ລັດ​ໂອ​ຮາ​ຍ​ໂອ ​ຟ້ອງ​ 5 ບໍລິສັດ ທີ່ຜະລິດຢາ ຕາມໝໍສັ່ງ ທີ່ວ່າ ເຮັດໃຫ້ຜູ້ປ່ວຍ ຕິດຢາ

ລັດ Ohio ທາງພາກ​ກາງ​ຂອງສະຫະລັດ ​ໄດ້​ຟ້ອງ​ຮ້ອງ​ອຸດສາຫະກຳ​ຜະລິດ​ຢາຕາມ​ໝໍ​ສັ່ງ
5 ​ບໍລິສັດ ​ໃນ​ວັນ​ພຸດ​ວານ​ນີ້ ​ໂດຍ​ກ່າວ​ວ່າ ພວກ​ອຸດສາຫະກຳເຫຼົ່າ​ນີ້ ​ແມ່ນ​ໄດ້​ໃຊ້​ການ
ປະຕິບັດ​ແບບ​ຫລອກ​ລວງ​ແລະ​ເຮັດ​ໃຫ້​ມີ​ການຕິດ​ຢາ​ແຜ່ລະ​ບາດ.

“ພວກ​ຜູ້​ຜະລິດ​ຢາເຫຼົ່າ​ນີ້ ​ໄດ້​ເຮັດ​ໃຫ້ພວກ​ທີ່​ສັ່ງ​ຢາ​ເຊື່ອ​ວ່າ ຢາເຫລົ່າ​ນີ້ ບໍ່​ຕິດ,
ການ​ຕິດ​ຢາ ກໍ​ສາມາດ​ເອົາ​ຊະນະ​ໄດ້​ງ່າຍໆ ຫລື​ວ່າ ການ​ຕິດ​ຢາ​ນີ້ ​ແມ່ນ​ສາມາດ
​ຮັກສາ​ໄດ້ ດ້ວຍ​ການກິນຢາ​ເຫລົ່ານີ້ເພີ່ມ​ຂຶ້ນ,” ​ນັ້ນ​ແມ່ນຄຳ​ເວົ້າຂອງທ່ານ Mike
DeWine ​ຫົວໜ້າ​ພະ​ແນ​ກຍຸຕິ​ທຳ​ຂອງ​ລັດ​ໂອ​ຮາ​ຍ​ໂອ ​ແລະ​ທ່ານ​ຍັງ​ກ່າວ​ອີກ​ຕື່ມ​ວ່າ
“ພວກ​ເຂົາ​ເຈົ້າ​ຊາບ​ດີ​ວ່າ ພວກ​ເຂົາ​ເຈົ້າ​ຜິດ, ​ແຕ່​ວ່າ ກໍ​ຍັງ​ສືບ​ຕໍ່​ປະຕິບັດ​ຢູ່ດີ.”

ລັດດັ່ງກ່າວ ຕ້ອງການບັນດາບໍລິສັດເຫຼົ່າ​ນີ້ຍຸຕິ​ການ​ນຳ​ສະ​ເໜີຢາ​ແບບ​ຜິດໆ ​ແລະ​ໃຫ້​ຈ່າຍ​
ຄ່າ​ເສຍ​ຫາຍ​ໃນ​ຈຳນວນ​ເງິນ ທີ່​ລັດໄດ້ໃຊ້​ຈ່າຍ​ເປັນຄ່າປິ່ນປົວ​ພວກ​ທີ່​ກິນຢາ​ທີ່​ໝໍສັ່ງ
ເກີນ​ກຳນົດແລະມີຜົນກະທົບ​ໃນຮັກສາ​ການ​ຕິດ​ຢາຂອງ​ພວກ​ຜູ້​ປ່ວຍ ​ແລະ​ຊົດ​ເຊີຍ​ຄ່າ​
ເສຍ​ຫາຍ​ຕໍ່ພວກ​ຜູ້​ປ່ວຍ​ເຊັ່ນ​ກັນ.

ການ​ຟ້ອງ​ຮ້ອງ​ໄດ້​ລະບຸ​ຊື່​ບໍລິສັດຜະລິດ​ຢາ ​Purdue Pharma, Endo Health
Solutions, Allergan, Teva Pharmaceutical Industries ແລະບໍລິສັດ​
ທີ່​ເປັນ​ເຄືອຂ່າຍ Cephalon ​ແລະ Johnson and Johnson ຮວມທັງບໍລິສັດ​
ທີ່​ເປັນ​ເຄືອ​ຂ່າຍ ​ Janssen Pharmaceutical.

ຖະ​ແຫຼງການຂອງ ບໍລິສັດ Janssen ​ເອີ້ນ​ການຟ້ອງຮ້ອງ​ນີ້​ວ່າ ຖືກຕ້ອງ​ຕາມ​
ກົດໝາຍ ​ແລະບໍ່​ພົບ​ເຫັນມູນ​ຄວາມຈິງ ​ແລະ​ໄດ້​ກ່າວ​ວ່າ ບໍລິສັດ​ໄດ້​ເອົາ​ບາດກ້າວ
ທີ່​ເໝາະ​ສົມແລະແບບ​ມີ​ຄວາມຮັບຜິດຊອບ. ບໍລິສັດຜະລິດ​ຢາ Purdue ​ໄດ້​ກ່າວ​ວ່າ
ຕົນຮູ້​ເຫັນເຖິງຄວາມເປັນ​ຫ່ວງ​ຂອງທ່ານ DeWine ກ່ຽວ​ກັບ​ວິ​ກິດ​ການ​ໃນ​ການ​ຕິດ
ຢາ​ຕາມ​ສັ່ງ ​ແລະ​ຕ້ອງການ​ທີ່​ຈະເຮັດ​ວຽກ​ຮ່ວມ​ກັນ ​ເພື່ອ​ຫາ​ທາງ​ອອກ​ທີ່​ດີ ນຳ​ກັນ.

ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ