ໄດ້ມີຝົນຕົກລົງມາໃໝ່ໆອີກ ໃນປາກິສຖານທີ່ກໍາລັງປະສົບ
ກັບໄພນໍ້າຖ້ວມຢູ່ແລ້ວນັ້ນ ໃນວັນອາທິດມື້ນີ້ ຊຶ່ງກີດຂວາງ ຕໍ່ຄວາມພະຍາຍາມໃນການຊ່ອຍບັນເທົາທຸກ ແລະເພີ່ມ ຄວາມຮ້າຍແຮງໃຫ້ແກ່ໄພນໍ້າຖ້ວມດັ່ງ ກ່າວ ທີ່ສົ່ງຜົນກະ ທົບຕໍ່ປະຊາຊົນ ປະມານ 13 ລ້ານຄົນແລ້ວ ແລະເປັນໄພນໍ້າຖ້ວມຄັ້ງຮ້າຍແຮງທີ່ສຸດ ໃນຮອບຫລາຍທົດສະວັດຜ່ານມາ.
ເຈົ້າໜ້າທີ່ປາກິສຖານກ່າວວ່າ ນໍ້າຖ້ວມທີ່ໄດ້ປະທະພາກຕາເວັນຕົກສຽງເໜືອຂອງປະເທດ ມາບັດນີ້ ກໍາລັງລາມໄປຍັງພາກໃຕ້ເລາະຕາມແມ່ນໍ້າ Indus ໄປຍັງແຂວງ Sindh. ບັນດາເຈົ້າໜ້າທີ່ກ່າວວ່າ ໄພນໍ້າຖ້ວມໄດ້ເອົາຊີວິດປະຊາ ຊົນໄປແລ້ວ ຢ່າງນ້ອຍ 1600 ຄົນ.
ປະຊາຊົນຫລາຍໝື່ນຄົນໃນແຂວງ Sindh ກໍາລັງພາກັນອົບພະຍົບໜີ ຈາກໄພນໍ້າຖ້ວມ
ແຕ່ມີບາງຄົນພາກັນບໍ່ຍອມອົບພະຍົບໝີ ໂດຍຢ້ານວ່າຊັບສິນເຄື່ອງຂອງຂອງເຂົາເຈົ້າຈະ
ຖືກລັກຂະໂມຍໄປ. ທາງການປາກິສຖານໄດ້ພະຍາຍາມຢ່າງຂຸ້ນຂ້ຽວເພື່ອຊ່ອຍພວກອົບ
ພະຍົບ. ຝົນຕົກໜັກໄດ້ເຮັດໃຫ້ເຮືອບິນເຮລີຄອບເຕີບາງລໍາ ທີ່ພົວພັນນໍາການຊ່ອຍບັນ
ເທົາທຸກນັ້ນ ຂຶ້ນບິນບໍ່ໄດ້.
ນາຍົກລັດຖະມຸນຕີປາກິສຖານ ທ່ານ Yusuf Raza Gilani ໄດ້ຮ້ອງ ຂໍການຊ່ອຍເຫລືອ
ຕື່ມອີກຈາກນາໆຊາດ ຊຶ່ງທ່ານກ່າວວ່າ ວິກິດການນີ້ໄດ້ຜັນຂະຫຍາຍກວ້າງອອກໄປເກີນ
ຄວາມສາມາດຂອງລັດຖະບານທີ່ຈະຮັບມືຕາມລໍາພັງໄດ້.
