ໄດ້ເກີດເຫດລະເບີດໃນຂົງເຂດຕາເວັນຕົກສຽງເໜືອ ຂອງປາກິສຖານ ທີ່ສັງຫານຫົກຄົນ ໃນວັນອາທິດມື້ນີ້ ພຽງບໍ່ເທົ່າໃດຊົ່ວໂມງຫລັງຈາກປາກີສຖານເວົ້າວ່າ ຜູ້ນໍາຄົນນຶ່ງຂອງພວກ ກໍ່ການຮ້າຍທີ່ຕ້ອງການຕົວຫລາຍທີ່ສຸດຂອງປະເທດໄດ້ຖືກຂ້າຕາຍ ໃນການໂຈມຕີທີ່ສົງໃສ ວ່າໂດຍຍົນບໍ່ມີຄົນຂັບ ຫລື Drone ຂອງສະຫະລັດນັ້ນ.
ຕໍາຫລວດກ່າວວ່າ ເຫດລະເບີດເກີດຂຶ້ນທີ່ປ້າຍຈອດລົດເມແຫ່ງນຶ່ງໃນມື້ນີ້ທີ່ເມືອງ Matani ຊຶ່ງເປັນເມືອງນ້ອຍຢູ່ໃກ້ໆເມືອງ Peshawar ຍັງຜົນໃຫ້ມີຜູ້ບາດເຈັບອີກຢ່າງໜ້ອຍ 10 ຄົນ
ເມື່ອວັນເສົາວານນີ້ ແຫລ່ງສືບລັບຂອງປາກີສຖານກ່າວວ່າ ນາຍ Ilyas Kashmiri ຜູ້ນໍາ ອາວຸໂສກຸ່ມອາລ-ຄາອີດາ ໄດ້ເສຍຊີວິດ ພ້ອມກັບພວກຫົວຮຸນແຮງອີກ 8 ຄົນ ໃນການ ໂຈມຕີບັ້ນນຶ່ງຕໍ່ສະຖານທີ່ແຫ່ງນຶ່ງໃນເຂດ Waziristan ໃຕ້.
ກຸ່ມຫົວຮຸນແຮງ Harakat-ul-Jihad al-Islami ຫລື HUJI ຂອງນາຍ Kashmiri ເອັງ ໄດ້ຢືນຢັນການຕາຍຂອງຜູ້ກ່ຽວ ທາງໂທລະສານ ຫລື ແຟ໊ກ ທີ່ສົ່ງໄປໃຫ້ອົງການຂ່າວຕ່າງໆ ໂດຍກ່າວວ່າ ນາຍ Kishmiri ໄດ້ ສະລະຊີບເພື່ອຄວາມເຊື່ອຖືແລະສາສະໜາຂອງເຂົາ ເມື່ອວັນສຸກຜ່ານມາ.
ສະຫະລັດໄດ້ບົ່ງຕົວນາຍ Kashmiri ວ່າເປັນຜູ້ຖືກໝາຍຕົວໃຫ້ເປັນນັກກໍ່ການຮ້າຍພິເສດ ຂອງໂລກ ແລະສະເໜີໃຫ້ລາງວັນ 5 ລ້ານໂດລາ ແກ່ຜູ້ທີ່ໃຫ້ຂໍ້ມູນທີ່ສາມາດນໍາໄປສູ່ການ ຈັບກຸມຕົວຜູ້ກ່ຽວໄດ້.
ພວກເຈົ້າໜ້າທີ່ສືບລັບ ໄດ້ຖືວ່ານາຍ Kashmiri ນີ້ເປັນບຸກຄົນທີ່ອັນຕະລາຍທີ່ສຸດຄົນນຶ່ງ ແລະຜູ້ທີ່ໄດ້ຮັບການເຝິກອົບລົມເລື້ອງການປະຕິບັດການກໍ່ການຮ້າຍທີ່ຊໍານານທີ່ສຸດ ພວກ ເຈົ້າ ໜ້າທີ່ປາກີສຖານໄດ້ສົງໃສວ່າ ນາຍ Kashmiri ເປັນຜູ້ບົ່ງການການໂຈມຕີຕໍ່ຖານທັບ ເຮືອແຫ່ງນຶ່ງໃນເມືອງ Karachi ທີ່ມີພວກຫົວຮຸນແຮງຫລາຍຄົນໄດ້ຕ້ານຢັນກໍາລັງທະຫານ ຂອງປາກີສຖານໄວ້ເປັນເວລາປະມານ 17 ຊົ່ວໂມງ.
