ລິ້ງ ສຳຫລັບເຂົ້າຫາ

ວັນອັງຄານ, ໑໘ ມິຖຸນາ ໒໐໒໔

ນັກກິລາ ຈາໄມກາ ຮວບຫຼຽນທັງໝົດ ໃນການແຂ່ງຂັນ ແລ່ນ 200 ແມັດ (ສະໄລດ໌)


ນັກແລ່ນຈາໄມກາ Usain Bolt ໃນການແຂ່ງຂັນແລ່ນ 200 ແມັດ ຮອບທຳອິດທີ່ກຸງລອນດອນ (7 ສິງຫາ 2012)
ນັກແລ່ນຈາໄມກາ Usain Bolt ໃນການແຂ່ງຂັນແລ່ນ 200 ແມັດ ຮອບທຳອິດທີ່ກຸງລອນດອນ (7 ສິງຫາ 2012)

ພວກ​ນັກ​ແລ່ນ​ເກັ່ງໆ​ຂອງ​ຈາ​ໄມ​ກາ ​ໄດ້​ຊະນະ​ທັງ 3 ຫຼຽນ ​ໃນ​ການ​ແຂ່ງຂັນ​ກິລາໂອ​ລິ​ມປິກ
​ທີ່​ກຸງ​ລອນ​ດອນ​ໃນ​ວັນ​ພະຫັດ​ວານ​ນີ້.

ນັກ​ແລ່ນ​ໄວ​ທີ່​ສຸດ​ຂອງ​ໂລກ Usain Bolt ​ໄດ້​ຊະນະ​ຫຼຽນຄຳ​ໃນ​ການ​ແລ່ນ 200 ​ແມັດ ​ໂດຍ
ໃຊ້​ເວລາ 19.32 ວິນາທີ. ສ່ວນ Yohan Blake ຊຶ່ງ​ເປັນ​ເພື່ອນ​ຮ່ວມ​ທີ​ມ ​ແລະ ຝຶກ​ແອບ​ນຳ
​ກັນນັ້ນໄດ້​ຊະນະ​ຫຼຽນ​ເງິນ​ໂດຍ​ໃຊ້​ເວລາ 19.44 ວິນາທີແລະ Warren Weir ຊະນະ​ຫຼຽນ
ທອງ​ແດງ ໂດຍ​ໃຊ້​ເວລາ 19.84 ວິ ນາທີ.

Usain Bolt ​ໄດ້​ກາຍ​ເປັນ​ບຸກຄົນ​ທຳ​ອິດທີ່​ຊະນະ​ທັງ​ການ​ແລ່ນ 100 ​ແມັດ ​ແລະ 200 ​ແມັດ
​ໃນ​ການ​ແຂ່ງ​ກິລາ​ໂອ​ລິ​ມປິກ​ສອງ​ສະ​ໄໝ​ຊ້ອນ. ລາວ​ໄດ້​ໃຊ້​ເວລາ​ໜ້ອຍ​ທີ່​ສຸດ​ເປັນ​ປະວັດ​ການ
​ໃນ​ການແລ່ນ 100 ​ແມັດ​ເມື່ອ​ວັນ​ອາທິດ​ແລ້ວ.

​ໃນ​ການ​ແຂ່ງຂັນ​ແລ່ນ 800 ​ແມັດ​ປະ​ເພດ​ຊາຍ​ຮອບ​ສຸດ​ທ້າຍ​ນັ້ນ David Rudisha ຈາກ
​ເຄັນ​ຢາ ຊະນະ​ຫຼຽນຄຳ​ໂອ​ລິ​ມປິກ​ເປັນ​ເທື່ອ​ທຳ​ອິດ ດ້ວຍ​ການ​ທຳ​ສະ​ຖະຕິ​ໃໝ່​ຂອງ​ໂລກ​ໂດຍ
​ໃຊ້​ເວລາ​ແຕ່​ພຽງ 1 ນາທີກັບ 20.91 ວິນາທີ​ທໍ່​ນັ້ນ ຄືນຶ່ງ​ສ່ວນ​ສິບ​ຂອງ​ວິນາທີ​ໜ້ອຍ​ກວ່າ
ສະ​ຖິຕິ​ທີ່​ລາວ​ໄດ້​ເຮັດໄວ້​ ເມື່ອ 2 ປີ​ກ່ອນ.

​ໃນ​ການ​ແຂ່ງຂັນ​ເຕະບານ​ແມ່ຍິງ​ນັ້ນ ທີ​ມຂອງ​ສະຫະລັດ​ໄດ້​ຄວ້າ​ເອົາຫຼຽນຄຳ​ມາຄອງ​ໂດຍ
​ຊະນະ​ຍີ່ປຸ່ນ 2 ປະຕູ​ຕໍ່ 1. ຍີ່ປຸ່ນ ​ເຄີຍ​ຊະນະທີ​ມສະຫະລັດ​ໃນ​ການ​ແຂ່ງຂັນຊິງແຊັມເຕະບານ
​ໂລກແມ່ຍິງ ປີ​ກາຍ​ນີ້.

​ໃນ​ການ​ແຂ່ງຂັນ​ບານບ້ວງ​ປະ​ເພດ​ຍິງ​ນັ້ນ ທີ​ມຂອງສະຫະລັດ​ໄດ້​ກ້າວ​ເຂົ້າ​ໄປ​ຫຼິ້ນ​ໃນ​ຮອບ​ຊິງ​
ຫຼຽນຄຳ ​ໂດຍ​ການ​ເອົາ​ຊະນະ​ອອສ​ເຕຣ​ເລຍ 86 ຕໍ່ 73.

ພາບຈາກການແຂ່ງຂັນມື້ທີ 13 ວັນພະຫັດວານນີ້:

ມາ​ຮອດ​ເວລາ​ນີ້ ສະຫະລັດ​ໄດ້ນຳ​ໜ້າ​ປະ​ເທດ​ຕ່າງໆ​ ໃນ​ການ​ໄດ້​ຮັບ​ຫຼຽນທັງ​ໝົດ ຄື​ໄດ້​ 90
ຫຼຽນຕິດຕາມ​ດ້ວຍ​ຈີນ 80 ຫຼຽນ ​ແລະຣັດ​ເຊຍ 56 ຫຼຽນ. ​ໃນ​ດ້ານຫຼຽນຄຳນັ້ນສະຫະລັດ​
ກໍນຳ​ໜ້າ​ໝູ່ຄື​ກັນຄື​ໄດ້​ທັງ​ໝົດ 39 ຫຼຽນ ຂະນະ​ທີ່​ຈີນ​ໄດ້​ 37 ຫຼຽນ ​ແລະອັງກິດ 25 ຫຼຽນ.

ລາຍການຫລຽນຂ້າງລຸ່ມນີ້ ປັບປ່ຽນໂດຍອັດຕະໂນມັດ ສະນັ້ນຈຶ່ງບໍ່ກົງກັບໃນຂ່າວ:

Loading...

See complete list at olympic.org

XS
SM
MD
LG