ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ກ່າວວ່າ
ສະຫະລັດສາມາດເປັນພາຄີທີ່ດີທີ່ສຸດ ກັບອິນເດຍ ໃນຂະນະທີ່
ທ່ານມ້ວນທ້າຍການຢ້ຽມຢາມນະຄອນ New Delhi ເປັນເວລາ
3 ມື້ ໃນວັນອັງ ຄານມື້ນີ້.
ທ່ານໂອບາມາ ກ່າວໃນລະຫວ່າງການພົບປະແບບບໍ່ເປັນທາງ
ການກັບພວກຊາວໜຸ່ມວ່າ “ອິນເດຍແລະສະຫະລັດ ບໍ່ພຽງແຕ່
ເປັນພາຄີຕາມທຳມະຊາດທີ່ແທ້ຈິງເທົ່ານັ້ນ. ຂ້າພະເຈົ້າເຊື່ອວ່າ
ອາເມຣິກາແມ່ນສາມາດເປັນພາຄີທີ່ດີທີ່ສຸດຂອງອິນເດຍ,”
ທ່ານໄດ້ກ່າວວ່າ ສະຫະລັດ ຕ້ອງການທີ່ຈະເປັນຄູ່ພາຄີກັບອິນເດຍ
ເພື່ອຈະຍົກລະດັບຜູ້ຄົນໃຫ້ພົ້ນຈາກຄວາມທຸກຈົນ, ເສີມຂະຫຍາຍໃຫ້ອຸດສາຫະກຳແລະເທັກໂນໂລຈີເຕີບໂຕຕື່ມຂຶ້ນ ແລະຮັບມືກັບການປ່ຽນແປງຂອງດິນຟ້າອາກາດ. ທ່ານໄດ້ກ່າວວ່າອິນເດຍສາມາດເປັນຜູ້ມີອິດທິພົນຢ່າງແຂງແຮງ ເພື່ອໃຫ້ມີ ການປ່ຽນແປງຢູ່ໃນປະເທດໃກ້ຄຽງ ຕະຫລອດທັງ ໂດຍສະເພາະແລ້ວໃນການຊຸກຍູ້ສະໜັບສະໜຸນ ຕໍ່ຄວາມຈຳເປັນ ໃນການສັກຢາປ້ອງກັນໂຣກຕ່າງໆ ຂອງພວກເດັກນ້ອຍນັ້ນ.
ທ່ານໂອບາມາ ຍັງຮຽກຮ້ອງໃຫ້ມີການຊຸກຍູ້ກ່ຽວກັບການນຳໃຊ້ເຊື້ອໄຟທີ່ສະອາດຂຶ້ນ ເພື່ອຮັບມືກັບສະ ພາວະໂລກຮ້ອນ. ທ່ານໄດ້ກ່າວວ່າ ໂລກເຮົານີ້ ບໍ່ມີໂອກາດແມ້ນແຕ່ນ້ອຍທີ່ຈະ
ສຳເລັດໄດ້ ໃນເລື້ອງການປ່ຽນແປງຂອງດິນຟ້າອາກາດ ນອກຈາກວ່າ ບັນດາປະເທດທີ່
ກຳລັງພັດທະນາ ຊຶ່ງມີອິນເດຍນຳ ຮວມຢູ່ໃນນັ້ນ ພາກັນຫລຸດການນຳໃຊ້ເຊື້ອໄຟທີ່ມາ
ຈາກຊາກພືດແລະສັດ. ທ່ານໄດ້ກ່າວວ່າ ມີບາງປະເທດທີ່ຈະໄດ້ຮັບຜົນກະທົບຫຼາຍກວ່າ
ອິນເດຍ ຈາກລະດັບນ້ຳທະເລທີ່ສູງຂຶ້ນ, ການເປື່ອຍຂອງແຜ່ນນ້ຳແຂງຈາກພູຫິມະໄລ ຕະຫລອດທັງລົມມໍລະສຸມ ແລະລົມພາຍຸ cyclone ທີ່ແຮງຂຶ້ນ ຊຶ່ງເຮັດໃຫ້ການ ປ່ຽນແປງຂອງດິນຟາອາກາດ--ໃນຄຳເວົ້າຂອງທ່ານແລ້ວ ເປັນ “ການທ້າທ້າຍຂອງໂລກທີ່ຮີບດ່ວນນັ້ນ” --ແມ່ນສາມາດເກີດຂຶ້ນໄດ້.
ໃນຂະນະທີ່ປະທານາທິບໍດີສະຫະລັດ ຮຽກຮ້ອງໃຫ້ມີການພັດທະນາແຫລ່ງພະລັງງານທີ່ໝູນໃຊ້ຄືນໃໝ່ ນັ້ນ ທ່ານກໍໄດ້ກ່າວຢ່າງໜັກແໜ້ນວ່າ ອິນເດຍແລະສະຫະລັດ ສາມາດຕົກລົງກັນໄດ້ເຖິງຄວາມຈຳເປັນ ທີ່ໂລກເຮົາບໍ່ຕ້ອງມີອາວຸດນິວເຄລຍ. ອິນເດຍແລະສະຫະລັດ ແມ່ນສອງປະເທດ ໃນບັນດາບໍ່ເທົ່າໃດປະເທດຢູ່ໃນທົ່ວໂລກ ທີ່ມີອາວຸດນິວເຄລຍ.
ປ. ໂອບາມາ ຢ້ຽມຢາມ ອິນເດຍ
