ເຖິງແມ່ນວ່າ ຜົນການເລືອກຕັ້ງຢ່າງເປັນທາງການ ຈະບໍ່ເປີດເຜີຍແຜ່ນກວ່າວັນທີ 25
ມິຖຸນາ ແຕ່ການປ່ອນບັດທີ່ມີການຕິດຕາມຢ່າງໃກ້ຊິດຂອງສະພາປະຊາຄົມກຳປູເຈຍ
ໄດ້ສະແດງໃຫ້ເຫັນວ່າ ພັກຝ່າຍຄ້າຍມີຄວາມເຂັ້ມແຂງຕື່ມຂຶ້ນແລະ ສະເໜີໃຫ້ເຫັນ
ວ່າ ການເລືອກຕັ້ງແຫ່ງຊາດໃນປີ 2018 ຈະເປັນການແຂ່ງຂັນກັນລະຫວ່າງສອງພັກ.
ນັກວິເຄາະການເມືອງທ່ານ Ou Virak ປະທານກອງປະຊຸມ Future Forum ຂອງ
ພວກນັກວິເຄາະຢູ່ໃນນະຄອນພະນົມເປັນ ກ່າວຕໍ່ລາຍການ Hello ວີໂອເອ ທີ່ເປັນ
ລາຍການໂອ້ລົມທາງໂທລະສັບວ່າ ການເລືອກຕ້ັງທົ່ວໄປໃນປີ 2018 ຈະເປັນການ
ແຂ່ງຂັນຢ່າງດຸເດືອດ. ທ່ານຄາດວ່າຈະເປັນການແຂ່ງຂັນລະຫວ່າງ ສອງພັກ.
ທ່ານກ່າວວ່າ “ການເລືອກຕັ້ງໃນປີ 2018 ບັນດາພັກນ້ອຍໆຈະບໍ່ມີໂອກາດ. ນີ້ກໍ
ເພາະວ່າ ການແຂ່ງຂັນລະຫວ່າງສອງພັກໃຫຍ່ ແມ່ນມີຄະແນນໃກ້ຊິດກັນ. ເພາະ
ສະນັ້ນ ບັນດາຜູ້ປ່ອນບັດຈະເຫັນພັກທີ່ສາມພຽງແຕ່ເປັນເກະກະ. ເຂົາເຈົ້າຈະບໍ່
ປ່ອນບັດເອົາພັກທີ່ສາມ ເພື່ອເກະກະຕໍ່ບັດລົງຄະແນນສຽງເຂົາເຈົ້າ.”
ຜົນການເລືອກຕັ້ງທີ່ບໍ່ເປັນທາງການໄດ້ເຜີຍແຜ່ໃນຕອນແລງວັນອາທິດທີ່ຜ່ານມາ
ໂດຍອົງການຂ່າວ Fresh News ຊຶ່ງເປັນເວັບໄຊສະໜັບສະໜູນລັດຖະ ບານ ໄດ້
ລາຍງານວ່າ ພັກປົກລັດຖະບານ ປະຊາຊົນກຳປູເຈຍຫລື CPP ໄດ້ຊະນະບ່ອນນັ່ງສະພາປະຊາຄົມ 1,158 ບ່ອນ ປຽບທຽບໃສ່ 487 ບ່ອນນັ່ງ ຂອງພັກຝ່າຍຄ້ານ
CNPR. ພັກເອກກະພາບແຫ່ງຊາດຂະແມ ນຶ່ງໃນຈຳນວນ 10 ພັກນ້ອຍທີ່ໄດ້ເຂົ້າ
ຮ່ວມການປ່ອນບັດໃນວັນອາທິດ ໄດ້ຊະນະນຶ່ງບ່ອນນັ່ງ.
ຖ້າຫາກການນັບບັດລົງຄະແນນໄດ້ຮັບການຢັ້ງຢືນ ມັນຈະສະແດງໃຫ້ເຫັນການໄດ້
ຮັບຄະແນນຫລາຍຂຶ້ນຂອງພັກຝ່າຍຄ້ານ ທີ່ໄດ້ຊະນະພຽງແຕ່ 40 ບ່ອນນັ່ງໃນການ
ເລືອກຕັ້ງປະຊາຄົມປີ 2012.
