ເຈົ້າໜ້າທີ່ລັດ Oregon ໄດ້ກ່າວໃນວັນເສົາວານນີ້ວ່າ ມີືປືນທີ່ສັງຫານນັກຮຽນ 9 ຄົນ ແລະ ນາຍຄູຄົນໜຶ່ງທີ່ວິທະຍາໄລຊຸມຊົນ ໄດ້ຂ້າໂຕຕາຍຫຼັງຈາກການຍິງປະທະກັນໃນເວລາສັ້ນໆກັບຕຳຫຼວດ.
ຜູ້ກວດກາທາງການແພດໄດ້ສະໃຫ້ບົດສະຫຼຸບດັ່ງກ່າວຫຼັງຈາກໄດ້ກວດສອບສົບຂອງທ້າວ Christopher Harper Mercer ອາຍຸ 26 ປີ, ທີ່ໄດ້ເສຍຊີວິດພາຍຫຼັງການຍິງຄົນຈຳນວນຫຼາຍ ທີ່ວິທະ ຍາໄລຊຸມຊົນ Umpqua ໃນວັນພະຫັດທີ່ຜ່ານມາ.
ໃນວັນເສົາວານນີ້, ຕຳຫຼວດເມືອງ Douglas ທ່ານ John Hanlin ຍັງໄດ້ກ່າວຕື່ມວ່າ ຕຳຫຼວດໄດ້ຄົ້ນພົບປືນອີກກະບອກໜຶ່ງຂອງມືປືນຄົນນັ້ນ, ເຮັດໃຫ້ຈຳ ນວນຂອງອາວຸດທີ່ຖືກຍຶດໄດ້ກາຍເປັນທັງໝົດ 14 ກະບອກ.
ທ່ານ Hanlin ກ່າວວ່າ ການສືບສວນສອບສວນທີ່ໃຫຍ່ ແລະ ສັບຊ້ອນກຳລັງດຳເນີນຢູ່, ແລະ ຕຳຫຼວດກໍຍັງສຳພາດຜູ້ເຫັນເຫດການຫຼາຍຮ້ອຍຄົນ ແລະ ເພື່ອນບ້ານ, ແລະ ທຳການທົດລອງທາງວິທະຍາສາດ ຊິ້ນສ່ວນຂອງຫຼັກຖານ, ເພື່ອສັນນິຖານວ່າ ແມ່ນຫຍັງເປັນສາເຫດທີ່ເຮັດໃຫ້ມີການກໍເຫດຮຸນແຮງໃນຄັ້ງນີ້.
ມືປືນຕິດອາວຸດຈຳນວນຫຼາຍຄົນດັ່ງກ່າວໄດ້ປະໜັງສືຄວາມຄຽດຊັງໄວ້ໃນທີ່ເກີດເຫດ, ເຊິ່ງ ອີງຕາມການລາຍງານຂ່າວໄດ້ກ່າວວ່າ ລາວ “ຮູ້ສຶກວ່າໂລກນີ້ເຕັມໄປດ້ວຍການຕໍ່ຕ້ານລາວ.”
ປະທານາທິບໍດີ ສະຫະລັດ ທ່ານ ບາຣັກ ໂອບາມາ ໄດ້ກ່າວກ່ຽວກັບການຍິງກັນຕາຍໃນວັນສຸກທີ່ຜ່ານມາ, ເມື່ອທ່ານໄດ້ຮຽກຮ້ອງໃຫ້ປະຊາຊົນ ອາເມຣິກາ ຜັກດັນໃຫ້ມີການຈຳກັດການໃຊ້ປືນທີ່ເຄັ່ງຄັດຂຶ້ນຕື່ມໂດຍການລົງຄະແນນສຽງເລືອກເອົາບັນດາເຈົ້າໜ້າທີ່ຜູ້ທີ່ ໝາຍໝັ້ນຕໍ່ການຜ່ານກົດໝາຍຄວບຄຸມປືນໃນລັດຖະສະພາ.
