ຕໍາຫລວປາກີສຖານກໍາລັງທໍາການຊອກຄົ້ນຢູ່ໃນແຂວງ Baluchistanໃນພາກຕາເວັນຕົກສຽງໃຕ້ຂອງປະເທດ ໃນຄວາມຫວັງທີ່ຈະພົບເຫັນນັກທ່ອງທ່ຽວຈາກ Switzerland ຄູ່ນຶ່ງທີ່ຖືກມືປືນຈີ້ລັກພາໂຕໄປນັ້ນ.
ບັນດາເຈົ້າໜ້າທີ່ປາກີສຖານກ່າວໃນວັນເສົາວານນີ້ວ່າ ພວກຕົນໄດ້ຕິດຕໍ່ໄປຍັງພວກຊົນເຜົ່າອາວຸໂສຢູ່ໃນຂົງເຂດ ເພື່ອພະຍາຍາມຂໍຄວາມ ຊ່ອຍເຫລືອຈາກເຂົາເຈົ້າ.
ນັກທ່ອງທ່ຽວຈາກ Switzerland ທີ່ເປັນຊາຍຍິງຄູ່ນຶ່ງ ໄດ້ເດີນທາງທ່ອງທ່ຽວຢູ່ໃນຂົງເຂດດັ່ງກ່າວໂດຍທາງລົດ. ບັນດາເຈົ້າໜ້າທີ່ປາກີສ ຖານກ່າວວ່າ ພວກນັກທ່ອງທ່ຽວຄູ່ນີ້ໄດ້ໄປລົງທະບຽນທີ່ດ່ານກວດກາແຫ່ງນຶ່ງ ກ່ອນພວກເຂົາເຈົ້າເຂົ້າໄປໃນເມືອງ Lorali ຂອງແຂວງ Baluchistan ບ່ອນທີ່ພວກເຫັນເຫດການກ່າວວ່າ ທັງສອງຄົນຖືກ ລັກພາໂຕໄປໃນວັນສຸກຜ່ານມານີ້.
ກະຊວງການຕ່າງປະເທດ Switzerland ຢືນຢັນຕໍ່ອົງການຂ່າວ APໃນວັນເສົາວານນີ້ວ່າ ພົນລະເມືອງຂອງຕົນ 2 ຄົນໄດ້ຖືກລັກຈັບໂຕໄປແລະເວົ້າວ່າ ເປັນເຫດການໃນທໍານອງນີ້ເທື່ອທໍາອິດ ທີ່ພົວພັບກັບຄົນ Swiss ໃນປາກີສຖານ.
ບັນດາເຈົ້າໜ້າທີ່ປາກີສຖານກ່າວວ່າ ເຂົາເຈົ້າເຊື່ອວ່າ ຊາຍຍິງຄູ່ນີ້ອາດ ກໍາລັງເດີນທາງມຸ້ງໜ້າໄປສູ່ Quetta ເມືອງຫລວງຂອງແຂວງ Baluchistan ກໍເປັນໄດ້ ເວລາຖືກລັກພາໂຕໄປນັ້ນ.
ແຂວງ Baluchistan ໄດ້ເປັນທີ່ໝັ້ນຂອງພວກກະບົດຫົວແບ່ງແຍກ ດິນແດນໃນລະດັບຕໍ່າແລະກຸ່ມແກ໊ງອາຊະຍາກໍາ ທີ່ຜູ້ຄົນຮູ້ຈັກກັນວ່າ ເປັນພວກທີ່ທໍາການລັກພາໂຕຊາວຕ່າງດ້າວເພື່ອຮຽກເອົາຄ່າໄຖ່ນັ້ນ.
