໃນການສັງຫານພວກສະຫາຍຂອງພວກຕົນ.
ການລະເບີດດັ່ງກ່າວໄດ້ປະຂຸມຂະໜາດໃຫຍ່ໄວ້ຢູ່ນອກບ້ານພັກຂອງທ່ານ Aslam.
