ທາງດ້ານປາກີສຖານນັ້ນ ປະທານາທິບໍດີ Asif Ali Zardari ກ່າວວ່າ ການສັງຫານນາຍໂອຊາມາ ບິນລາເດັນ ຜູ້ນໍາເຄືອຂ່າຍ al-Qaida ບໍ່ໄດ້ເປັນການປະຕິບັດງານຮ່ວມກັນກັບປະເທດຂອງທ່ານ ແຕ່ທ່ານກໍ ກ່າວເນ້ນວ່າ ການຮ່ວມມືກັນເປັນເວລານຶ່ງທົດສະວັດກັບສະຫະລັດໄດ້ກໍາຈັດ “ໄພຂົ່ມຂູ່ອັນນຶ່ງຕໍ່ໂລກທີ່ສີວິໄລ” ໃຫ້ໝົດໄປແລ້ວ.
ໃນບົດຄວາມເຫັນຕອນນຶ່ງທີ່ລົງພິມໃນໜັງສືພິມ Washington Post ນັ້ນ ທ່ານ Zardari ໄດ້ເວົ້າເຖິງເລື້ອງການຕໍາໜິຕິຕຽນທີ່ສະເໜີແນະວ່າ ປາກີສຖານບໍ່ໄດ້ຕາມລ່າພວກກໍ່ການຮ້າຍຢ່າງແຂງຂັນນັ້ນ ແລະກ່າວວ່າ ປະເທດຂອງທ່ານ ບາງທີອາດເປັນປະເທດທີ່ໄດ້ຮັບຄວາມເສຍຫາຍຫລາຍທີ່ສຸດຈາກພວກກໍ່ການຮ້າຍນັ້ນ.
ທ່ານ Zardari ກ່າວວ່າ ປາກີສຖານມີຄວາມພໍອົກພໍໃຈນໍາການໄດ້ຊ່ອຍຊີ້ໂຕຜູ້ສົ່ງເອກກະສານຂອງ al-Qaida ທີ່ບັນດາເຈົ້າໜ້າທີ່ສະ ຫະລັດກ່າວວ່າ ໄດ້ຊ່ອຍນໍາພາພວກເຂົາເຈົ້າໄປຫານາຍບິນລາເດັນ ນັ້ນ.
ທ່ານ Zardari ກ່າວເຊ່ນກັນວ່າ ຫລັງຈາກການເສຍຊີວິດຂອງນາຍ ບິນລາເດັນແລ້ວ ສົງຄາມຕໍ່ຕ້ານພວກທີ່ແນເປົ້າໝາຍໃສ່ພວກຜູ້ຄົນທີ່ບໍ່ມີຄວາມຜິດຫຍັງນັ້ນ ກໍຍັງບໍ່ທັນໄດ້ຊະນະເທື່ອ ແຕ່ການເລີ້ມຕົ້ນຂອງຈຸດອະວະສານ ແມ່ນກໍາລັງຈະເຫັນ.
ທີ່ປາກີສຖານ ບ່ອນທີ່ພວກກໍາລັງຂອງສະຫະລັດພົບເຫັນແລະສັງຫານຜູ້ກໍ່ການຮ້າຍທີ່ີໂລກຕ້ອງການໂຕເປັນທີ່ສຸດນັ້ນ ຂ່າວກ່ຽວກັບເລື້ອງນີ້ ໄດ້ເຮັດໃຫ້ພວກຊາວປາກີສຖານຫລາຍຄົນຕື່ນຕົກໃຈ ແລະລັດຖະບານກໍໄດ້ຊັກຊ້າໃນການອອກຄວາມຄິດຄວາມເຫັນ.
