ເບິ່ງວີດີໂອລາຍງານພາສາອັງກິດ:
ຟັງລາຍງານ ພາສາລາວ:
ຈາກໄລຍະໄກໆແລ້ວ ການປະທ້ວງ Occupy Wall Street ຢູ່ໃນນະຄອນນີວຢອກນັ້ນ
ກໍເບິ່ງຄືວ່າເປັນພຽງພວກຄົນທີ່ຍ່າງໄປຍ່າງມາຊື່ໆ. ແຕ່ພໍເຂົ້າໄປເບິ່ງໃກ້ໆແລ້ວ ຈະເຫັນ
ຜູ້ຄົນໃນລັກສະນະຕ່າງໆນາໆ ໃນເຄື່ອງນຸ່ງຖືທີ່ແຕກຕ່າງກັນ ເຊັ່ນ ພວກທີ່ນຸ່ງສະອາດ
ພວກທ່າທາງເອົາຈິງເອົາຈັງ ພວກນຸ່ງເຄື່ອງຫຍັບຍູ່ຍີ່ ບໍ່ຄືຄົນທົ່ວໄປ ພວກຍັກຍ້າຍສ່າຍ
ໂຕ ພວກບໍ່ຢູ່ເສີຍ ນັກດົນຕີແລະມືກອງ ຊາວບ້ານໃນຄຸ້ມ ຄົນທໍາຄວາມສະອາດ ພວກ
ຍູ້ລໍ້ ພວກນັ່ງຫລິ້ນ ພວກນອນ ພວກສວມໜ້າກາກ ພວກຖືປ້າຍປະທ້ວງ ແລະພວກເກັບ
ກໍາເອົາລາຍເຊັນຄໍາຮ້ອງຮຽນ.
ກ້ອງຖ່າຍຂອງນັກຂ່າວຖ່າຍທອດເອົາພາບເຫລົ່ານີ້ ອອກໄປທົ່ວໂລກ. ນາຍ Joel Gol-
dentyer ຈາກລັດ North Carolina ກ່າວວ່າ ພວກສື່ມວນຊົນແມ່ນເພັ່ງເລັງໃສ່ແຕ່ພວກ
ຄົນປະຫລາດເທົ່ານັ້ນ ແລະບໍ່ໄດ້ສົນໃຈໃນວັດຖຸປະສົງຂອງການປະທ້ວງແຕ່ຢ່າງໃດ.
ລາວເວົ້າວ່າ:
“ຂ້ອຍຢາກຈະໄດ້ຍິນໄດ້ຟັງຈາກພວກຄົນທໍາມະດາສາມັນຫລາຍກວ່າ. ຖ້າຫາກພວກ
ເຮົາຟັງວ່າພວກເຂົາເຈົ້າເວົ້າຫຍັງແລ້ວ ເຮົາກໍຈະຮູ້ວ່າແຕ່ລະຄົນສະແດງທັດສະນະຂອງ
ພວກເຂົາເຈົ້າໃນທາງທີ່ແຕກຕ່າງກັນໜ້ອຍນຶ່ງ ຊຶ່ງນີ້ເປັນເຄຶ່ອງໝາຍບອກໃຫ້ຮູ້ວ່າ ພວກ
ເຂົາເຈົ້າບໍ່ແມ່ນງົມງາຍເຮັດຕາມອຸດົມການໃດນຶ່ງເທົ່ານັ້ນ ແຕ່ພວກເຂົາເຈົ້າເວົ້າອອກມາ
ຈາກໃຈຈິງ.”
ບໍ່ມີບັນຫານຶ່ງດຽວອັນໃດ ທີ່ປຸ້ມລຸມພວກປະທ້ວງເຫລົ່ານີ້.
ພວກສະມາຊິກກໍາມະບານເຫລົ່ານີ້ ພາກັນປະນາມການປະຕິບັດ ທີ່ເຂົາເຈົ້າກ່າວຫາວ່າ
ບໍ່ຍຸຕິທໍາຕໍ່ແຮງງານໂດຍບໍລິສັດໃຫຍ່ໆ. ຄົນຜູ້ນີ້ຢາກຈະຈັບກຸມພວກນາຍທະນາຄານ
ໃນນາມຂອງພະເຢຊູ. ສ່ວນຜູ້ນີ້ກ່າວຫາພວກນັກການເມືອງວ່າ ຂາຍອໍານາດໃຫ້ພວກ
ບໍລິສັດໃຫຍ່ໆ. ອີກຜູ້ນຶ່ງຕ້ອງການຢາກໃຫ້ປະຊາຊົນບັນລຸໃນຄວາມໃຝ່ຝັນຂອງພວກ
ເຂົາເຈົ້າ. ແມ່ຍິງພວກນີ້ພາກັນປະທ້ວງການລົງໂທດປະຫານຊີວິດ ແລະອັນທີ່ຜູ້ນຶ່ງເອີ້ນ
ວ່າ ການຄວບຄຸມການສຶກສາໂດຍພວກບໍລິສັດໃຫຍ່ໆນັ້ນ. ສ່ວນບ່າວນ້ອຍຄົນນີ້ຖືປ້າຍ
ສະແດງຄວາມສະຫລາດຂອງຂົງຈື້ ກ່ຽວກັບການຊົມໃຊ້ຄວາມຮັ່ງ ມີແບບບໍ່ຖືກບໍ່ຕ້ອງ.
ຄລິກບ່ອນນີ້ ເພື່ອເບິ່ງວີດີໂອ ພາສາລາວ ຫລືຄລິກບ່ອນ mp4 ຫລື windows media
ຂ້າງເທິງຂວາມື
ພວກປະທ້ວງທີ່ເພັ່ງເລັງຄວາມໂກດແຄ້ນຂອງພວກເຂົາເຈົ້າໃສ່ Wall Street ຫລືສູນ
ກາງການເງິນຂອງສະຫະລັດນັ້ນ ພາກັນຍົກເອົາບັນຫາຄວາມຮັ່ງມີມາເປັນປະເດັນ ຊຶ່ງ
ພວກເຂົາເຈົ້າກ່າວວ່າ ຄວາມຮັ່ງມີສ່ວນໃຫຍ່ນັ້ນ ແມ່ນຢູ່ພາຍໃຕ້ການຄວບຄຸມຢ່າງບໍ່ຍຸຕິ
ທໍາຂອງພວກຮັ່ງມີທີ່ສຸດ ພຽງນຶ່ງເປີເຊັນຂອງອາເມຣິກາ.
ນັກເສດຖະສາດ Laurence Brahm ກ່າວຫາພວກບໍລິສັດໃຫຍ່ໆວ່າ ໃຊ້ເງິນທີ່ບໍລິຈາກ
ໃຫ້ແກ່ການຫາສຽງເລືອກຕັ້ງນັ້ນ ຊື້ເອົາການສະໜັບສະໜູນຈາກພວກນັກການເມືອງໂດຍ
ບໍ່ຄໍານຶງເຖິງການສູນເສຍຂອງພວກຄົນທີ່ຍັງເຫລືອ 99 ເປີເຊັນນັ້ນ. ທ່ານລໍລັ້ນສ໌ ບຣອມ
ເວົ້າວ່າ:
“ການເມືອງຂອງພວກເຮົາທັງໝົດນັ້ນ ແມ່ນເປັນການຮ້ອງໂຮແຂ່ງຂັນກັນລະຫວ່າງ
ພວກຄົນທີ່ເວົ້າວ່າ ໂອ…ລາວເປັນສັງຄົມນິຍົມ ລາວເປັນນາຍທຶນ ເປັນພັກຣີພັບບລິ
ກັນ ເປັນພັກເດໂມແຄຣທ. ຂ້າພະເຈົ້າເປັນຊາວອາເມຣິກັນ ທີ່ຕ້ອງການຢາກຈະເຫັນ
ປະເທດຊາດຂອງຂ້າພະເຈົ້າດີຂຶ້ນໄປກວ່ານີ້ ແລະມັນກໍບໍ່ສໍາຄັນວ່າ ເຮົານິຍົມຊ້າຍ
ຫລືຂວາ ເພາະທັງສອງພັກຝ່າຍຕ່າງກໍໄດ້ສູນເສຍວຽກເຮັດງານທໍາໄປ. ຄົນພວກນີ້
ບໍ່ມີວຽກມີການເຮັດແລ້ວ ແລະນັ້ນແມ່ນເຫດຜົນທີ່ພວກເຂົາເຈົ້າມາໂຮມຊຸມນຸມປະ
ທ້ວງຢູ່ທີ່ນີ້.”
ທຸງຊາດອາເມຣິກັນ ຊຶ່ງທຸງນຶ່ງມີຮູບສັນຍາລັກຂອງບໍລິສັດນາໆຊາດແທນທີ່ຮູບດາວ
50 ດວງນັ້ນ ພັດປິວຢູ່ຂ້າງທຸງສີດໍາທີ່ເປັນສັນຍາລັກຂອງອະນາທິປະໄຕຫລືການຂາດ
ກົດໝາຍ ແລະທຸງຊາດຂອງ Puerto Rico ຂອງຈີນ ແລະທຸງຫຍັງກໍບໍ່ຮູ້ ຊຶ່ງທັງໝົດ
ນັ້ນແມ່ນໃຫ້ການສະໜັບສະໜູນແກ່ປ້າຍຂອງຊາຍຄົນນີ້ ທີ່ຖາມວ່າ “ເຈົ້າມາຢູ່ທີ່ນີ້
ເຮັດຫຍັງ?” ນາຍ ໂຈລ ໂກລເດິລທາຍເອີ ກ່າວວ່າ:
“ສິ່ງທີ່ພວກຄົນເຫລົ່ານີ້ມີຮ່ວມກັນນັ້ນ ກໍຄືພວກເຮົາທັງໝົດຕ່າງກໍຕ້ອງການສັງຄົມ
ທີ່ຍຸດຕິທໍາກວ່າເກົ່າ ມີການແບ່ງແຍກເຊື້ອຊາດຜິວພັນໜ້ອຍລົງ ມີສົງຄາມໜ້ອຍລົງ
ມີຄວາມແຕກຕ່າງກັນລະຫວ່າງຄົນຮັ່ງແລະຄົນທຸກຍາກ ໜ້ອຍລົງ.”
ມາຮອດປັດຈຸບັນນີ້ Wall Street ແມ່ນບໍ່ໄດ້ເອົາຫົວຊາຕໍ່ການປະທ້ວງ ແລະວໍຊິງຕັນ
ກໍບໍ່ໄດ້ເຄື່ອນໄຫວໂດຍກົງແຕ່ຢ່າງໃດ ເພື່ອແກ້ໄຂບັນຫາຄວາມບໍ່ພໍໃຈຫລາຍໆປະ
ການຂອງພວກປະທ້ວງນັ້ນ. ຂະບວນການປະທ້ວງ Occupy Wall Street ນີ້ ບໍ່ມີ
ຜູ້ນໍາພາ ແລະບໍ່ມີລາຍການໃດໆ. ດັ່ງນັ້ນ ພວກທີ່ຕິດຕາມເບິ່ງຢູ່ຂ້າງນອກ ຈຶ່ງເອົາ
ຄວາມຫວັງຫລືຄວາມຢ້ານກົວຂອງພວກເຂົາເຈົ້າ ໄປພົວພັນໃສ່ກັບການປະທ້ວງນີ້
ຕາມທີ່ພວກເຂົາເຈົ້າຕ້ອງການ. ບາງຄົນມອງວ່າ ມັນເປັນອະນາທິປະໄຕ ຫລືສະພາບ
ການຂາດຂື່ຂາດແປ. ຄົນອື່ນໆຊໍ້າພັດມອງວ່າ ມັນເປັນປະຊາທິປະໄຕ.
ເບິ່ງວີດີໂອລາຍງານກ່ຽວກັບການປະທ້ວງຂອງຂະບວນການນີ້ໃນເຂດອື່ນໆຂອງປະເທດ: