ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ຮຽກຮ້ອງ
ໃຫ້ຄູ່ຕຳແໜ່ງຝ່າຍອີຈິບ ຄື ທ່ານ Abdel Fattah al-Sisi ຈົ່ງ
ສະໜອງຕອບຕໍ່ຄວາມໄຝ່ຝັນທາງດ້ານການເມືອງ ເສດຖະກິດ
ແລະ ສັງຄົມ ຂອງປະຊາຊົນຊາວອີຈິບ.
ໃນການໂອ້ລົມສົນທະນາກັນທາງໂທລະສັບ ເມື່ອວັນພະຫັດ
ວານນີ້ ປະທານາທິບໍດີໂອບາມາ ໄດ້ສະແດງຄວາມກັງວົນ
ຂອງສະຫະລັດ ກ່ຽວກັບການດຳເນີນຄະດີຮວມໝູ່ ຂະໜາດໃຫຍ່
ການກັກຂັງບັນດານັກຂ່າວ ແລະ ບັນດານັກເຄື່ອນໄຫວທີ່ສັນຕິ
ທີ່ຍັງມີຢ່າງຕໍ່ເນື່ອງ ແລະສະຖານະພາບຂອງບັນດາອົງການ ທີ່ບໍ່
ຂຶ້ນກັບລັດຖະບານ.
ບັນດາສະມາຊິກຂອງຝ່າຍຄ້ານ ຫຼາຍຮ້ອຍຄົນ ໃນອີຈິບ ໄດ້ຖືກຕັດສິນລົງໂທດປະຫານ
ຊີວິດ ໃນການດຳເນີນຄະດີ ທີ່ວ່ອງໄວ ແລະ ບັນດານັກຂ່າວຫຼາຍໆຄົນ ກໍກຳລັງຮັບໃຊ້ໂທດ ຈຳຄຸກໄລຍະຍາວນານ.
ທ່ານໂອບາມາ ຍັງໄດ້ສະແດງຄວາມເສຍອົກເສຍໃຈຕໍ່ຊາວອີຈິບ ຜູ້ທີ່ໄດ້ປະສົບກັບການ
ໂຈມຕີຫຼາຍໆບັ້ນ ຂອງພວກກໍ່ການຮ້າຍ. ທ່ານໄດ້ໃຫ້ການຢືນຢັນວ່າ ຈະສືບຕໍ່ໃນຄວາມ
ໝາຍໝັ້ນຂອງສະຫະລັດ ທີ່ເປັນພາຄີກັບອີຈິບ ໃນການສູ້ລົບກັບພວກກໍ່ການຮ້າຍ ແລະ
ເສີມຂະຫຍາຍຄວາມໝັ້ນຄົງ ໃນຂົງເຂດນັ້ນ.
