ບັນດານັກເຈລະຈາຈາກ 9 ປະເທດພວມພົບປະກັນຢູ່ທີ່ຫວຽດນາມໃນການລິເລີ້ມກອງປະຊຸມເຈລະຈາການຄ້າເສລີເປັນເວລາ 5 ມື້.
ການເຈລະຈາ ຊຶ່ງໄຂຂຶ້ນໃນນະຄອນໂຫຈິມິນໃນວັນຈັນມື້ນີ້ ມີວັດຖຸປະສົງເພື່ອໃຫ້ບັນລຸຂໍ້ຕົກກັນໃນຂັ້ນກວ້າງຂວາງ ກ່ຽວກັບເງື່ອນໄຂຂອງອັນທີ່ເອີ້ນວ່າ ພາຄີຂ້າມມະຫາສະມຸດປາຊີຟິກ ກ່ອນກອງປະຊຸມສຸດຍອດທີ່ຈະໄຂຂຶ້ນໃນລັດຮາວາຍ ໃນເດືອນພະຈິກປີນີ້.
ພວກປະເທດເຫລົ່ານີ້ໄດ້ຕົກລົງເຫັນພ້ອມກັນແລ້ວ ນໍາການຍຸດຕິການເກັບຄ່າພາສີ ຈາກ 90 ເປີເຊັນຂອງສິນຄ້າຊື້ຂາຍກັນທັງໝົດ ແລະ ພາສີສໍາລັບສ່ວນທີ່ຍັງເຫລືອນັ້ນ ຈະຖືກລົບລ້າງໃຫ້ໝົດໄປພາຍໃນປີ 2015. ເຖິງຢ່າງໃດກໍດີ ຄວາມເຫັນຂັດແຍ້ງກັນກໍຍັງມີຢູ່ໃນຫລາຍໆເລື້ອງ ເຊ່ນເລື້ອງຊັບສິນດ້ານສະຕິປັນຍາແລະການຄຸ້ມຄອງສິດທິແຮງ ງານ ແລະສິ່ງແວດລ້ອມເປັນຕົ້ນ.
ໃນວັນອາທິດວານນີ້ ອົງການຂ່າວ Bernama ຂອງມາເລເຊຍອ້າງຄໍາເວົ້າຂອງທ່ານ Ahmad Husni Hanadziah ລັດຖະມົນຕີການເງິນທີສອງມາເລເຊຍວ່າ ທ່ານຈະສະເໜີເອກະສານເຮັດວຽກສະບັບນຶ່ງ ເພື່ອປົກປ້ອງຄຸ້ມຄອງພວກນັກລົງທຶນທ້ອງຖິ່ນ.
ພວກ 9 ປະເທດທີ່ພວມເຈລະຈາເຮັດສັນຍາ ພາຄີການຄ້າຂ້າມມະຫາສະມຸດປາຊີຟິກ ຫລື TPP ແມ່ນໂຮມທັງປະເທດບຣູໄນ ຊີເລ ນີວຊີແລນ ສິງກະໂປ ອອສເຕຣເລຍ ມາເລເຊຍ ເປຣູ ສະຫະລັດອາເມລິກາ ແລະຫວຽດນາມ.
ຍີ່ປຸ່ນກໍາລັງພິຈາລະນາວ່າຈະເຂົ້າຮ່ວມໃນການເຈລະຈານີ້ຫລືບໍ.
