ທ່ານພັນກິມູນ ເລຂາທິການໃຫຍ່ສະຫະປະຊາຊາດເດີນທາງໄປຮອດປາກິສຖານ ທີ່ປະເຊີນກັບຄວາມເສຍຫາຍຢ່າງໜັກຈາກໄພນໍ້າຖ້ວມນັ້ນ. ຫລັງຈາກເດີນທາງໄປຮອດກຸງອິສລາມະ ບັດໄດ້ບໍ່ດົນ ໃນວັນອາທິດມື້ນີ້ ທ່ານພັນກິມູນ ກ່າວວ່າ ທ່ານກໍາລັງ ຮຽກຮ້ອງໃຫ້ປະຊາຄົມໂລກ ເລັ່ງລັດມອບການຊ່ອຍເຫລືອ ໃຫ້ແກ່ປະຊາຊົນປາກິສຖານນັ້ນ.
ສະຫະປະຊາຊາດກ່າວວ່າ ຕົນໄດ້ຮັບການຊ່ອຍເຫລືອ 20 ເປີເຊັນຂອງເງິນຈໍານວນ 460 ລ້ານດອນລ້າ ທີ່ທ່ານພັນກີມູນໄດ້ຮ້ອງຂໍໄປ ສໍາລັບການຊ່ອຍເຫລືອສຸກເສີນນັ້ນ. ທ່ານພັນກິມູນ ມີໝາຍກໍານົດທີ່ຈະທໍາການພົບປະກັບຄະນະນໍາພາຂອງປາກິສຖານ ແລະທ່ຽວເບິ່ງບັນດາຂົງເຂດ ທີ່ໄດ້ຮັບຄວາມເສຍຫາຍໜັກ ຈາກໄພນໍ້າຖ້ວມຄັ້ງນີ້.
ທ່ານ Yousuf Reza Gilani ນາຍົກລັດຖະມຸນຕີປາກິສຖານ ກ່າວວ່າ ໄພນໍ້າຖ້ວມທີ່ ເກີດຈາກຝົນຕົກໜັກໃນລະດູລົມມອນຊູນ ໄດ້ສົ່ງຜົນກະທົບຕໍ່ປະຊາຊົນ 20 ລ້ານຄົນ. ພວກພະນັກງານຊ່ອຍບັນເທົາທຸກ ກ່າວວ່າ ປະຊາຊົນຈໍານວນ 6 ລ້ານຄົນຕ້ອງການການຊ່ອຍເຫລືອດ້ານມະນຸດສະທໍາ.
ບັນດາເຈົ້າໜ້າທີ່ສະຫະປະຊາຊາດໄດ້ຢືນຢັນກ່ຽວກັບການເກີດໂຣກ ທ້ອງຂີ້ຮາກລາຍ ທໍາອິດໃນເຂດ Mingora ໃນເມືອງ Swat ໃນພາກຕາເວັນຕົກສຽງເໜືອຂອງປະເທດ. ມີການສົງໄສກັນວ່າ ມີອີກຫລາຍລາຍທີ່ເປັນໂຣກທ້ອງຂີ້ຮາກນີ້. ວັນເສົາວານນີ້ ລັດຖະບານໄດ້ລົບລ້າງການ ສະເຫລີມສະຫລອງວັນເອກະລາດຂອງປະເທດ ໃນທົ່ວປາກິສຖານ ບ່ອນທີ່ທາງການກ່າວວ່າ ໄພນໍ້າຖ້ວມໄດ້ເອົາຊີວິດຜູ້ຄົນໄປແລ້ວ 1,600 ຄົນ.
