ຫົວໜ້າຝ່າຍປາບປາມຢາເສບຕິດຂອງໄທຢືນຢັນວ່າ ການຜະລິດຝິ່ນ ໃນເຂດ ສາມ
ຫຼ່ຽມຄຳຫລຸດລົງໃນປີ 2018 ນີ້ ຫາກແຕ່ວ່າ ຜົນຜະລິດຢາບ້າ ທີ່ລັກລອບຂົນສົ່ງຍັງ
ເພີ້ມຂຶ້ນຢ່າງຕໍ່ເນື່ອງ ຊຶ່ງຊົງລິດ ໂພນເງິນ ນັກຂ່າວ ວີໂອເອ ມີລາຍງານຈາກບາງກອກ.
ທ່ານສິຣິນຍາ ສິດທິໄຊ ເລຂາທິການຄະນະກຳມະການປ້ອງກັນ ແລະປາບປາມຢາ
ເສບຕິດແຫ່ງຊາດໄທ ຢືນຢັນວ່າດ້ວຍການຮ່ວມມືກັນຢ່າງໃກ້ຊິດ ລະຫວ່າງທາງການ
ມຽນມາ ລາວ ແລະໄທ ໃນເຂດຕິດຕໍ່ຊາຍແດນ 3 ປະເທດ ທີ່ເອີ້ນວ່າເຂດສາມຫຼ່ຽມ
ທອງຄຳນັ້ນ ໄດ້ເປັນຜົນເຮັດໃຫ້ພື້ນທີ່ລັກລອບປູກຝິ່ນໃນປີ 2018 ນີ້ລົດລົງເຖິງ 30
ເປີເຊັນ ທຽບໃສ່ປີ 2017 ແຕ່ໃນຂະນະດຽວກັນກໍປາກົດວ່າໄດ້ມີການລັກລອບຜະ
ລິດຢາບ້າ (Methamphetamine) ເພີ້ມຂຶ້ນດັ່ງທີ່ທ່ານສິຣິນຍາ ຢືນຢັນວ່າ:
“ສະຖານະການໃນສາມຫຼ່ຽມທອງຄຳນັ້ນ ຈາກການສຳຫຼວດຂອງ UN (ສະຫະປະ
ຊາຊາດ) ໄດ້ພົບວ່າພື້ນທີ່ ທີ່ລັກລອບປູກຝິ່ນ ທີ່ຈະນຳເຂົ້າໄປຜະລິດຢາເສບຕິດນັ້ນ
ມີຈຳນວນລົດລົງປະມານ 30 ເປີເຊັນ ຈາກເດີມປະມານ 3 ແສນໄຮ ກໍລົດລົງ 30
ເປີເຊັນ ເພາະສະນັ້ນ ເຮົາກໍຄິດວ່າເຮໂຣອິນນີ້ກໍຄົງຈະບໍ່ມີປະລິມານການຜະລິດ
ສູງຂຶ້ນ ແຕ່ສິ່ງທີ່ເຮົາເປັນຫ່ວງກໍຄື Methamphetamine ທີ່ ມີການຜະລິດໂດຍໃຊ້
ສານເຄມີມາທຳເປັນສານຕັ້ງຕົ້ນແລ້ວໃສ່ສູດເຂົ້າໄປເຮັດເປັນ Methamphetamine
ໂຕນີ້ມີປະລິມານການຜະລິດສູງ."
ທ່ານສິຣິນຍາ ຢືນຢັນດ້ວຍວ່າ ການຮ່ວມມືປາບປາມຢາເສບຕິດລະຫວ່າງຈີນ ມຽນມາ
ລາວ ໄທ ກຳປູເຈຍ ແລະຫວຽດນາມ ພາຍໃຕ້ປະຕິບັດການແມ່ນ້ຳຂອງປອດໄພຈາກບັນ
ຫາຢາເສບຕິດ ທີ່ໄດ້ຈັດຕັ້ງປະຕິບັດຮ່ວມກັນໃນຊ່ວງປີ 2013-2017 ທີ່ຜ່ານມາ ນອກ
ຈາກຈະສາມາດປາບປາມການຄ້າຢາເສບຕິດໄດ້ 125,274 ກໍລະນີ ຈັບຜູ້ຕ້ອງຫາໄດ້
160,000 ກວ່າຄົນ ຍຶດຢາບ້າໄດ້ກວ່າ 363 ລ້ານເມັດ ຢາໄອສ໌ກວ່າ 13 ໂຕນ ເຮໂຣອິນ
7,553 ກິໂລກຣາມ ຝິ່ນຫຼາຍກວ່າ 14 ໂຕນ ກັນຊາແຫ້ງ 20 ກວ່າໂຕນ ອາວຸດ ແລະອຸບ
ປະກອນສື່ສານທີ່ທັນສະໄໝອີກກວ່າໝື່ນລາຍການແລ້ວ ຍັງສາມາດຍຶດສານເຄມີຕັ້ງ
ຕົ້ນໄດ້ກວ່າ 270 ໂຕນ ຫຼືເທົ່າກັບ 10 ເປີເຊັນ ຂອງສານເຄມີທັງໝົດກວ່າ 2,430 ໂຕນ
ທີ່ລັກລອບຂົນເຂົ້າໄປເຂດສາມຫຼ່ຽມທອງຄຳ ໂດຍບໍ່ລວມຢາບ້າທີ່ທາງການໄທຍຶດໄດ້
ຫຼາຍກວ່າ 214 ລ້ານເມັດ ໃນປີ 2017 ແຕ່ຢ່າງໃດ
ສ່ວນອົງການຄວບຄຸມຢາເສບຕິດ ແລະອາຊະຍາກຳແຫ່ງສະຫະປະຊາຊາດ
(UNODC) ຄາດການວ່າການລັກລອບປູກຝິ່ນໃນເຂດສາມຫຼ່ຽມທອງຄຳໃນປີ 2018
ມີເນື້ອທີ່ລວມ 6 ໝື່ນກວ່າເຮັກຕາໃນມຽນມາ ກັບ 1 ໝື່ນກວ່າເຮັກຕາໃນລາວ ແລະ
1,500 ກວ່າເຮັກຕາໃນໄທ ຊຶ່ງຈະໃຫ້ມີຜົນຜະລິດຝິ່ນດິບຮວມກັນຫຼາຍກວ່າ 215
ໂຕນ ທີ່ໃຊ້ເປັນສ່ວນປະສົມໃນການຜະລິດຢາບ້າໄດ້ຫຼາຍກວ່າ 2,150 ໂຕນ.
ທາງດ້ານທ່ານສົມແກ້ວ ສີລາວົງ ລັດຖະມົນຕີວ່າການກະຊວງປ້ອງກັນ ຄວາມສະຫງົບ
ພາຍໃນ ຍອມຮັບວ່າເຄືອຂ່າຍການຄ້າຢາເສບຕິດຢູ່ໃນລາວທີ່ມີລັກສະນະຂ້າມຊາດ
ແລະເປັນກຸ່ມແກັ້ງຄ້າຢາເສບຕິດທີີ່ມີການນຳໃຊ້ເທັກນິກຂັ້ນສູງ ແລະຍາກຕໍ່ການຕິດ
ຕາມກວດກາ ແລະຈັບກຸມ ທັງຍັງເຮັດໃຫ້ຂະບວນການນີ້ສາມາດລັກລອບຂົນຢາເສບ
ຕິດຈາກເຂດສາມຫຼ່ຽມຄຳ ຜ່ານລາວໄປຕ່າງປະເທດໄດ້ຫຼາຍຂຶ້ນດ້ວຍການໃຊ້ຖະໜົນ
ເລກ 13 ແລະຖະໜົນເລກ 9 ເປັນເສັ້ນທາງຫລັກໃນການລັກລອບຂົນສົ່ງດັ່ງກ່າວ ທັງ
ຍັງເຮັດໃຫ້ສັງຄົມລາວ ປະເຊີນກັບອາຊະຍາກຳ ກ່ຽວກັບຢາເສບຕິດເພີ້ມຂຶ້ນດ້ວຍ ໂດຍ
ສານປະຊາຊົນລາວໄດ້ຕັດສິນຄວາມຜິດໄປແລ້ວ 28,475 ຄະດີຈາກທັງໝົດ 29,780
ຄະດີໃນຊ່ວງ 5 ປີຜ່ານມາ
ພາຍໃຕ້ສະພາບການດັ່ງກ່າວນີ້ ຍັງເຮັດໃຫ້ມີຄວາມຈຳເປັນຢ່າງຍິ່ງ ທີ່ໜ່ວຍປາບປາມ
ຢາເສບຕິດຂອງລາວ ຈະຕ້ອງໄດ້ຮັບການສະໜັບສະໜຸນໃນທຸກໆດ້ານ ທັງໃນລັດຖະ
ບານລາວ ແລະຕ່າງຊາດອີກດ້ວຍ ໂດຍສະເພາະແມ່ນການສະໜັບສະໜຸນດ້ານເທັກ
ນິກຂັ້ນສູງ ເພາະເຄື່ອງໄມ້ເຄື່ອງມືທີ່ທາງການລາວມີຢູ່ໃນ ເວລານີ້ ບໍ່ເທົ່າທັນກັບເຄື່ອງ
ມືທີ່ທັນສະໄໝຂອງຂະບວນການຄ້າຢາເສບຕິດຂ້າມຊາດໄດ້ນັ້ນເອງ.
ທັງນີ້ໂດຍໃນຊ່ວງປີ 2010-2017 ຝ່າຍປາບປາມຢາເສບຕິດຂອງໄທ ຈັບນັກຄ້າຢາ
ເສບຕິດຊາວມຽນມາໄດ້ເຖິງ 13,417 ຄົນ ສ່ວນອັນດັບສອງ ຄືນັກຄ້າຢາເສບຕິດສັນ
ຊາດລາວ ທີ່ຖືກທາງການໄທຈັບກຸມໂຕໄດ້ 9,593 ຄົນ ແລະອັນດັບ 3 ຄືຊາວກຳປູເຈຍ
ທີ່ທາງການໄທຈັບກຸມໂຕໄດ້ 2,456 ຄົນ.
