ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ປ. ໂອບາມາ ຈະວີໂຕ້ ຮ່າງກົດໝາຍ 11 ກັນຍາ


ຮູບພາບການໂຈມຕີ ເມື່ອວັນທີ 11 ປີ 2001 ທີ່ແນມເຫັນ ຄວັນພຸ່ງຂຶ້ນສູ່ທ້ອງຟ້າ ຈາກຕຶກແຝດສູນການຄ້າໂລກ ທີ່ຖືກພວກຈີ້ເຮືອບິນ ບັງຄັບໃຫ້ເຮືອບິນ ບິນເຂົ້າຕຳ.
ຮູບພາບການໂຈມຕີ ເມື່ອວັນທີ 11 ປີ 2001 ທີ່ແນມເຫັນ ຄວັນພຸ່ງຂຶ້ນສູ່ທ້ອງຟ້າ ຈາກຕຶກແຝດສູນການຄ້າໂລກ ທີ່ຖືກພວກຈີ້ເຮືອບິນ ບັງຄັບໃຫ້ເຮືອບິນ ບິນເຂົ້າຕຳ.

ປະທານາທິບໍດີ​ສະຫະລັດ ທ່ານ​ບາຣັກ ​ໂອ​ບາ​ມາ ​ໃນ​ວັນ​ສຸກ​ມື້ນີ້ ຈະ​ໃຊ້​ສິດ​ຢັບຢັ້ງຫຼືວີ​ໂຕ້​ຕໍ່​ຮ່າງ​ກົດໝາຍ ທີ່​ຈະ​ອະນຸຍາດ​ໃຫ້​ພວກ​ທີ່​ລອດ​ຊີວິດ​ມາ​ໄດ້ ​ແລະ​ຍາດ​ພີ່ນ້ອງ ​ຂອງ​ພວກ​ທີ່​ເສຍ​ຊີວິດ​ເກືອບ 3,000 ຄົນ​ ໃນ​ການ​ໂຈມ​ຕີ​ຂອງ​ພວກ​ກໍ່​ການຮ້າຍຢູ່​ໃນ​ສະຫະລັດ​ເມື່ອ​ວັນ​ທີ 11 ກັນ​ຍາ​ປີ 2001 ນັ້ນ ຟ້ອງ​ລັດຖະບານ​ຊາ​ອຸດີ ອາ​ຣາ​ເບຍເພື່ອ​ຮຽກຮ້ອງ​ເອົາ​ຄ່າ​ເສຍ​ຫາຍ​.

ທ່ານ​ໂອ​ບາ​ມາ ກ່າວ​ວ່າ ຮ່າງ​ກົດໝາຍ​ສະບັບ​ນີ້ຈະ​ເຮັດ​ໃຫ້​ຊາວ​ອາ​ເມຣິກັນ​ຢູ່​ໃນຕ່າງປະ​ເທດຕົກ​ຢູ່​ໃນ​ຄວາມ​ສ່ຽງ​ທາງ​ດ້ານ​ກົດໝາຍ​.

ທ່ານ Josh Earnest ​ໂຄສົກ​ຂອງ​ທຳນຽບຂາວ​ກ່າວ​ວ່າ “ພວກ​ເຮົາ​ເຊື່ອ​ວ່າ ນີ້​ແມ່ນ​ຮ່າງ​ກົດໝາຍ​ທີ່​ບໍ່​ດີ.”

​ເປັນ​ທີ່​ຄາດ​ກັນ​ວ່າ ລັດຖະສະພາ​ສະຫະລັດຈະ​ພະຍາຍາມ​ຫາ​ທາງ​ເອົາ​ຊະນະຕໍ່​ການ​ໃຊ້​ສິດ​ຢັບຢັ້ງ ຂອງ​ປະທານາທິບໍດີ ຊຶ່ງສະມາ​ຊິກ​ສະພາ​ ຕ້ອງການ​ຄະ​ແນນ​ສຽງ ​ສອງ​ສ່ວນ​ສາມຈຶ່ງ​ຈະ​ສຳເລັດ​ເສັດ​ສິ້ນ​ໄດ້.

ຊາ​ອຸ​ດີ​ໄດ້​ປະຕິ​ເສດ​ວ່າ ຕົນ​ບໍ່​ມີ​ສ່ວນ​ພົວພັນ​ໃດໆ​ໃນ​ການ​ໂຈມ​ຕີ​ ທີ່​ຮ້າຍ​ແຮງ​ສຸດ ​ເທົ່າ​ທີ່​ເຄີຍ​ມີ​ມາ​ຢູ່​ໃນສະຫະລັດ. ​ແຕ່​ແນວ​ໃດ​ກໍ​ຕາມ 15 ຂອງພວກ​ຈີ້ເຮືອບິນ​ ທັງ​ໝົ​ດ 19 ຄົນ ທີ່ໄດ້​ຈີ້​ເຮືອບິນ​ໂດຍສານ​ອາຍ​ພົ່ນ 4 ລຳ ​ເພື່ອ​ທຳ​ການ​ໂຈມ​ຕີ​ທີ່​ນະຄອນ​ນິວຢອກ​ແລະ​ວໍ​ຊິງ​ຕັນ​ນັ້ນ ​ແມ່ນ​ລະບຸ​ວ່າ​ເປັນ​ຊາວ​ຊາ​ອຸ​ດີ.

ອົງການ​ຂ່າວ​ຝຣັ່ງລາຍ​ງານ​ວ່າ ຕົນ​ໄດ້ເຫັນ​ຈົດໝາຍທີ່​ສົ່ງ​ໄປ​ຫາ​ສະມາຊິກ​ສະພາຈາກ​ທີ່​ປຶກສາ​ດ້ານ​ຄວາມ​ປອດ​ໄພ​ ລະດັບ​ສູງ​ຈຳນວນ​ນຶ່ງ ຮວມທັງ​ອະດີດ ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ William Cohen ອະດີດ​ຫົວໜ້າ​ອົງການ​ສືບ​ລັບ​ຊີ​ໄອ​ເອ​ Michael Morell ​ແລະ Stephen Hadley ທີ່​ປຶກສາ​ດ້ານຄວາມ​ໝັ້ນຄົງ​ແຫ່ງ​ຊາດ​ຂອງອະດີດປະ​ທານາທິບໍດີ George W. Bush ​ໂດຍ​ເຕືອນວ່າ ​ມາດ​ຕະການ​ດັ່ງກ່າວ​ນີ້ຈະ​ສ້າງ​ຄວາມ​ເສຍ​ຫາຍ​ໃຫ້​ແກ່​ຜົນ​ປະ​ໂຫຍ​ດຂອງ​ສະຫະລັດ.

ຈົດໝາຍນີ້ ​ຍັງ​ກ່າວ​ຕື່ມ​ວ່າ “ຜົນ​ປະ​ໂຫຍ​ດດ້ານ​ຄວາມ​ໝັ້ນຄົງ​ແຫ່ງ​ຊາດ​ ຂອງ​ພວກເຮົາ ຄວາມ​ສາມາດ​ໃນ​ການ​ຕໍ່ສູ້​ກັບ​ພວກ​ກໍ່​ການ​ຮ້າຍ​ຂອງ​ພວກ​ເຮົາ ​ແລະ​ບົດບາດການ​ເປັນ​ຜູ້ນຳ​ຂອງ​ພວກ​ເຮົາ ​ຢູ່​ໃນ​ໂລ ກ​ຈະ​ຕົກ​ຢູ່​ໃນ​ອັນ​ຕະລາຍ​ທີ່​ຮ້າຍ​ແຮງ.”

ພວກ​ທີ່​ລອດ​ຊີວິດ​ມາ​ໄດ້​ແລະ​ຄອບຄົວ​ຂອງ​ພວກ​ເຄາະ​ຮ້າຍ ​ໃນ​ການ​ໂຈມ​ຕີ ​ເມື່ອວັນ​ທີ 11 ກັນຍາໄດ້​ປຸກລະດົມ​ໃຫ້​ຮັບ​ຜ່ານ​ຮ່າງ​ກົດໝາຍ​ດັ່ງກ່າວ​ນີ້.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG