ຊາວອິສລາມ ຫລາຍສິບພັນຄົນໄດ້ທໍາການປະທ້ວງຢູ່ເມືອງ Lahore ທາງຕາເວັນອອກ
ສຽງເໜືອຂອງປາກີສຖານ ໃນວັນອາທິດວານນີ້ ເພື່ອສະແດງການສະໜັບສະໜຸນພວກ
ກອງທັບ ແລະປະນາມສະຫະລັດ.
ຝູງຄົນປະມານ 30 ພັນຄົນ ໄດ້ຮຽກຮ້ອງໃຫ້ລັດຖະບານນະຄອນອິສລາມາບັດຕັດສາຍ
ສໍາພັນກັບນະຄອນວໍຊິງຕັນ ພາຍຫລັງມີການໂຈມຕີທາງອາ ກາດ ຂ້າມຊາຍແດນຂອງ
ເນໂຕ້ ໃນທ້າຍເດືອນແລ້ວນີ້ ທີ່ໄດ້ເຮັດໃຫ້ທະຫານປາກີສຖານເສຍຊີວິດ 24 ຄົນນັ້ນ.
ເຈົ້າໜ້າທີ່ສະຫະລັດສະແດງຄວາມເສຍໃຈຕໍ່ການເສຍຊິວິດຂອງພວກທະຫານດັ່ງກ່າວຢູ່
ໃນສອງຄ້າຍ ຢູ່ຕາມຊາຍແດນຂອງປາກີສຖານ ແລະອັຟການີສຖານ ແລະໄດ້ໃຫ້ຄໍາໝັ້ນ
ສັນຍາວ່າ ຈະທໍາການສືບສວນ ສອບສວນເຫດ ການດັ່ງກ່າວນີ້ຢູ່. ແຕ່ຢ່າງໃດກໍຕາມ
ການກະທໍາດັ່ງກ່າວສາມາດລະງັບຄວາມໂກດແຄ້ນ ຢູ່ໃນກອງທັບປາກີສຖານໄດ້ໜ້ອຍ
ດຽວເທົ່ານັ້ນ ໂດຍໄດ້ຖືວ່າ ການໂຈມຕີນັ້ນ ແມ່ນມີ “ເຈດຕະນາ”.
ປະທານາທິບໍດີປາກີສຖານທ່ານ Asif Ali Zardari ໄດ້ກັບຄືນມາປະເທດ ໃນເຊົ້າວັນຈັນ
ມື້ນີ້ ພາຍຫລັງໄດ້ເດີນທາງໄປປິ່ນປົວສຸຂະພາບຢູ່ດູບາຍ ເປັນເວລາເກືອບ 2 ອາທິດ.
ທ່ານ Mansoor Wasan, ຫົວໜ້າກະຊວງພາຍໃນປະຈໍາແຂວງ ຊິນ ເວົ້າວ່າ ເຮືອບິນ
ຂອງທ່ານ Zardari ຈອດທີ່ສະໜາມ ບິນທະຫານແຫ່ງນຶ່ງ ທີ່ເມືອງກາຣາຈີ ຊຶ່ງເປັນເມືອງ
ທ່າເຮືອຢູ່ທາງພາກໃຕ້ຂອງປາກີສຖານ.
ການເດີນທາງຂອງປະທານາທິບໍດີ Zardari ໄດ້ພາໃຫ້ເກີດມີຂ່າວຊ່າລືກັນ ວ່າທ່ານຈະ
ລົງຈາກອໍານາດ ຍ້ອນວ່າໄດ້ສົ່ງໜັງສືລັບ ໄປຫານະຄອນວໍຊິງຕັນເພື່ອຂໍຄວາມຊ່ວຍເຫລືອ
ຈາກສະຫະລັດ ຍ້ອນຢ້ານວ່າຈະເກີດລັດຖະປະຫານ. ໜັງສືດັ່ງກ່າວໄດ້ບັງຄັບໃຫ້ເອກອັກ
ຄະລັດຖະທູດປາກີສຖານປະຈໍາສະຫະລັດຕ້ອງໄດ້ລາອອກຈາກໜ້າທີ່.
