ລິ້ງ ສຳຫລັບເຂົ້າຫາ

ຝົນຈະຕົກໜັກຢູ່ຕໍ່ໄປ ໃນປາກິສຖານ

  • ສິງ ບູຣົມມະວົງ

ນັກ​ອຸຕຸນິຍົມ​ວິທະຍາ​ໃນ​ປາ​ກິ​ສຖານ ທໍານາຍ​ວ່າ​ຝົນ​ຈະ​ຕົກ​
ໜັກ​ຕື່ມອີກ​ຕໍ່​ໄປ​ໃນ​ປະ​ເທດ​ທ່ີ​ປະ​ເຊີນ​ກັບ​ໄພ​ນໍ້າ​ຖ້ວມ​ທີ່​
ສ້າງ​ຄວາມ​ເສຍ​ຫາຍຢ່າງ​ໜັກ​ຢູ່​ແລ້ວນັ້ນ. ບັນດາ​ເຈົ້າ​ໜ້າ​ທີ່
ປາ​ກິ​ສຖານ​ກ່າວ​ວ່າ ຢ່າງ​ນ້ອຍປະຊາຊົນ 13 ລ້ານ​ຄົນ​ໄດ້​
ຮັບຜົນ​ກະທົບ​ຈາກ​ໄພ​ນໍ້າ​ຖ້ວມ​ທີ່​ໄດ້​ສ້າງຄວາມ​ເສຍ​ຫາຍ​
ຢ່າງ​ໜັກ ໃນ​ພາກ​ຕາ​ເວັນ​ຕົກ​ສຽງ​ເໜືອ​ ແລະ​ເວລາ​ນີ້ນໍ້າ ​
ຖ້ວມ​ກໍາລັງ​ທໍາ​ການກວດ​ລ້າງ​ໄປ​ສູ່​ພາກ​ຕາ​ເວັນ​ຕົກ​ສຽງ​ໃຕ້
ທີ່​ໄດ້​ບັງຄັບ​ໃຫ້ປະຊາ​ຊົນ​ຫລາຍ​ພັນ​ຄົນ​ຕ້ອງ​ອົບ​ພະຍົບໜີ ​ຈາກ​ບ້ານ​ເຮືອນ​ຂອງ​ເຂົາ​ເຈົ້າ.


ທ່ານ Nadim Ahmed ປະທານ​ອົງການ​ບໍລິຫານ​ໄພ​ຫາຍຍະນະແຫ່ງຊາດ​ກ່າວ​ໃນ​ວັນ​ສຸກ
ວານ​ນີ້​ວ່າ ບ້ານ​ເຮືອນ​ຈໍານວນ​ປະມານ 650 ພັນຫລັງ​ໄດ້​ຖືກ​ທໍາລາຍ​ໃນ​ແຂວງ Khyber-
Pakhtunkhwaໃນ​ພາກ​ຕາເວັນ​ຕົກ​ສຽງ​ເໜືອ​ແລະ​ແຂວງ​ປັນ​ຈາບ​ໃນ​ພາກ​ກາງຂອງ​ປະ​ເທດ.
ທາງ​ການ​ປາ​ກິ​ສຖານ​ໄດ້​ອົບ​ພະຍົບປະຊາຊົນ​ຈໍານວນ​ຫລາຍ​ກວ່າ5 ​ແສນ​ຄົນ​ແລ້ວ​ອອກ​ຈາກ
ບ້ານ​ເຮືອນ​ຂອງ​ເຂົາ​ເຈົ້າ​ໄປ​ໃນ​ແຂວງ Sindh ​ໃນ​ພາກ​ໃຕ້​ຂອງ​ປະ​ເທດ.

ນໍ້າ​ຖ້ວມໜັກ​ທີ່​ເປັນມາເປັນເວລາ​ເກືອບ 2 ສັບປະດາ​ແລ້ວ ​ໄດ້​ເຮັດ​ໃຫ້ປະຊາຊົນ​ຈໍານວນ​
ຫລາຍ​ກວ່າ1600 ຄົນເສຍ​ຊີວິດ​ໄປ. ນໍ້າ​ຖ້ວມ​ໄດ້ພັດ​ເອົາ​ບ້ານ​ເຮືອນຫລາຍ​ຫລັງ ທໍາລາຍ ​
ຖະໜົນ​ຫົນທາງຫລາຍ​ສາຍແລະ​ຂົວ​ຫລາຍ​ແຫ່ງ​ ພ້ອມ​ທັງ​ຕັດ​ການ​ຕິດ​ຕໍ່​ພົວພັນລະຫວ່າງ​
ປະຊາ​ຄົມ​ຕ່າງໆ​ທັງ​ໝົດ​ໃນຂົງ​ເຂດ. ປະຊາຊົນ​ປາ​ກິ​ສ​ຖານ​ຫລາຍ​ຄົນ​ພາກັນຕໍາ​ໜິ ຕິຕຽນ​
ໃນ​ອັນ​ທີ່ເຂົາ​ເຈົ້າ​ເອີ້ນ​ວ່າ ການ​ຮັບ​ມື​ກັບ​ວິ​ກິດ​ການ​ຢ່າງ​ຊັກຊ້າຂອງ​ລັດຖະບານ ​ຕະຫລອດ ​
ທັງ​ການ​ຕັດສິນໃຈ​ຂອງ​ປະທານາທິບໍດີ Asif Ali Zardari ທີ່​ເດີນທາງ​ໄປຢ້ຽມຢາມ​ຢູ​ໂຣບ
ໃນ​ລະຫວ່າງ​ທີ່ປະ​ເທດ​ ປະ​ເຊີນ​ກັບ​ໄພນໍ້າ​ຖ້ວມ​ຢູ່​ນີ້.

XS
SM
MD
LG