ປະທານປະເທດຈີນ ທ່ານ ສີ ຈິ່ນຜິງ ເດີນທາງສູ່ນະຄອນຫຼວງ ວໍຊິງຕັນ ໃນວັນພະຫັດມື້ນີ້ ເພື່ອເຈລະຈາຫາລືກັບປະທານາທິບໍດີ ບາຣັກ ໂອບາມາ ກ່ຽວກັບບັນຫາທີ່ຫຍຸ້ງຍາກລວມມີ ການໂຈມຕີທາງຄອມພິວເຕີ, ສິດທິມະນຸດ ແລະເສດຖະກິດ, ຫຼັງຈາກໃຊ້ເວລາສອງມື້ທຳອິດໃນການຢ້ຽມຢາມຂອງທ່ານ ເພັ່ງເລັງໃສ່ສິ່ງທີ່ສຳຄັນທີ່ສຸດ ກ່ຽວກັບຄວາມ ສຳຄັນຂອງການຮ່ວມມືລະຫວ່າງທັງສອງປະເທດ.
ທ່ານ ສີ ໃນວັນພຸດວານນີ້ ໄດ້ພົບປະກັບຜູ້ນຳຂັ້ນສູງຂອງ ບໍລິສັດ ເທັກໂນໂລຈີທີ່ໃຫຍ່ທີ່ສຸດຂອງ ອາເມຣິກາ ລວມມີບໍລິສັດ Amazon, Apple, Microsoft, Boeing ແລະ Facebok. ຜູ້ນຳຂອງ ຈີນ ໄດ້ໃຫ້ການຄ້ຳປະກັນຕໍ່ພວກເຂົາເຈົ້າວ່າ ທ່ານມີຄວາມໝັ້ນໝາຍທີ່ຈະປັບປຸງ ດ້ານສິດທິຊັບສິນທາງປັນຍາ ແລະ ເຮັດໃຫ້ບໍລິສັດຕ່າງຊາດເຂົ້າໄປເຮັດທຸລະກິດໃນ ຈີນ ໄດ້ງ່າຍຂຶ້ນ.
ທ່ານ ສີ ໄດ້ກ່າວຕໍ່ຜູ້ບັນດາບໍລິຫານ, ກ່ອນເຂົ້າຊົມພື້ນທີ່ຂອງບໍລິສັດ Microsoft ແລະ ຢ້ຽມຢາມໂຮງງານ Boeing ທີ່ຢູ່ໃກ້ຄຽງວ່າ “ພວກເຮົາກຳລັງເຮັດວຽກເພື່ອສ້າງລະບົບທຸລະກິດທີ່ເປີດກວ້າງອັນໃໝ່, ຜັກດັນໃຫ້ມີການປະຕິຮູບການຄຸ້ມຄອງການລົງທຶນຂອງຕ່າງປະເທດ ແລະ ຫຼຸດຜ່ອນບັນດາຂໍ້ຫ້າມກ່ຽວກັບການລົງທຶນຂອງຕ່າງປະເທດລົງຢ່າງຫຼວງຫຼາຍ.”
ບໍລິສັດ Boeing ແລະ ທ່ານ ສີ ໄດ້ສວຍໃຊ້ໂອກາດນີ້ ປະກາດວ່າບໍລິສັດຂອງ ຈີນ ໄດ້ເຫັນດີທີ່ຈະຊື້ເຮືອບິນ 300 ລຳຈາກບໍລິສັດສ້າງເຮືອບິນຂອງ ສະຫະລັດ. ເຮືອບິນ Beoing 737 250 ລຳ ແລະ ເຮືອບິນລຳຕົວກວ້າງ 50 ລຳ ລວມລາຄາປະມານ 38 ຕື້ໂດລາ. ຂໍ້ຕົກລົງນີ້ ກໍຍັງໄດ້ຮຽກຮ້ອງໃຫ້ບໍລິສັດສ້າງເຮືອບິນຍັກໃຫຍ່ຂອງ ສະຫະລັດ ໄປສ້າງໂຮງງານຢູ່ໃນ ຈີນ ອີກດ້ວຍ.
ຜູ້ນຳທາງດ້ານທຸລະກິດຂອງ ສະຫະລັດ ກໍໄດ້ພະຍາຍາມຊອກຫາການ ຮັບປະກັນຢາງເປັນສ່ວນຕົວຈາກທ່ານ ສີ ວ່າບໍລິສັດຂອງພວກເຂົາຈະໄດ້ຮັບການປະຕິບັດຕໍ່ຢ່າງເປັນທຳ ໃນເວລາທີ່ພວກເຂົາເຈົ້າເຮັດທຸລະກິດຢູ່ໃນ ຈີນ, ແລະວ່າ ປັກກິ່ງຫຼຸດການລັກຂໍ້ມູນຄວາມລັບທາງດ້ານການຄ້າໃນຄອມພິວເຕີຢ່າງກວ້າງຂວາງຂອງພວກເຂົາ ທີ່ໄດ້ເຮັດໃຫ້ບັນດາບໍລິສັດຂອງ ອາເມລິກາ ເສຍລາຍໄດ້ໄປຫຼາຍຕື້ໃນໄລຍະສອງສາມປີທີ່ຜ່ານມານີ້.
