ຕໍາຫລວດໄດ້ຈັບກຸມພວກປະທ້ວງຫລາຍຮ້ອຍຄົນໃນຫລາຍຫົວເມືອງໃນທົ່ວສະຫະລັດ
ຂະນະທີ່ຂະບວນການ Occupy Wall Street ທີ່ຕໍ່ຕ້ານບໍລິສັດໃຫຍ່ໆນັ້ນ ສືບຕໍ່ແຜ່ລາມ
ອອກໄປຍັງທົ່ວປະເທດ.
ໃນນະຄອນ Chicago ໃນພາກຕາເວັນຕົກຂ້ອນກາງຂອງສະຫະລັດ ໃນວັນອາທິດວານນີ້
ຕໍາຫລວດໄດ້ທໍາການຈັບກຸມປະຊາຊົນ 175 ຄົນ ທີ່ບໍຍອມຍ້າຍໜີຈາກສວນສາທາລະນະ
ແຫ່ງນຶ່ງ.
ທີ່ກຸງວໍຊິງຕັນດີຊີ ຕໍາຫລວດໄດ້ຈັບກຸມຢ່າງໜ້ອຍ 19 ຄົນທີ່ພາກັນໄປນັ່ງປະທ້ວງຢູ່ຕາມ
ຂັ້ນໄດທາງເຂົ້າຫາຕຶກສານສູງສຸດຂອງສະຫະລັດ.
ພວກປະທ້ວງ ຫລາຍກວ່າ 100 ຄົນຖືກຈັບກຸມໃນທົ່ວລັດ Arizona ໃນພາກຕາເວັນຕົກ
ຂອງສະຫະລັດ.
ການຈັບກຸມເຫລົ່ານີ້ ສ່ວນຫລາຍໄດ້ດໍາເນີນໄປຢ່າງສັນຕິ ແລະມີຂຶ້ນໃນເວລາ 1 ມື້ຫລັງຈາກ
ປະຊາຊົນຫລາຍພັນຄົນ ພາກັນເດີນຂະບວນປະທ້ວງໃນຫົວເມືອງຕ່າງໆໃນທົ່ວໂລກ ເພື່ອ
ຕໍ່ຕ້ານໃນອັນທີ່ເຂົາເຈົ້າເຫັນວ່າ ເປັນຄວາມໂລບມາກໂລພາຂອງ
ພວກບໍລິສັດນັ້ນ.
ເບິ່ງວີດີໂອ ລາຍງານກ່ຽວກັບການປະທ້ວງ ຢູ່ໃນທົ່ວໂລກ:
ການປະທ້ວງສ່ວນຫລາຍໃນມື້ວັນເສົານັ້ນໄດ້ດໍາເນີນໄປຢ່າງສັນຕິ ແຕ່ກໍມີຄວາມຮຸນແຮງ
ເກີດຂຶ້ນໃນກຸງໂຣມ ປະເທດອີຕາລີ ບ່ອນທີ່ພວກປະທ້ວງທີ່ເອົາຜ້າຄຸມຫົວແລະໃສ່ໜ້າກາກ
ພາກັນແກວ່ງກ້ອນຫິນແລະແກ້ວ ແລະເອົາໄຟຈູດເຜົາແລະທໍາລາຍປ່ອງຢ້ຽມຂອງທະນາ
ຄານແລະຮ້ານຄ້າ. ຫລາຍກວ່າ 70 ຄົນໄດ້ຮັບບາດເຈັບ.
ນາຍົກລັດຖະມົນຕີອີຕາລີ Silvio Berlusconi ກ່າວວ່າ ຄວາມຮຸນແຮງທີ່ວ່ານີ້ເປັນຮ່ອງ
ຮອຍທີ່ພາໃຫ້ມີຄວາມເປັນຫ່ວງກ່ຽວກັບສັງຄົມພົນລະເມືອງ. ນັບວ່າເປັນຄວາມວຸ້ນວາຍ
ຄັ້ງຮ້າຍແຮງທີ່ສຸດບັ້ນນຶ່ງ ທີ່ເກີດຂຶ້ນໃນນະຄອນຫລວງຂອງອີຕາລີໃນຮອບຫລາຍທົດ
ສະວັດຜ່ານມາ. ເຈົ້າຄອງກໍາແພງກຸງໂຣມກ່າວວ່າ ຄ່າສ້ອມແປງຄວາມເສຍຫາຍຕ່າງໆ
ສາມາດຕົກເປັນມູນຄ່າເຖິງ 1 ລ້ານ 4 ແສນໂດລາໄດ້.
ທີ່ກຸງລອນດອນ ພວກປະທ້ວງຫລາຍຮ້ອຍຄົນໄດ້ຕັ້ງຄ້າຍຕູບຜາໃບຂຶ້ນຢູ່ນອກໂບດໃຫຍ່
St. Paul ຊຶ່ງຕັ້ງຢູ່ຕິດກັນກັບຄຸ້ມການເງິນຂອງນະຄອນຫລວງຂອງອັງກິດນັ້ນ.
ມີການໂຮມຊຸມນຸມປະທ້ວງຢູ່ໃນປະເທດອອສເຕຣເລຍ ໃນພາກພື້ນເອເຊຍ ແລະອາຟຣິກາ
ໃຕ້ເຊ່ນກັນ. ພວກປະທ້ວງພວມພະຍາຍາມດຶງຄວາມສົນໃຈໄປໃສ່ ອັນທີ່ພວກເຂົາເຈົ້າເຫັນ
ວ່າເປັນຄວາມໂລບມາກຂອງພວກບໍລິສັດ ແລະຄວາມບໍ່ກໍ້າເກິ່ງກັນທາງດ້ານເສດຖະກິດ
ຊ່ອງຫວ່າງແຕກໂຕນຫລາຍຂຶ້ນນັບມື້ ລະຫວ່າງພວກຄົນຮັ່ງແລະຄົນທຸກຢູ່ໃນທົ່ວໂລກ.
ເບິ່ງວີດີໂອ ລາຍງານກ່ຽວກັບພວກປະທ້ວງຢູ່ຊີຄາໂກ:
