Sultan Qaboos ແຫ່ງໂອມານໄດ້ສັບຊ້ອນຄະນະລັດ
ຖະບານຂອງທ່ານເປັນຄັ້ງທີສອງໃນນຶ່ງສັບປະດາ ຫລັງ
ຈາກມີການປະທ້ວງຕິດຕໍ່ກັນມາເປັນເວລາຫລາຍມື້ຂອງ
ປະຊາຊົນ ທີ່ທວງໃຫ້ມີການປະຕິຮູບທາງການເມືອງແລະ ໃຫ້ກໍາຈັດການສໍ້ລາດບັງຫລວງໃນວົງການລັດຖະບານ.
ໃນວັນເສົາວານນີ້ Sultan Qaboos ໄດ້ແຕ່ງຕັ້ງລັດຖະ
ມຸນຕີປະຈໍາລາດຊະບັງລັງ ແລະລັດຖະມົນຕີປະຈໍາລາດຊະ
ສໍານັກຄົນໃໝ່. ຜູ້ປົກຄອງໂອມານໄດ້ທໍາການສັບຊ້ອນຄະນະລັດຖະບານຂອງທ່ານແລ້ວໃນສັບປະດາກ່ອນນີ້ ອັນເປັນຄວາມພະຍາຍາມຢ່າງຈະແຈ້ງເພື່ອຍັບຍັ້ງບໍ່ໃຫ້ມີການປະທ້ວງເອົາການປະຕິຮູບດ້ານການເມືອງຢ່າງຮອບດ້ານທີ່ເກີດຂຶ້ນໃນປະເທດອື່ນໆໃນໂລກອາຣັບນັ້ນ.
ນອກນີ້ Sultan Qaboos ຍັງໄດ້ຊັ່ງໃຫ້ສ້າງໜ້າວຽກ
ຂຶ້ນອີກ 5 ໜື່ນວຽກແລະເພີ່ມເງິນສົງເຄາະຂຶ້ນອີກສໍາລັບ ພວກຄົນຫວ່າງງານ.
ພວກປະທ້ວງໄດ້ສືບຕໍ່ທໍາການນັ່ງປະທ້ວງຢູ່ຕໍ່ມາໃນວັນເສົາວານນີ້ ໃນເມືອງ Sohar ຊຶ່ງຕັ້ງຢູ່ຫ່າງຈາກນະຄອນຫລວງ Muscat ໄປທາງທິດຕາເວັນຕົກສຽງເໜືອປະມານ 200 ຫລັກກິໂລແມັດ.
ໄດ້ມີການປະທ້ວງຕາມຖະໜົນຫົນທາງ ແລະນັ່ງປະທ້ວງຕິດຕໍ່ກັນມາຫລາຍບັ້ນໃນສັບປະດາຜ່ານມາ ຊຶ່ງບາງຄັ້ງໄດ້ມີການປະທະກັນກັບພວກກໍາລັງຮັກສາຄວາມປອດໄພຂອງປະເທດ.
ລັດຖະບານໂອມານຍອມຮັບວ່າ ຜູ້ປະທ້ວງຄົນນຶ່ງເສຍຊີວິດໃນເຫດວຸ້ນວາຍນັ້ນ ແຕ່ລາຍງານສື່ມວນຊົນອ້າງຄໍາເວົ້າຂອງການປະເມິນທີ່ບໍ່ເປັນທາງການວ່າ ຈໍານວນຜູ້ບາດເຈັບແລະເສຍຊີວິດມີຫລາຍກວ່ານັ້ນ.
