ຣັດເຊຍຈັບ ພວກຜູ້ນໍາຝ່າຍຄ້ານ ທີ່ຮ່ວມໃນການປະທ້ວງ ຕໍ່ຕ້ານລັດຖະບານ (ສະໄລດ໌)

MOSCOW —  ຕໍາຫຼວດຣັດ​ເຊຍ​ໄດ້​ກັກ​ຂັງ​ປະມານ 40 ຄົນ ​ໂຮມ​ທັງ​ພວກ​ຝ່າຍ​ຄ້ານ​ທີ່​ມີ​ຊື່ ສຽງ​ສີ່​ຄົນ ​ໃນ​ຄວາມ​ພະຍາຍາມ​ເພື່ອ​ທັບ​ມ້າງ​ການ​ໂຮມ​ຊຸມນຸມຕໍ່ຕ້ານລັດຖະບານທີ່​ບໍ່​ໄດ້ຮັບ​ອະນຸຍາດ ​ຢູ່​ໃນນະຄອນຫຼວງ Moscow.

ບັນດາ​ຜູ້​ນໍາ​ຝ່າຍ​ຄ້ານ ອັນ​ມີ​ ທ່ານ Alexei Navalny, Sergei Udaltsov, Ilya Yashin ​ແລະທ່ານ Ksenia Sogchak ​ແມ່ນ​ຮວມ ຢູ່​ໃນ​ຈໍານວນ​ຜູ້​ຖືກ​ກັກ​ຂັງ.

ການ​ປະ​ທ້ວງ​ດັ່ງກ່າວ​ຖືກ​ຈັດ​ຕັ້ງ​ຂຶ້ນມາ ​ເພື່ອ​ເປັນ​ຂີດ​ໝາຍ​ວັນ​ຄົບຮອບ​ນຶ່ງ​ປີ ຂອງ​ການ​ໂຮມ​ຊຸມນຸມ​ຕໍ່ຕ້ານ​ປະທານາທິບໍດີ Vladimir Putin ​ແລະ​ອິດທິພົນ​ຂອງ​ທ່ານ​ ທີ່​ກໍາລັງ​ເພີ່ມທະວີ​ຂຶ້ນ​ໄປ​ນັບ​ມື້​ນັ້ນ.

ປະຊາຊົນຫຼາຍພັນ​ຄົນ​ໄດ້ໄປເຕົ້າ​ໂຮມ​ກັນ​ເພື່ອ​ເດີນ​ຂະ​ບວນປະ​ທ້ວງ ​ເຖິງ​ແມ່ນຈະ​ມີ​ສະ ພາບ​ອາກາດ​ໜາວ​ເຢັນ​ທີ່​ສຸດ ​ແລະ​ການມີໜ້າຢ່າງ​ໜາ​ແໜ້ນ ຂອງກໍາລັງ​ຕໍາຫຼວດ ​ຢູ່​ຈະຕຸ​ລັດ Lubyanka ​ຂອງ​ Moscow ໃກ້ໆ​ກັບ ຕຶກ​ກອງ​ບັນຊາ​ການ​ຂອງພະ​ແນ​ກຮັກສາ​ຄວາມ​ປອດ​ໄພ​ລັດຖະບານ​ກາງ ຂອງຣັດ​ເຊຍ.

ທາງ​ການ​ນະຄອນຫຼວງ Moscow ​ໄດ້​ປະຕິ​ເສດ​ບໍ່​ອອກ​ໃບ​ອະນຸຍາດ​ໃຫ້ ​ໂຮມ​ຊຸມນຸມ​ກັນ.

ຂະນະ​ນີ້ ທ່ານ Navalny ຜູ້​ຈັດ​ຕັ້ງ​ແກນ​ນໍາ​ຄົນ​ນຶ່ງ​ຂອງ​ການ​ປະ​ທ້ວງຕໍ່ຕ້ານ​ວັງເເຄຣມລິນ ກໍາລັງ​ຖືກ​ສອບ​ສວນ​ໂດຍ​ເຈົ້າໜ້າ​ທີ່ຣັດ​ເຊຍ​ ​ໃນຖານ​ສົງໄສ​ວ່າ ​ໄດ້​ທໍາ​ການສໍ້​ໂກງ ​ແລະຟອກ​ເງິນ. ທ່ານ Navalny ປະຕິ​ເສດ​ຕໍ່​ຂໍ້​ກ່າວ​ຫາ​ດັ່ງກ່າວ ທີ່ມີ​ສິດ​ຖືກ​ຕັດສິນ​ຈໍາ​ຄຸກຮອດ 10 ປີ​ນັ້ນ.

ເບິ່ງປະມວນພາບທີ່ກ່ຽວຂ້ອງກັບການຕໍ່ຕ້ານລັດຖະບານຂອງທ່ານພູຕິນ: