ອີງຕາມທ່ານ Robert Gibbs ເລຂານຸການຝ່າຍຂ່າວຂອງທຳນຽບຂາວ ກໍແມ່ນວ່າ ເມື່ອຮອດຜຽນຂອງທ່ານຂຶ້ນກ່າວຄໍາປາໃສຕໍ່ກອງປະຊຸມສະມັດຊາໃຫຍ່ສະຫະປະຊາຊາດນັ້ນ ຫລາຍໆບັນຫາທີ່ທ່ານປະທານາທິບໍດີ ໂອບາມາ ຈະຍົກ ເອົາມາເວົ້ານັ້ນ ຈະເປັນເລື້ອງທີ່ເຮົາເຄີຍໄດ້ຍິນຢູ່ເລື້ອຍໆ. ທ່ານ Gibbs ກ່າວຕໍ່ສື່ມວນຊົນເມື່ອວັນສຸກຜ່ານມານັ້ນ ວ່າ ເລື້ອງການແຜ່ຜາຍນິວເຄລຍຈະຢູ່ໃນລະດັບສູງຂອງ ບັນຊີ ຊຶ່ງທ່ານກ່າວເພີ້ມເຕີມວ່າ “ຫລາຍໆບັນຫາທີ່ພວກເຮົາໄດ້ເວົ້າເຖິງ ຢູ່ທີ່ສະຫະປະຊາຊາດໃນປີກາຍນີ້ ຍັງຄົງ ເປັນບັນຫາທີ່ຄ້າງຄາ ແກ້ໄຂບໍ່ທັນໄດ້ເທື່ອ ເຊ່ນ ບັນຫາຄວາມເປັນຫ່ວງກ່ຽວກັບອີຣ່ານ ແລະຄວາມເປັນຫ່ວງກ່ຽວ ກັບເກົາຫລີເໜືອ.”
ໃນຄໍາປາໃສຂອງທ່ານຕໍ່ກອງປະຊຸມສະມັດຊາໃຫຍ່ສະຫະປະຊາຊາດ ປີ 2009 ນັ້ນ ທ່ານໂອບາມາໄດ້ກ່າວເຕືອນ ອີຣ່ານແລະເກົາຫລີເໜືອ ກ່ຽວກັບກິດຈະກໍາດ້ານນີວເຄລຍຂອງເຂົາເຈົ້າ.
“ແຕ່ຖ້າຫາກວ່າລັດຖະບານອິຣ່ານ ແລະເກົາຫລີເໜືອເລືອກທີ່ຈະບໍ່ເອົາຫົວຊາຕໍ່ ມາດຕະຖານຂອງນາໆຊາດ ຖ້າຫາກວ່າພວກເຂົາເຈົ້າພາກັນໃຫ້ຄວາມສໍາຄັນແກ່ ການສ້າງອາວຸດນິວເຄລຍຫລາຍກວ່າ ສະຖຽນລະພາບ ແລະຄວາມໝັ້ນຄົງໃນ ຂົງເຂດ ແລະໂອກາດສໍາລັບພວກປະຊາຊົນຂອງເຂົາເຈົ້າເອງ. ຖ້າຫາກວ່າ ພວກເຂົາເຈົ້າບໍ່ຄໍານຶງເຖິງໄພອັນຕະລາຍຕ່າງໆຈາກການແຂ່ງຂັນອາວຸດນິວເຄລຍ ທີ່ເພິ່ມທະວີຂຶ້ນນັບມື້ ໃນທັງຂົງເຂດເອເຊຍຕາເວັນອອກ ແລະພາກຕາເວັນອອກ ກາງນັ້ນແລ້ວ ພວກເຂົາເຈົ້າກໍຈະຕ້ອງຮັບຜິດຊອບໃນເລື້ອງນີ້.”
ໃນໄລຍະນຶ່ງປີທີ່ຕິດຕາມມານັ້ນ ກໍຍັງບໍ່ມີຮ່ອງຮອຍຢ່າງເປີດເຜີຍໃດໆ ທີ່ສະແດງໃຫ້ເຫັນ ວ່າ ເກົາຫລືເໜືອພ້ອມທີ່ຈະກັບຄືນເຂົ້າມາຮ່ວມການເຈລະຈາ 6 ຝ່າຍກ່ຽວກັບໂຄງການ ນິວເຄລຍຂອງຕົນນັ້ນ. ລັດຖະບານພຽງຢາງໄດ້ຍ່າງອອກໜີຈາກກອງປະຊຸມ ໃນເດືອນເມສາ 2009.
ສໍາລັບອິຣ່ານນັ້ນ ສະຫະປະຊາຊາດໄດ້ນໍາໃຊ້ມາດຕະການລົງໂທດຊຸດທີ 4 ໃນເດືອນມິຖຸ ນາຜ່ານມາ ຫລັງຈາກທີ່ອິຣ່ານໄດ້ປະຕິເສດບໍ່ຍອມຢຸດເຊົາການກັ່ນທາດຢູເຣນຽມໃໝ່ເພື່ອ ເສີມສະມັດຕະພາບ ໃຫ້ສາມາດນໍາໃຊ້ເຂົ້າໃນການຜະລິດອາວຸດໄດ້ນັ້ນ.
ທາງຝ່າຍສະຫະຣັດ ກໍໄດ້ທໍາຄວາມຄືບໜ້າຫລາຍຂຶ້ນ ໃນປີຜ່ານມາໃນການເຮັດວຽກຮ່ວມ ກັນກັບຣັດເຊຍ ເພື່ອລົດຄັງແສງອາວຸດນິວເຄລຍຂອງອະດີດຄູ່ແຂ່ງສົງຄາມເຢັນ ສອງປະເທດນີ້ລົງ ຊຶ່ງເລື້ອງນີ້ກໍເປັນຈຸດສໍາຄັນອັນນຶ່ງ ໃນຄໍາປາໃສຂອງທ່ານໂອບາມາຕໍ່ອົງການສະຫະປະຊາຊາດ ເມື່ອປີຜ່ານມານີ້ ຊຶ່ງທ່ານໄດ້ກ່າວວ່າ:
“ພວກເຮົາຈະສືບຕໍ່ພະຍາຍາມໃຫ້ບັນລຸຂໍ້ຕົກລົງໃໝ່ສະບັບນຶ່ງ ກັບຣັດເຊຍ ເພື່ອ ຫລຸດຜ່ອນຫົວລະເບີດຂີປະນາວຸດ ແລະຖານຍິງຕ່າງໆ ລົງໃຫ້ໄດ້ຢ່າງຫລວງ ຫລາຍສົມຄວນ.”
ປະທານາທິບໍດີໂອບາມາ ແລະປະທານາທິບໍດີຣັດເຊຍ ທ່ານ Dmitry Medvedev ໄດ້ເຊັນສັນຍາສົນທິສັນຍາ START ສະບັບໃໝ່ເມື່ອ ເດືອນເມສາຜ່ານມານິ້ ຢູ່ນະຄອນ ຫລວງ Prague ຂອງສາທາລະນະລັດ Czech. ຄະນະກໍາມະການພົວພັນຕ່າງປະເທດ ຂອງສະພາສູງສະຫະລັດ ໄດ້ຮັບຮອງເອົາສົນທິສັນຍາສະບັບດັ່ງກ່າວ ໃນວັນພະຫັດຜ່ານ ມານີ້. ແຕ່ຂໍ້ຕົກລົງສະບັບນີ້ກໍຍັງຕ້ອງໄດ້ຮັບສັດຕະຍາບັນຈາກສະພາສູງສະຫະລັດຄົບຊຸດ ແລະ ສະພາດູມາຂອງຣັດເຊຍຄົບຊຸດເສຍກ່ອນ ຈຶ່ງຈະ ມີຜົນປະຕິບັດໄດ້.
ທ່ານ Robert Gibbs ເລຂານຸການຝ່າຍຂ່າວຂອງທໍານຽບຂາວ ກ່າວວ່າ ສົນທິສັນຍາ ສະບັບນີ້ ກໍຈະເປັນຈຸດເດັ່ນໃນຄໍາປາໃສຂອງປະທານາທິບໍດີໂອບາມາ ເຊັ່ນກັນ.
ດັ່ງທີ່ປະທານາທິບໍດີໄດ້ໃຫ້ຄໍາໝັ້ນສັນຍາໄວ້ໃນປີກາຍນີ້ ລັດຖະບານຂອງທ່ານໄດ້ເສັດສິ້ນການທົບທວນຄືນເບິ່ງທ່າທີດ້ານນີວເຄລຍຂອງຕົນໃໝ່ເຊັ່ນກັນ ແລະກໍໄດ້ເປັນເຈົ້າພາບຈັດ ກອງປະຊຸມສຸດຍອດວ່າດ້ວຍຄວາມປອດໄພຂອງວັດຖຸ ນີວເຄລຍ ຫລືປ້ອງກັນບໍ່ໃຫ້ມີວັດຖຸນິວເຄລຍ ທີ່ບໍ່ມີການຄວບຄຸມນັ້ນ ຢູ່ໃນໂລກນີ້. ແຕ່ທາງສະພາສູງສະຫະລັດກໍຍັງບໍ່ໄດ້ໃຫ້ ສັດຕະຍາບັນແກ່ສົນທິສັນຍາຫ້າມທົດລອງນີວເຄລຍແບບຄົບຖ້ວນຮອບດ້ານນັ້ນເທື່ອ.
ນອກນີ້ແລ້ວ ປະທານາທິບໍດີໂອບາມາກໍຄົງຈະອຸທິດພາກສ່ວນນຶ່ງຂອງຄໍາປາໃສຂອງທ່ານ ຕໍ່ອົງການສະຫະປະຊາຊາດນັ້ນ ເພື່ອເວົ້າເຖິງເລື້ອງຂັ້ນຕອນການດໍາເນີນງານສ້າງສັນຕິ ພາບໃນພາກຕາເວັນອອກກາງ ເຊັ່ນດຽວກັນກັບທີ່ທ່ານໄດ້ເຮັດໃນປີກາຍນີ້ ຊຶ່ງທ່ານໂອບາ ມາໄດ້ກ່າວວ່າ
“ມັນເຖິງເວລາແລ້ວທີ່ຈະທໍາການເຈລະຈາກັນຄືນໃໝ່ ທີ່ບໍ່ມີການວາງ ເງື່ອນໄຂ ລ່ວງໜ້າໃດໆ ທີ່ຈະຫາທາງແກ້ໄຂບັນຫາທີ່ມີສະຖານະພາບຖາວອນຕ່າງໆ: ຄືບັນຫາຄວາມໝັ້ນຄົງສໍາລັບຊາວອິສຣາແອລ ແລະຊາວປາເເລສໄຕນ໌ ບັນຫາຊາຍ ແດນ ພວກອົບພະຍົບ ແລະນະຄອນເຢຣູຊາແລມ.”
ຍ້ອນການໄກ່ເກັ່ຍຂອງສະຫະລັດ ເມື່ອບໍ່ນານມານີ້ ທັງສອງຝ່າຍກໍໄດ້ເລີ່ມການເຈລະຈາກັນ ບັ້ນໃໝ່ອີກບັ້ນນຶ່ງ ໂດຍມີເປົ້າໝາຍທີ່ຈະຕົກລົງກັນ ໃນບັນຫາສຳຄັນຕ່າງໆ ທັງໝົດໃຫ້ໄດ້ພາຍໃນນຶ່ງປີ. ແລະທ່ານໂອບາມາກໍຄົງຈະກ່າວເຖິງການພົວພັນຂອງອາເມຣິກາຢູ່ໃນອີຣັກ ເໝືອນດັ່ງທີ່ໄດ້ເວົ້າໃນປີ 2009 ນັ້ນ ຊຶ່ງທ່ານໄດ້ກ່າວວ່າ
“ພວກເຮົາໄດ້ຖອນກອງພົນລົບອາເມລິກັນອອກຈາກຫົວເມືອງຕ່າງໆ ຂອງອີຣັກ ແລະໄດ້ກໍານົດເອົາເດືອນສິງຫາ ປີໜ້ານີ້ ເປັນວັນເສັ້ນຕາຍ ສໍາລັບຖອນກອງພົນ ລົບຂອງພວກເຮົາທັງໝົດອອກໄປຈາກດິນແດນຂອງອີຣັກ.”
ແລະສະຫະລັດກໍໄດ້ປະຕິບັດສໍາເລັດຕາມກໍານົດເສ້ນຕາຍທີ່ໄດ້ຕັ້ງໄວ້ນັ້ນ. ສ່ວນກຳລັງທະ ຫານສະຫະລັດ ທີ່ຍັງປະຈໍາການຢູ່ໃນອີຣັກຕໍ່ໄປອີກປະມານ 50,000 ຄົນນັ້ນ ກໍແມ່ນຈະປະກອບພາລະກິດຂອງພົນລະເຮືອນ ແຕ່ກໍກຽມພ້ອມທີ່ຈະທໍາການສູ້ລົບໄດ້ ຖ້າຫາກມີ ຄວາມຈໍາເປັນ.
ນອກເວລາຂອງກອງປະຊຸມສະມັດຊາໃຫຍ່ນັ້ນ ທ່ານໂອບາມາຍັງຈະພົບປະຫາລືກັນສອງ ຝ່າຍກັບພວກຜູ້ນໍາໂລກຄົນອື່ນໆອີກຫລາຍຄົນ ໃນນັ້ນກໍມີນາຍົກລັດຖະມົນຕີຈີນ ທ່ານເຫວິນ ເຈ້ຍບາວ ກັບນາຍົກລັດຖະມົນຕີຍີ່ປຸ່ນ ທ່ານນາໂອໂຕ໊ະ ຄັນ ຊຶ່ງທ່ານໂອບາມາ ຈະພົບປະກັນຄົນລະເທື່ອກັບສອງທ່ານນີ້. ນອກຈາກນັ້ນແລ້ວ ທ່ານໂອບາມາ ກໍຍັງຈະພົບປະກັບພວກ ຜູ້ນໍາຂອງສະມາຄົມອາຊ່ຽນ ນໍາອີກ.
