ຜູ້ແທນຂອງພວກກະບົດຕາລີບານໃນອັຟການິສຖານຈຸນຶ່ງ ໄດ້ເດີນທາງຈາກກາຕ້າໄປ ຍັງປາກິສຖານ ເພື່ອເຈລະຈາກັບພວກເຈົ້າໜ້າທີ່ ກ່ຽວກັບຫຼາຍໆບັນຫາ ຮວມທັງການ ຈັບກຸມພວກຜູ້ນຳກະບົດບາງຄົນ ການປິດບ່ອນຝຶກແອບທາງດ້ານສາສະໜາຈຳນວນນຶ່ງໃຫ້ແກ່ພວກອົບພະຍົບອັຟການິສຖານ ແລະບັນຫາຕ່າງໆທີ່ພວມປະເຊີນໜ້າກັບປະຊາຄົມອົບພະຍົບຢູ່ໃນປະເທດເພື່ອນບ້ານ.
ເຈົ້າໜ້າທີ່ອະວຸໂສຄົນນຶ່ງ ຂອງກຸ່ມຕາລີບານ ທີ່ຂໍສະຫງວນຊື່ ກ່າວຕໍ່ວີໂອເອວ່າ ຄະນະ ຜູ້ແທນ 3 ຄົນໄດ້ຖືກສົ່ງໄປນະຄອນອິສລາມາບັດ ຈາກສຳນັກງານໃຫຍ່ ທາງດ້ານການເມືອງຂອງຕົນທີ່ນະຄອນຫຼວງໂດຮ້າ ປະເທດກາຕ້າເພື່ອສະແດງຄວາມວິຕົກກັງວົນແລະ ຊອກຫາຂໍ້ມູນກ່ຽວກັບວ່າ ແມ່ນຫຍັງທີ່ພາໃຫ້ມີການຈັບກຸມສະມາຊິກຂອງກຸ່ມຕາລີບານ ທີ່ນັ້ນ.
ໂຄສົກຄົນສຳຄັນຂອງກຸ່ມຕາລີບານ ທ່ານ Zabihullah Mujahid ໃນຂະນະທີ່ໃຫ້ການຢືນຢັນຕໍ່ວີໂອເອ ກ່ຽວກັບການເດີນທາງໄປເຖິງ ຂອງຄະນະຜູ້ແທນຕາລີບານ ຢູ່ປາກິສ ຖານກ່າວວ່າ ຕົນໄດ້ທຳການພົວພັນເປັນປະຈຳ ກັບປະເທດຕ່າງໆ ທີ່ອັຟການິສຖານມີຄວາມສຳພັນທາງດ້ານການທູດນຳ.
ທ່ານ Mujahid ຢືນຢັດວ່າ “ພວກຜູ້ແທນຈາກກາຕ້າ ເດີນທາງໄປປາກິສຖານ ເພື່ອໂອ້ ລົມກັບພວກເຈົ້າໜ້າທີ່ຢູ່ທີ່ນັ້ນກ່ຽວກັບບັນຫາຕ່າງໆທີ່ພວມປະເຊີນໜ້າກັບພວກອົບພະ ຍົບອັຟການິສຖານ ການຈັບກຸມ ການຂັບໄລ່ອອກຈາກບ່ອນຢູ່ ແລະການຜັກດັນໃຫ້ກັບຄືນປະເທດ.” ທ່ານກ່າວວ່າ ບໍ່ມີການຫາລືໃດໆ ກ່ຽວກັບບັນຫາທາງດ້ານການເມືອງ ຫຼື ການເຈລະຈາສັນຕິພາບ ກັບລັດຖະບານອັຟການິສຖານ.
ໂຄສົກໄດ້ປະຕິເສດວ່າ ບໍ່ເປັນຄວາມຈິງ ຕໍ່ລາຍງານຂ່າວທີ່ວ່າ ການຢ້ຽມຢາມໃນຄັ້ງນີ້ ແມ່ນເພື່ອແຈ້ງໃຫ້ເຈົ້າໜ້າທີ່ປາກິສຖານຊາບກ່ຽວກັບການປະຊຸມລັບເມື່ອໄວໆມານີ້ລະ ຫວ່າງພວກຕາລີບານແລະເຈົ້າໜ້າທີ່ອັຟການິສຖານທີ່ນະຄອນໂດຮ້າ.
ຄະນະຜູ້ແທນຕາລີບານແມ່ນປະກອບດ້ວຍ ອະດີດລັດຖະມົນຕີທີ່ຖືກໂຄ່ນລົ້ມ 2 ທ່ານຂອງລັດຖະບານຕາລີບານ ຄື Muallah Jan Muhammad Madani ແລະ Mullah Abdul Salam ພ້ອມກັບອະດີດເອກອັກຄະລັດຖະທູດປະຈຳປາກິສຖານ ທ່ານ Maulvi Shahabudding Dilawar. ບຸກຄົນທັງສາມແມ່ນພິຈາລະຈາກັນວ່າ ເປັນຜູ້ມີອິດທິພົນ ແລະເປັນທີ່ໄດ້ຮັບການເຄົາລົບພາຍໃນກຸ່ມກະບົດດັ່ງກ່າວ.
ເຈົ້າໜ້າທີ່ປາກິສຖານຍັງບໍ່ທັນໃຫ້ຄວາມເຫັນໃດໆກ່ຽວກັບການຢ້ຽມຢາມຄັ້ງນີ້.
