ທຳນຽບຂາວ ກ່າວວ່າ ປະທານາທິບໍດີ ບາຣັກ ໂອບາມາ ໄດ້
ຕັດສິນໃຈ ທີ່ຈະເຊັນກົດໝາຍ ເພື່ອອະນຸຍາດໃຫ້ໃຊ້ມາດຕະ
ການລົງໂທດຣັດເຊຍຕື່ມອີກ ສຳຫລັບບົດບາດຂອງຣັດເຊຍ
ກ່ຽວກັບວິກິດການໃນຢູເຄຣນ.
ຮ່າງກົດໝາຍດັ່ງກ່າວ ຊຶ່ງໄດ້ຖືກຮັບຜ່ານ ຈາກສະພາສູງ
ເມື່ອອາທິດແລ້ວນີ້ ຍັງຈະມອບອຳນາດໃຫ້ປະທານາທິບໍດີ
ສະໜອງການຊ່ວຍເຫຼືອ ທາງດ້ານທະຫານ ໂດຍມີອາວຸດ
ຮ້າຍແຮງ ແລະ ທີ່ບໍ່ຮ້າຍແຮງ ໃນມູນຄ່າ 350 ລ້ານດອນລາ
ໃຫ້ແກ່ລັດຖະບານຢູເຄຣນ.
ການຊ່ວຍເຫຼືອອັນທີ່ມີທ່າແຮງນັ້ນ ລວມມີ ອາວຸດຕໍ່ຕ້ານລົດຖັງ ອາວຸດຍຸດໂທປະກອນ
ແລະເຮືອບິນບໍ່ມີຄົນຂັບ. ຮ່າງກົດໝາຍດັ່ງກ່າວ ຍັງອຳນວຍໃຫ້ປະທານາທິບໍດີ ໃຊ້ການ
ລົງໂທດຊຸດໃໝ່ ຕໍ່ຂະແໜງການ ປ້ອງກັນປະເທດ ແລະພະລັງງານ ຕ່າງໆຂອງຣັດເຊຍ
ຖ້າຫາກບັນດາບໍລິສັດ ຂອງຣັດເຊຍ ຂາຍ ຫຼື ສົ່ງອຸປະກອນເຄື່ອງໃຊ້ ໃນດ້ານທະຫານ
ໄປຍັງຢູເຄຣນ ຈໍເຈຍ ໂມລໂດວາ ຫຼື ຊີເຣຍ.
ເຖິງຢ່າງໃດກໍຕາມ ການຜ່ານກົດໝາຍດັ່ງກ່າວ ບໍ່ໄດ້ເຮັດໃຫ້ການລົງໂທດຕ່າງໆ ຫຼື ການ
ຊ່ວຍເຫຼືອທາງດ້ານທະຫານ ເປັນຂໍ້ບັງຄັບ.