ລິ້ງ ສຳຫລັບເຂົ້າຫາ

ວັນຈັນ, ໒໒ ກໍລະກົດ ໒໐໒໔

ຕໍາຫລວດ ຈັບພວກປະທ້ວງ ທີ່ຕະຫລາດຮຸ້ນນິວຢອກ 70 ກ່ວາຄົນ (ເບິ່ງວີດີໂອ)


ພວກປະທ້ວງທີ່ເອີ້ນວ່າ Occupy Wall Street ໃນນະຄອນນີວຢອກ
ພວກປະທ້ວງທີ່ເອີ້ນວ່າ Occupy Wall Street ໃນນະຄອນນີວຢອກ

ຕໍາຫລວດນີວຢອກ ໄດ້ຈັບກຸມພວກປະທ້ວງຫລາຍກວ່າ 70 ຄົນເມື່ອວັນເສົາວານນີ້ ໂຮມ
ທັງອີກຫລາຍສິບຄົນທີ່ຄຸ້ມ Times Square ທີ່​ໄດ້​ປະກອບສ່ວນ ​ໃນການເດີນຂະບວນ
ປະທ້ວງ​ໃນ​ທົ່ວໂລກມາເປັນເວລານຶ່ງເດືອນ ຕໍ່ຕ້ານອັນທີ່ພວກປະທ້ວງເອີ້ນວ່າຄວາມ
ໂລບມາກຂອງພວກບໍລິສັດໃຫຍ່ໆ​ນັ້ນ.

ພວກຕໍາຫລວດນີວຢອກ ທີ່ປະກອບດ້ວຍເຄື່ອງມືປາບການຈະລາຈົນ ແລະອີກຈຸນຶ່ງຂີ່ມ້າ ພະຍາຍາມຂັບໄລ່ພວກປະທ້ວງໃຫ້ໜີອອກຈາກຄຸ້ມ Time Square.

ການປະທ້ວງທີ່​ນິວຢອກເປັນພຽງນຶ່ງໃນຫລາຍໆການປະທ້ວງ​ໃນທົ່ວສະຫະ ລັດ ແລະທົ່ວ
ໂລກເມື່ອວັນເສົາວານນີ້ ທີ່ດົນໃຈໂດຍຂະ​ບວນການ Occupy Wall Street ຫລື ຄອບ
ຄອງ Wall Street ນັ້ນ.

ນັກສ້າງຮູບເງົາ Michael Moore ບອກວີໂອເອວ່າ ຕົນໄດ້ເຂົ້າປະກອບ ສ່ວນໃນການປະ
ທ້ວງ ຢູ່ຖະນົນ Wall Street ເພື່ອສະແດງຄວາມ​ເປັນ​ເອກ​ກະພາບກັບພວກປະທ້ວງ ​ໃນ​ການປະທ້ວງຕໍ່ຕ້ານພວກບໍລິສັດໃຫຍ່ໆ ໃນອາເມຣິການັ້ນ.

ສ່ວນທີ່ກຸງໂຣມ ປະເທດອິຕາລີ ພວກຕໍາຫລວດໄດ້ຍິງລະເບີດນໍ້າຕາ ແລະສີດປືນນໍ້າ ເວລາ
ພວກປະທ້ວງກຸ່ມນ້ອຍໆ​ກຸ່ມ​ນຶ່ງ​ແຍກ​ອອກຈາກກຸ່ມ ​ໃຫຍ່ຫລາຍຮ້ອຍຄົນ ທີ່ອັ່ງອໍຢູ່ຕາມຖະ
ນົນຫົນທາງນັ້ນ ​ແລ້ວ​ພາກັນທຸບ ກະຈົກ​ຮ້ານ​ຄ້າ​ຮ້າຍ​ຂາຍ ແລະຈູດ​ໄຟເຜົາ. ມີຕໍາຫລວດ
ອອກປະຕິບັດ ການຢ່າງໜາແໜ້ນໃນເມືອງຫລວງຂອງອິຕາລີ.

ທີ່ລອນດອນ ປະເທດອັງກິດ ກໍ​ມີ​ການ​ຊຸກຍູ້​ຕ່ອຍ​ຕີ​ກັນລະຫວ່າງຕໍາຫລວດ ກັບພວກປະ
ທ້ວງກຸ່ມ​ນຶ່ງ ໃນຈໍານວນຫລາຍຮ້ອຍຄົນ ທີ່​ໄປໂຮມຊຸມນຸມກັນ ຢູ່​ໃກ້ວິຫານ ຫລື​ໂບດ​ໃຫຍ່
St. Paul ນັ້ນ.

ນອກນີ້ແລ້ວ ການເດີນຂະບວນປະທ້ວງ ຍັງເກີດຂຶ້ນຢູ່ປະເທດອື່ນໆ ເຊັ່ນ ອອສເຕຣເລຍ
ນີວຊີແລນດ໌ ສະເປນ ເຢຍຣະມັນ ແລະ ຝຣັ່ງ ບ່ອນທີ່ສະມາຊິກຂອງກຸ່ມ 20 ປະເທດມະ
ຫາອໍານາດການເງິນກໍາລັງປະຊຸມກັນຢູ່ທີ່ນະຄອນຫລວງປາຣີ ເພື່ອປຶກສາຫາລືກັນເລຶ່ອງ
ວິກິດການເສດຖະກິດ ຂອງຢູໂຣບ.

ພວກເດີນຂະບວນປະທ້ວງຫລາຍຄົນ ພາກັນປະທ້ວງຄວາມບໍ່ເທົ່າທຽມ ກັນລະຫວ່າງພວກ
ຄົນຮັ່ງມີ ແລະຄົນທຸກຈົນ ໂດຍເອີ້ນພວກເຂົາເຈົ້າເອງວ່າ “ພວກ 99 ​ເປີ​ເຊັນ” ສົມ​ທຽບ​ກັບ
ພວກ 1 ເປີເຊັນ ທີ່ເຂົາເຈົ້າເວົ້າວ່າ ເປັນພວກ​ປະຊາກອນ​ທີ່ຮັ່ງມີທີ່ສຸດຂອງໂລກນັ້ນ.

XS
SM
MD
LG