ຊາວປາກີສຖານທໍາພິທີສົ່ງສະການ ໃນວັນອາທິດມື້ນີ້ ສໍາລັບພວກທະຫານ 24 ຄົນທີ່ເສຍ
ຊີວິດເມື່ອວັນເສົາວານນີ້ ໃນການໂຈມຕີຂ້າມຊາຍແດນຂອງເນໂຕ້ ຈາກອັຟການິສຖານ.
ແລະໃນວັນອາທິດມື້ນີ້ ຫົວໜ້າອົງກ່ນເນໂຕ້ ທ່ານ Anders Fogh Rasmussen ໄດ້
ສະແດງຄວາມເສຍໃຈແລະສົ້າສະລັດໃຈ ຕໍ່ນາຍົກລັດຖະມົນຕີປາກິສຖານ ທ່ານ Yousuf
Raza Gilani ນໍາການເສຍຊີວິດທີ່ເກີດຂຶ້ນໂດຍບໍ່ຕັ້ງໃຈນັ້ນ.
ໃນຕອນເຊົ້າວັນອາທິດມື້ນີ້ ລັດຖະມົນຕີຕ່າງປະເທດປາກີສຖານໄດ້ບອກຄູ່ຕໍາແໜ່ງຂອງ
ທ່ານນາງຈາກສະຫະລັດ ວ່າການໂຈມຕີທາງອາກາດຕໍ່ຄ້າຍທະຫານຫລາຍແຫ່ງ ທີ່ຍັງຜົນ
ໃຫ້ທະຫານປາກີສຖານເສຍຊີວິດຢ່າງໜ້ອຍ 24 ຄົນ ແລະ ບາດເຈັບອີກ 14 ຄົນ ໃນເຂດ
ຕາເວັນຕົກສຽງໃຕ້ຂອງປາກີສຖານນັ້ນວ່າ ເປັນທີ່ຮັບເອົາບໍ່ໄດ້.
ທ່ານນາງ Hina Rabbani Khar ບອກທ່ານນາງຮິລແລຣີ ຄລິນຕັນ ລັດຖະມົນຕີຕ່າງ
ປະເທດສະຫະລັດ ວ່າ ການໂຈມຕີດັ່ງກ່າວສະແດງໃຫ້ ເຫັນເຖິງການບໍ່ເອົາຫົວຊາຕໍ່ຊີວິດ
ຂອງມະນຸດຢ່າງສີ້ນເຊີງ ແລະວ່າ ການໂຈມຕີທາງອາກາດບັ້ນນີ້ໄດ້ສ້າງຄວາມໂກດແຄ້ນ
ຂຶ້ນ ໃນປາກີສຖານ.
ປາກີສຖານກ່າວວ່າ ຕົນໄດ້ຕອບໂຕ້ຄືນໂດບການປິດເສັ້ນທາງລໍາລຽງຂອງເນໂຕ້ທັງໝົດ
ທີ່ແລ່ນຜ່ານອານາເຂດຂອງຕົນໄປຍັງອັຟການີສຖານນັ້ນ ແລະສັ່ງໃຫ້ສະຫະລັດຍ້າຍ
ອອກໄປຈາກຖານທັບອາກາດທີ່ຢູ່ໃນແຂວງ Baluchistan ທາງພາກຕາເວັນຕົກສຽງໃຕ້
ຂອງປະເທດ ພາຍໃນ 15 ວັນ.
ນາຍົກລັດຖະມົນຕີປາກີສຖານ ທ່ານ Yousuf Raza Gilani ແລະນາຍ ທະຫານລະດັບ
ສູງ ແລະພວກຜູ້ນໍາລັດຖະບານ ກ່າວເມື່ອວັນເສົາວານນີ້ວ່າ ລັດຖະບານປາກີສຖານຈະທໍາ
ການກວດສອບທົບທວນຄືນໃໝ່ໝົດ ກ່ຽວກັບ ໂຄງການຕ່າງໆ ກິດຈະກໍາຕ່າງໆ ແລະ
ການຈັດແຈງດ້ານການຮ່ວມມືກັບ ສະຫະລັດ, ເນໂຕ້ ແລະ ISAF ຫລືກໍາລັງປະສົມນາໆ
ຊາດໃນອັຟການິສຖານນັ້ນ. ພວກເຈົ້າໜ້າທີ່ປາກີສຖານໄດ້ຮຽກຮ້ອງໃຫ້ມີການປະຕິບັດ
ການທີ່ເຂັ້ມແຂງແລະຮີບດ່ວນ ຕໍ່ພວກຮັບຜິດຊອບໃນເຫດການເຖິງແກ່ຊີວິດນີ້ໃຫ້ໄດ້.
ສະຫະລັດກ່າວວ່າ ເຂດຊົນເຜົ່າຂອງປາກີສຖານ ເປັນທີ່ຫລົບຊ່ອນຂອງ ພວກຕາລິບານ
ທີ່ໄດ້ສູ້ລົບກັບກໍາລັງທະຫານສະຫະລັດໃນອັຟການິສຖານ ມາໄດ້ສິບປີແລ້ວນັ້ນ.
ທ່ານ ລີອອນ ພາແນດຕາ ລັດຖະມົນຕີປ້ອງກັນປະເທດສະຫະລັດແລະ ທ່ານນາງລັດຖະ
ມົນຕີຕ່າງປະເທດຄລິນຕັນ ໄດ້ອອກຖະແຫລງການຮ່ວມເມື່ອວັນເສົາວານນີ້ ສະແດງ
ຄວາມເສົ້າສະລົດໃຈຢ່າງເລິກເຊິ່ງຕໍ່ເຫດການ ທີ່ເກີດຂຶ້ນໃນເຂດຊາຍແດນຂອງປາກີສຖານ
ນັ້ນ ໂດຍທີ່ທ່ານທັງສອງໄດ້ເນັ້ນຍໍ້າວ່າຈະຜັກດັນໃຫ້ມີການສືບສວນສອບສວນໂດຍເນໂຕ້
ໂດຍທັນທີ່.
