ເບິ່ງການແຂ່ງຂັນບານບ້ວງຂອງສະຫະລັດທີ່ຊະນະເລີດໃນກິລາໂອລິມປິກ 2012
ຜົນຂອງການແຂ່ງຂັນໂອລິມປິກ ວັນເສົາວານນີ້ ປາກົດວ່າ ທີມບານບ້ວງຍິງຂອງສະຫະລັດ ໄດ້ຮັບຫຼຽນຄໍາໂອລິມປິກ ເປັນຄັ້ງທີ່ຫ້າລຽນຕິດ ໃນການແຂ່ງຮອບຊີງຊະນະເລີດກັບທີມຝຣັ່ງ ໂດຍທໍາຄະແນນໄດ້ 86 ຕໍ່ 50 ຊຶ່ງເປັນການເພີ້ມໄຊຊະນະອີກບັ້ນນື່ງ ໃຫ້ແກ່ທີມນັກກີລາໂອລິມປິກອາເມຣິກັນ ທີ່ເບິ່ງຊົງວ່າ ຈະຄວ້າຫຼຽນໄດ້ຫຼາຍກວ່າປະເທດອື່ນໆ ທັງຫຼຽນ ຄໍາ ແລະ ຈໍານວນຫຼຽນທັງໝົດ.
ບັນດານັກກິລາໂອລິມປິກອາເມຣິກັນອາດຄວ້າຫຼຽນຄໍາໄດ້ເພີ່ມອີກໃນເກມ ວັນອາທິດມື້ນີ້ ຄືກິລາບານບ້ວງຊາຍ ຊຶ່ງທີມທີ່ເອີ້ນວ່າ ທີມໃນຝັນນັ້ນ ຈະແຂ່ງກັບທີມ ສະເປນ ຄືກັນກັບຄັ້ງກິລາໂອລິມປິກປີ 2008 ທີ່ປັກກິ່ງ ຊຶ່ງ ທີມ USA ຊະນະສະເປນໄປ 118 ຕໍ່ 107 ນັ້ນ.
ໃນການແຂ່ງຂັນວັນເສົາວານນີ້ ນັກກິລາແລ່ນຊາຍທີ່ໄວທີ່ສຸດຂອງໂລກ ກໍໄດ້ສິ້ນສຸດການແຂ່ງຂັນລົງ ແບບທີ່ບໍ່ມີນັກກິລາແລ່ນຊາຍຄົນໃດເຄີຍເຮັດໄດ້ມາກ່ອນ ໂດຍໄດ້ຮັບສາມຫຼຽນຄໍາ ໃນການແຂ່ງຂັນໂອລິມປິກສອງຄັ້ງ ຕິດກັນ. ນາຍ USAIN BOLT ໄດ້ນໍາພານັກກິລາຊາວຈາໄມກາ ໄປສູ່ໄຊຊະນະໃນການແລ່ນຜັດກັນ ຫຼືຣີເລຊາຍ 4 ຄົນ ໄລຍະ 400 ແມັດ ໂດຍໄດ້ທໍາລາຍສະຖິຕິໂລກ ຄືທໍາເວລາໄດ້ 36.84 ວິນາທີ.
ໄຊຊະນະດັ່ງກ່າວນີ້ ແມ່ນຕິດຕາມມາຫລັງຈາກທີ່ນາຍ USAIN ໄດ້ຮັບຫລຽນຄໍາ ທີ່ລອນດອນ ປະເພດແລ່ນໄວ 100 ແລະ 200 ແມັດ. ນອກນີ້ແລ້ວ ນາຍ USAIN ກໍໄດ້ຫລຽນຄໍາໃນແຂ່ງຂັນປະເພດດຽວກັນນີ້ທັງສາມຄັ້ງໃນກິລາໂອລິມປິກປີ 2008 ທີ່ປັກກິ່ງນັ້ນ.
ເບິ່ງວີດິໂອກ່ຽວກັບຄວາມຕື່ນເຕັ້ນດີໃຈຂອງຊາວເຈໄມກາທີ່ຊະນະການແລ່ນຊາຍ
ທີມແມັກຊິໂກ ຍາດໄດ້ຫຼຽນຄໍາ ປະເພດບານເຕະຊາຍ ໂດຍເອົາຊະນະບຣາຊິລໄປ 2 ຕໍ່ 1 ປະຕູ. ແຕ່ປາກົດວ່າທີມບຣາຊິລ ເອົາຊະນະທີມ ສະຫະລັດໄປ ປະເພດບານສົ່ງຍິງ.
ຫຼັງຈາກການແຂ່ງຂັນສິ້ນສຸດລົງຂອງວັນເສົາວານນີ້ ສະຫະລັດໄດ້ຫຼຽນຄໍາ 44 ຫຼຽນ ຂອງຫຼຽນທັງໝົດ 102 ຫຼຽນ. ສ່ວນຈີນໄດ້ 38 ຫຼຽນຄໍາ ຈາກ ທັງໝົດ 87 ຫຼຽນ. ຣັດເຊຍມາໃນອັນດັບສາມ ແລະທີ່ສີ່ແມ່ນອັງກິດ ປະເທດເຈົ້າພາບ ແຕ່ ອັງກິດໄດ້ຫຼຽນຄໍາ ຫຼາຍກວ່າຣັດເຊຍ.
ພິທີອັດການແຂ່ງຂັນ ໃນມື້ສຸດທ້າຍມື້ນີ້ ຊຶ່ງຈະມີຂຶ້ນໃນອີກບໍ່ເທົ່າໃດຊົ່ວໂມງນີ້ ຈະເປັນການ “ສະແດງພອນສະຫວັນຂອງພວກນັກດົນຕີປະເພດພັອບອັງກິດ” ຊຶ່ງເປັນ ການເນັ້ນເຖິງສິນຄ້າສົ່ງອອກດ້ານວັດທະນາທໍາ ທີ່ມີທ່າແຮງທີ່ສຸດຂອງ ປະເທດນີ້. ບັນດານັກສິນລະປິນ ທີ່ກໍານົດວ່າຈະໄປປະກົດຕົວສະແດງໃນ ພິທີສະເຫລີມສະຫລອງ ເປັນເວລາສາມຊົ່ວໂມງນັ້ນ ລວມມີ Adele, Elton John, George Michael, Annie Lennox ແລະ Pet Shop Boys.
ບຣາຊິລ ຊຶ່ງຈະເປັນເຈົ້າພາບຈັດການແຂ່ງຂັນກິລາກິລາໂອລິມປິກປີ 2016 ກໍຈະຈັດການສະແດງ ສ້າງບັນຍາກາດແຫ່ງຄວາມສະໜຸກສະໜານ ລື່ນເລີງແບບ Rio-style carnival ຊຶ່ງເປັນ ການສະແດງທີ່ປະກອບດ້ວຍ ນັກຕີກອງ ນັກເຕັ້ນລໍາ ແລະຜູ້ຍິງທີ່ແຕ່ງຕົວ ໃນຊຸດສະແດງ carnival ພື້ນເມືອງທີ່ເຮັດຢ່າງມີສີມືປານີດ.
ເບິ່ງລາຍການຫລຽນຂອງປະເທດເຂົ້າຮ່ວມກິລາໂອລິມປິກ 2012 ໃນມື້ນຶ່ງກ່ອນປິດເກມ
