ຜູ້ສະໝັກເປັນປະທານາທິບໍດີສະຫະລັດ ທັງທ່ານ Donald Trump ແລະທ່ານນາງ Hillary Clinton ກຳລັງສຸມຄວາມພະຍາຍາມຂອງພວກທ່ານ ໃສ່ລັດ Carolina ເໜືອ ແລະລັດ Florida ໃນວັນພະຫັດມື້ນີ້ ຊຶ່ງທັງສອງລັດນີ້ ຖືກມອງກັນ ໂດຍທັງສອງວ່າ
ເປັນໄຊຊະນະທີ່ສຳຄັນຍິ່ງ ຕໍ່ການເລືອກຕັ້ງໃນວັນທີ 8 ພະຈິກນີ້.
ທ່ານ Trump ມີໝາຍກຳນົດ ຈັດການໂຮມຊຸມນຸມຢູ່ 4 ບ່ອນ ໃນເຂດແຄມຝັ່ງພາກຕາເວັນອອກຂອງສະຫະລັດໃນວັນພະຫັດມື້ນີ້ ເລີ່ມຕົ້ນທີ່ພາກເໜືອຂອງລັດ Florida ໃນເມືອງ Jacksonville ກ່ອນທີ່ຈະມຸ່ງໜ້າໄປລັດ Pennsylvania ແລະສິ້ນສຸດລົງດ້ວຍການໂຄສະ
ນາຫາສຽງສອງຄັ້ງ ໃນລັດ Carolina ເໜືອ.
ໃນຂະນະດຽວກັນນັ້ນ ທ່ານນາງ Clinton ມີໝາຍກຳນົດ ໂຄສະນາຫາສຽງຢູ່ 2 ບ່ອນ ໃນລັດ Carolina ເໜືອ ຊຶ່ງບ່ອນທຳອິດ ແມ່ນທີ່ເມືອງ Greenville ຕິດຕາມມາເມືອງ Raleigh ທີ່ໃກ້ຄຽງນັ້ນ. ປະທານາທິບໍດີ ບາຣັກ ໂອບາມາ ຈະລົງໂຄສະ ນາຫາສຽງ ໃຫ້ທ່ານນາງ Clinton ໃນລັດ Florida ດ້ວຍການຢຸດແວ່ທີ່ນະຄອນ Miami ທີ່ໄດ້ວາງແຜນໄວ້ນັ້ນ ແລະຕໍ່ມາກໍຈະແມ່ນເມືອງ Jacksonville ຊຶ່ງຢູ່ຫ່າງກັນພຽງແຕ່ 30 ໄມລ໌ ເທົ່ານັ້ນ ຈາກບ່ອນທີ່ທ່ານ Trump ໄດ້ທຳການໂຄສະນາສຽງນັ້ນ.
ໃນການຢັ່ງຫາງສຽງໃນຫວ່າງມໍ່ໆມານີ້ ຈາກທາງສອງລັດ ສະແດງໃຫ້ເຫັນວ່າ ທັງສອງຜູ້ສະໝັກ ແມ່ນມີຄະແນນສູສີກັນ ໃນສັບປະດາສຸດທ້າຍຂອງການໂຄສະນາຫາສຽງທີ່ຈະສິ້ນສຸດລົງນັ້ນ. ແຮງກະຕຸ້ນ ແມ່ນເບິ່ງຄືວ່າຈະເຂົ້າຂ້າງທ່ານ Trump ຊຶ່ງທ່ານສາມາດທີ່ຈະປິດຊ່ອງຫວ່າງ 4 ເປີເຊັນ ທີ່ຫຼຸດຕ່ຳລົງຂອງທ່ານ ໃນລັດ Florida ແລະ 3 ເປີເຊັນ ໃນລັດ Carolina ເໜືອ ນັບຕັ້ງແຕ່ການເລີ້ມຕົ້ນ ໃນສັບປະດາທີ່ແລ້ວ ອິງຕາມການສະເຫຼ່ຍຂອງການຢັ່ງຫາສຽງຈາກ Real Clear Politics.
ລັດ Carolina ເໜືອ ແລະ Florida ນັ້ນຖືກວ່າ ເປັນລັດທີ່ເອົາແນ່ເອົານອນບໍ່ໄດ້ ເພາະວ່າ ບໍ່ຄືກັນກັບບັນດາລັດອື່ນໆ ຊຶ່ງອາດຈະປ່ຽນໄປທາງພັກໃດກໍໄດ້ ໃນການລົງຄະແນນເລືອກຕັ້ງປະທານາທິບໍດີ.
ເຊີນຊົມ: ທ່ານ Trump ກ່າວ ເຖິງບັນຫາຂອງການຊະນະຂອງທ່ານນາງ Clinton
ຍົກຕົວຢ່າງເຊັ່ນລັດ Carolina ເໜືອ ແລະລັດ Florida ແມ່ນປ່ຽນໄປທາງທ່ານໂອບາມາ ໃນປີ 2008 ແຕ່ກັບປ່ຽນໄປໃນປີ 2012 ໃຫ້ສະໜັບສະໜຸນຕໍ່ຜູ້ສະໝັກຂອງພັກ Republican ທ່ານ Mit Romney ແທນ.
ລັດ Florida ໄດ້ລົງຄະແນນສອງຄັ້ງ ໃຫ້ຜູ້ສະໝັກພັກ Republican ທ່ານ George W. Bush ໃນປີ 2000 ແລະປີ 2004 ແຕ່ວ່າໄດ້ປ່ຽນກັບມາສະໜັບສະໜຸນທ່ານໂອບາມາ
ໃນປີ 2008 ແລະປີ 2012 ຊຶ່ງການເລືອກຕັ້ງໃນປີ 2012 ນັ້ນ ແມ່ນມີຄະແນນລື່ນກັນ
ພຽງແຕ່ .9 ເປີເຊັນ ຂອງຈຳນວນບັດທີ່ປ່ອນທັງໝົດ.
ທັງສອງລັດນີ້ ແມ່ນຖືກມອງກັນວ່າ ເປັນລັດທີ່ມີບົດບາດສຳຄັນ ໃນບັນດາລັດທີ່ບໍ່ແນ່ນອນຍ້ອນຈຳນວນຄະແນນສຽງຂອງຜູ້ແທນລັດແມ່ນມີສູງ ໂດຍທີ່ລັດ Carolina ເໜືອ ມີ 15 ຄະແນນ ແລະລັດ Florida ມີ 29 ຄະແນນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
ເຊີນຊົມ: ທ່ານໂອບາມາ ເອີ້ນທ່ານ Trump ວ່າ ເປັນຜູ້ທີ່ບໍ່ເໝາະສົມ ທີ່ເປັນເອກກະລັກ
