ຕໍາຫລວດປາກິສຖານ ກ່າວວ່າ ຄວາມວຸ້ນວາຍໄດ້ລະເບີດຂຶ້ນອີກໃນຄືນວານນີ້ ເປັນຄືນທີສອງລຽນຕິດໃນເມືອງທ່າກຳປັ່ນ ກາຣາຈີ ໃນພາກໃຕ້ຂອງປາກິສຖານ ຊຶ່ງເຮັດໃຫ້ປະຊາຊົນເສຍຊີວິດໄປຢ່າງນ້ອຍ 12 ຄົນ.
ພວກປະທ້ວງໄດ້ພາກັນຈູດລົດລາແລະຮ້ານຄ້າຮ້ານຂາຍອີກເທື່ອໃໝ່ ພ້ອມທັງຍິງປະຊາຊົນເສຍຊີວິດໄປຫລາຍຄົນ ຊຶ່ງເຮັດຈໍານວນຜູ້ເສຍຊີວິດ ເພິ່ມຂຶ້ນເປັນຢ່າງນ້ອຍ 62 ຄົນແລ້ວ ໃນລະຫວ່າງເກີດຄວາມວຸ້ນວາຍມາເປັນເວລາ 2 ມື້.
ຄວາມຮຸາແຮງດັ່ງກ່າວໄດ້ຖືກກະຕຸ້ນຂຶ້ນ ຫລັງຈາກການລອບສັງຫານທ່ານ Raza Haider ສະມາຊິກສະພາປະຈໍາແຂວງ ຊຶ່ງເປັນສະມາຊິກຂອງຂະບວນການ Muttahida Quami ໃນວັນຈັນຜ່ານມານີ້.
ບັນດາເຈົ້າໜ້າທີ່ປາກິສຖານ ໄດ້ຖິ້ມໂທດການລອບສັງຫານທ່ານ Haider ໃສ່ພວກນັກຕໍ່ສູ້ຫົວຮຸນແຮງທີ່ພົວພັນກັບກຸ່ມຕາລີບັນນັ້ນ.
ໄດ້ມີການຈັບກຸມຜູ້ຄົນຫລາຍກວ່າ 20 ຄົນທ່ີມີສ່ວນພົວພັນກັບການກໍ່ຄວາມວຸ້ນວາຍ ທີ່ຕິດຕາມມາຫລັງຈາກການລອບສັງຫານນັ້ນ.
