ປະຊາຊົນປາກິສຖານນອນຕື່ນຂຶ້ນມາ ເຊົ້າວັນຈັນມື້ນີ້
ພ້ອມກັບໄດ້ຍິນຂ່າວ ນາຍ Osama bin Laden ຜູ້ນໍາ
ເຄືອຂ່າຍ al-Qaida ໄດ້ຖືກຂ້າຕາຍໃນການຍິງຕໍ່ສູ້ກັນ
ກັບກໍາລັງຂອງສະຫະລັດໃນເຂດເມືອງ Abbottabad ທາງກໍ້າເໜືອຂອງນະຄອນຫລວງອີສລາມາບັດ.
ໂທລະພາບຊ່ອງ Express 24/7 ພາກພາສາອັງກິດຂອງປາກີສຖານ ກ່າວວ່າ ພັນລະຍາ 2 ຄົນແລະລູກເຕົ້າ 6 ຄົນຂອງນາຍ bin Laden ໄດ້ຖືກກໍາລັງຂອງສະຫະລັດຈັບໂຕໄວ້. ສະຖານີດັ່ງກ່າວລາຍງານອີກວ່າ ລູກນ້ອງ 4 ຄົນຂອງຜູ້ນໍາກໍ່ການຮ້າຍ ກໍໄດ້ຖືກຈັບໂຕໄດ້ເຊ່ນກັນ. ໂທລະພາບ Express 24/7 ກ່າວວ່າ ຄຸ້ມທີ່ເກີດການຕໍ່ສູ້ກັນນັ້ນໄດ້ຖືກປິດລ້ອມໄວ້ ແລະໄດ້ມີການເຕືອນປະຊາຊົນໃນຄຸ້ມໃຫ້ຢູ່ໃນບ້ານເຮືອນຂອງເຂົາເຈົ້າ.
ການເສຍຊີວິດຂອງນາຍ Bin Laden ແມ່ນມີຂຶ້ນໃນເວລາເກືອບ 10 ປີ ຫລັງຈາກພວກກໍ່ການຮ້າຍທໍາການໂຈມຕີສະຫະລັດ ໃນວັນທີ 11 ເດືອນກັນຍາ ປີ 2001 ນັ້ນ.
